TANAJ 13
Ri man e qitzij ta religiones nkitzʼilbʼisaj ri rubʼiʼ ri Dios
Ri religiones nkikʼüt chi ri Dios kan ajowabʼäl wi chuqaʼ yechʼon pa ruwiʼ rijaʼ, ja kʼa, kibʼanon nimaläj taq chʼaʼoj. Reʼ nel chi tzij, chi man e qitzij ta religiones. Rikʼin ri kinojin taq tzij kitzʼilbʼisan ri rubʼiʼ ri Dios. ¿Achike rubʼanik kibʼanon reʼ? ¿Achike nunaʼ ri Dios chi rij reʼ? ¿Achike xtubʼän ri Dios richin xtusöl ronojel reʼ?
1. ¿Achike rubʼanik kitzʼilbʼisan rubʼiʼ ri Dios rikʼin ri nkikʼüt?
Ri religiones ri man e qitzij ta kijalon ri qitzij chi rij ri Dios rikʼin ri man e qitzij ta (Romanos 1:25). Kʼïy religiones man nkikʼüt ta ri rubʼiʼ ri Dios chi ke ri winaqiʼ. Ja kʼa ri Biblia nubʼij chi ütz nqakusaj (Romanos 10:13, 14). E kʼo ukʼwäy taq bʼey pa taq religiones ri nkikʼüt chi toq kʼo jun itzel nbʼanatäj ja riʼ ri nrajoʼ ri Dios. Ja kʼa reʼ man qitzij ta. Ruma toq kʼo jun itzel nbʼanatäj man ja ta ri rurayibʼal ri Dios (tasikʼij Santiago 1:13). Ruma riʼ, kʼïy winaqiʼ kijachon kiʼ rikʼin ri Dios.
2. ¿Achike rubʼanik kitzʼilbʼisan rubʼiʼ ri Dios rikʼin ri kibʼanobʼal?
Ri Jehová janila ütz runaʼoj kikʼin ri winaqiʼ, ja kʼa ri religiones man ke riʼ ta nkibʼän. Ri Biblia nubʼij chi ri kimak «kan ikʼowinäq chik ruwiʼ y kan xapon yan kan chi la kaj» (Apocalipsis 18:5). Ri religiones kʼïy yan junaʼ kijuʼun kiʼ pa política, kiyaʼon kitoʼik richin yebʼan nimaʼq taq oyowal chuqaʼ kiyaʼon qʼij chi yekamisäx kʼïy winaqiʼ. E kʼo ukʼwäy taq bʼey pa taq religiones ri janila kibʼeyomäl chuqaʼ nkikʼutuj mero chi ke ri yeʼapon pa taq ki-religión richin man nkʼis ta kan ri kibʼeyomäl. Rikʼin riʼ nkikʼüt chi majun ketaman ta ruwäch ri Dios. Ruma riʼ, ¿achike ruma nkibʼij chi e chaʼon ruma ri Dios? (Tasikʼij 1 Juan 4:8).
3. ¿Achike nunaʼ ri Jehová toq nutzʼët ri achike nkibʼän ri man e qitzij ta religiones?
We rat itzel nanaʼ ruma ri nkibʼän ri religiones, ¡más itzel nunaʼ ri Jehová! Ri Jehová janila yerajoʼ ri winaqiʼ, ja kʼa janila royowal kikʼin ri ukʼwäy taq bʼey pa taq religiones ruma kitzʼilbʼisan rubʼiʼ chuqaʼ itzel kinaʼoj kikʼin ri winaqiʼ ri yeʼapon kikʼin. Ri Dios xtukʼïs kiwäch ri religiones ri man e qitzij ta chuqaʼ «man xtitzʼetetäj ta chik» kiwäch (Apocalipsis 18:21). Xa bʼa chik apo xtuchüp kiwäch ri religiones ri man e qitzij ta (Apocalipsis 18:8).
TQANIKʼOJ RIJ
Eqal eqal tqatzʼetaʼ achike nunaʼ ri Jehová chi kij ri religiones ri man e qitzij ta. Chuqaʼ tqatzʼetaʼ kayoxiʼ chik naʼoj chi kij ri achike kibʼanon ri religiones. Y, pa rukʼisibʼäl, tqatzʼetaʼ achike ruma ütz nqetamaj más chi rij ri Jehová stapeʼ qetaman achike kibʼanon ri religiones.
4. Kʼïy religiones man yeqa ta chuwäch ri Dios
Kʼïy winaqiʼ nkibʼij chi konojel ri religiones e achiʼel bʼey ri yatkikʼwaj rikʼin ri Dios. Ja kʼa, ¿la kan qitzij reʼ? Tisikʼij Mateo 7:13, 14 chuqaʼ kixchʼon chi rij reʼ:
Achiʼel nubʼij ri Biblia, ¿achike rubʼanik ri bʼey ri yarukʼwaj pa kʼaslem?
Titzʼetaʼ ri VIDEO chuqaʼ kixchʼon chi rij reʼ:
¿La nukʼüt ri Biblia chi e kʼo kʼïy religiones ri yeqa chuwäch ri Dios?
5. Ri religiones ri man e qitzij ta man nkisamajij ta ri rajowabʼäl ri Dios
Kʼiy rubʼanik ri religiones kitzʼilbʼisan ri rubʼiʼ ri Dios, jun chi ke ri más itzel ja ri kiyaʼon kitoʼik toq yebʼan nimaʼq taq oyowal. Richin nqatzʼët jun tzʼetbʼäl, titzʼetaʼ ri VIDEO. Chuqaʼ kixchʼon chi rij reʼ:
¿Achike xkibʼän kʼïy religiones toq najin wi ri Segunda Guerra Mundial?
¿Achike nachʼöbʼ rat chi rij ri xkibʼän?
Tisikʼij Juan 13:34, 35 chuqaʼ 17:16. Chi rij riʼ kixchʼon chi rij reʼ:
¿Achike nunaʼ ri Jehová toq ri religiones yetoʼon pa nimaʼq taq oyowal?
Kʼïy itzelal e bʼanatajnäq kuma ri religiones ri man e qitzij ta, rikʼin riʼ kikʼutun chi man kʼo ta ri rajowabʼäl ri Dios kikʼin. ¿Achike atzʼeton pe rat chi kan ke ri wi nkibʼän?
Ri religiones ri man e qitzij ta man nkisamajij ta ri rajowabʼäl ri Dios.
6. Ri Dios nrajoʼ yeruköl ri winaqiʼ pa kiqʼaʼ ri religiones ri man e qitzij ta
Tisikʼij Apocalipsis 18:4a chuqaʼ kixchʼon chi rij reʼ:
Ri Dios nrajoʼ yeruköl ri winaqiʼ ri e qʼolon kuma ri religiones ri man e qitzij ta. ¿Achike nabʼij rat chi rij reʼ?
7. Tawetamaj más ruwäch ri Dios
¿La kʼo chi itzel natzʼët ri Dios ruma ri kibʼanon ri religiones ri man e qitzij ta? Tachʼobʼoʼ chi rij jun alaʼ ri man nunimaj ta rutzij ri rutataʼ, nanimäj el chi rachoch y nukʼwaj jun itzel kʼaslem. Ri tataʼaj riʼ man nqa ta chuwäch ri nubʼän ri rukʼajol. ¿La rumak ri tataʼaj ruma ri itzel kʼaslem xukʼwaj ri rukʼajol?
¿La kʼo rumak ri Dios ruma ri nkibʼän ri religiones ri man e qitzij ta y roma riʼ nayaʼ kan ri atijonïk chi rij rijaʼ?
E KʼO JUJUN NKIBʼIJ REʼ: «Majun achike ta chik ninwajoʼ ninwakʼaxaj chi rij ri Dios ruma janila itzelal kibʼanon ri religiones».
¿La nachʼöbʼ rat ke riʼ?
¿Achike ruma man ütz ta ri itzel nqatzʼët ri Jehová roma ri kibʼanon ri religiones ri man e qitzij ta?
TQAKAMULUJ
Ri religiones ri man e qitzij ta kitzʼilbʼisan ri rubʼiʼ ri Dios rikʼin ri nkikʼüt chuqaʼ rikʼin ri itzelal kibʼanon kan. Xa bʼa chik apo ri Dios xtukʼïs kiwäch.
Ri xawetamaj
¿Achike nachʼöbʼ rat chi rij ri kikʼutun chuqaʼ ri kibʼanon ri religiones ri man e qitzij ta?
¿Achike nuchʼöbʼ ri Jehová chi rij ri religiones ri man e qitzij ta?
¿Achike xtukʼäm pe ri Dios pa kiwiʼ ri religiones ri man e qitzij ta?
RICHIN NAWETAMAJ MÁS
Jubʼama konojel ri religiones man yeqa ta chuwäch ri Dios. Tawetamaj kaʼiʼ achoj ruma.
«¿La konojel ri religiones nkibʼän chi yojjel apo rikʼin ri Dios?» (Reʼ xtawïl pa jw.org)
¿Achike ruma ri Jehová nrajoʼ chi nqamöl qiʼ richin nqayaʼ ruqʼij y man xa xe ta pa qayonil nqabʼän?
«¿La nkʼatzin jun religión richin nqamöl qiʼ?» (Reʼ xtawïl pa jw.org)
Jun sacerdote kʼo wi ri rukʼutunïk chi rij ri ru-religión. Ja kʼa reʼ man xubʼän ta chi man xretamaj ta ri qitzij chi rij ri Dios.
«Jun sacerdote xuyaʼ kan ri ru-religión» (¡Despertad!, febrero de 2015)
Pa ciento chi junaʼ, ri religiones kitzʼukun tzij chi rij ri Dios chuqaʼ kikʼutun chi kiwäch ri winaqiʼ chi rijaʼ achiʼel abʼäj ranima chuqaʼ man yojrajoʼ ta. Tawetamaj ri kixeʼel ri oxiʼ tzʼukun taq tzij reʼ.
«Ri tzʼukun taq tzij chi rij ri Dios» (La Atalaya, 1 de noviembre de 2013)