TANAJ 15
¿Achike ri Jesús?
Ri Jesús jun chi ke ri achiʼaʼ ri más etaman ruwäch chuwäch ronojel Ruwachʼulew. Ja kʼa, xa e bʼa ok winäq ri ketaman ruwäch, chuqaʼ kʼïy ri jalajöj rubʼanik nkitzʼët rijaʼ. Ja kʼa, ¿achike nubʼij ri Biblia chi rij rijaʼ?
1. ¿Achike ri Jesús?
Ri Jesús jun espíritu ri kʼo ruchuqʼaʼ ri kʼo chi laʼ chi kaj. Ri Jehová xubʼän ri Jesús pa nabʼey chuwäch ronojel. Nubʼij chi rijaʼ xkʼojeʼ pe «nabʼey chuwäch ronojel ri xetzʼukutäj» (Colosenses 1:15). Ri Biblia nubʼij chi re ri Jesús ri «juney Rukʼajol», ruma xa xe rijaʼ ri xbʼan ruma ri Jehová (Juan 3:16). Ri Jesús xsamäj rikʼin ri Jehová richin xekibʼän ronojel ri kʼo (tasikʼij Proverbios 8:30). Y rijeʼ ütz kikʼwan kiʼ. Ri Jesús ja riʼ «ri Chʼabʼäl», nel chi tzij, chi ri Jehová nukusaj ri Jesús richin nuqʼalajrisaj ri runaʼoj chuqaʼ ri ruchʼabʼäl (Juan 1:14).
2. ¿Achike ruma xpe ri Jesús chuwäch ri Ruwachʼulew?
Jun laʼaq dos mil junaʼ kan, ri Jehová xukusaj ri ru-espíritu santo richin xubʼän jun milagro: xutäq pe rukʼaslem ri Jesús, jun ángel ri kʼo chi laʼ chi kaj ri kʼo ruchuqʼaʼ, chi rupam jun xtän ri man kʼulan ta rubʼiʼ María. Ruma ri Jehová xubʼän riʼ, ri Jesús xaläx chuwäch ri Ruwachʼulew (tasikʼij Lucas 1:34, 35). Ri Jesús xpe chuwäch ri Ruwachʼulew richin xok ri Cristo, o ri Mesías, chuqaʼ richin xeruköl ri winaqiʼ.a Konojel ri profecías ri yechʼon chi rij ri Mesías rikʼin rijaʼ xebʼanatäj. Reʼ xubʼän chi ri winaqiʼ xketamaj chi «ri Cristo, ri Rukʼajol ri kʼaslïk Dios» (Mateo 16:16).
3. ¿Akuchi kʼo ri Jesús wakami?
Toq xkʼis rukʼaslem ri Jesús chuwäch ri Ruwachʼulew, ri Jesús xyaʼöx chik rukʼaslem achiʼel jun espiritu chuqaʼ xtzolin chi la chi kaj. Chi riʼ «ri Dios, janila nimaläj ri ruqʼij xuyaʼ chi re» (Filipenses 2:9 CR). Wakami ri Jesús kʼo janila uchuqʼaʼ pa ruqʼaʼ ja kʼa xa xe ri Jehová ri kʼo más ruchuqʼaʼ chuwäch rijaʼ.
TQANIKʼOJ RIJ
Tqetamaj achike qas ri Jesús chuqaʼ achike ruma kʼo janila rejqalem ri nqetamaj ruwäch.
4. Ri Jesús man achiʼel ta ri Dios ri kʼo ronojel uchuqʼaʼ pa ruqʼaʼ
Chi la chi kaj ri Jesús jun espíritu ri janila ruchuqʼaʼ, stapeʼ ke riʼ ri Biblia nubʼij chi rijaʼ nunimaj rutzij ri Rutataʼ. ¿Achike ruma nqabʼij reʼ? Titzʼetaʼ ri VIDEO richin niwetamaj achike ruma ri Biblia nubʼij chi ri Jesús man junan ta rikʼin ri Dios ri kʼo ronojel uchuqʼaʼ pa ruqʼaʼ.
Re textos reʼ xkojkitoʼ richin xtqʼax chi qawäch achike ruma nqabʼij chi ri Jesús man junan ta rikʼin ri Jehová. Tisikʼij jujun texto chuqaʼ kixchʼon chi rij reʼ:
Tisikʼij Lucas 1:30-32.
Rikʼin ri xubʼij ri ángel, ¿achike ruma nqabʼij chi ri Jesús man junan ta rikʼin ri Jehová, ri «Nimaläj Dios»?
Tisikʼij Mateo 3:16, 17 TNM.
Toq xbʼan bautizar ri Jesús xkʼaxatäj jun chʼabʼäl chi la chi kaj ¿achike xubʼij ri chʼabʼäl riʼ?
¿Achoj chʼabʼäl riʼ nabʼij rat?
Tisikʼij Juan 14:28.
¿Achike ri más nïm chuqaʼ ri kʼo más uchuqʼaʼ pa ruqʼaʼ: jun tataʼaj o jun alkʼwal?
¿Achike nel chi tzij toq ri Jesús xubʼij «Nataʼ» chi re ri Jehová?
Tisikʼij Juan 12:49.
¿La xubʼij ri Jesús chi rijaʼ chuqaʼ ri Rutataʼ e junan? ¿Achike nabʼij rat?
5. Ri Jesús ja riʼ ri xok ri Mesías
Chupam ri Biblia e kʼo kʼïy profecías ri xekitoʼ ri winaqiʼ richin xkitzʼët achike ri Mesías, nel chi tzij, ri chaʼon ruma ri Dios richin yeruköl ri winaqiʼ. Titzʼetaʼ ri VIDEO, akuchi xtiwïl jun xtiʼ koʼöl ruqʼalajrisaxik chi kij kayoxiʼ profecías ri xebʼanatäj toq ri Jesús xkʼojeʼ chuwäch ri Ruwachʼulew.
Tisikʼij ri profecías ri kʼo chupam ri Biblia chuqaʼ kixchʼon chi rij reʼ:
Tisikʼij Miqueas 5:2 richin niwetamaj akuchi kʼo wi chi naläx ri Mesías.b
¿La xbʼanatäj re profecía reʼ toq xaläx pe ri Jesús? (Mateo 2:1).
Tisikʼij Salmo 34:20 chuqaʼ Zacarías 12:10 richin nitzʼët kayoxiʼ naʼoj ri bʼin kan chi rij ri rukamik ri Mesías.
¿La xebʼanatäj re profecías reʼ? (Juan 19:33-37).
¿Nabʼij rat chi ri Jesús xukanoj rubʼanik richin nbʼanatäj jun chi ke re profecías reʼ?
¿Achike nukʼüt chawäch chi rij ri Jesús ronojel reʼ?
6. Ri nqetamaj ruwäch ri Jesús kʼo utzil nukʼäm pe pa qawiʼ
Ri Biblia nuqʼalajrisaj achike ruma kʼo rejqalem nqetamaj chi rij ri Jesús chuqaʼ ri ruchilabʼän ri Dios chi re. Tisikʼij Juan 14:6 chuqaʼ 17:3, chuqaʼ kixchʼon chi rij reʼ:
¿Achike ruma kan nkʼatzin nqetamaj ruwäch ri Jesús?
Ri Jesús xujäq ri bʼey richin yojtikïr yojok rachibʼil ri Dios chuqaʼ xukʼüt ri qitzij chi rij ri Jehová. Ke riʼ chuqaʼ, ruma rijaʼ röj yojtikïr nqïl ri kʼaslem ri man kʼisel ta.
E KʼO JUJUN NKIBʼIJ REʼ: «Ri testigos de Jehová man nkinimaj ta ri Jesús».
¿Achike nabʼij rat chi rij reʼ?
TQAKAMULUJ
Ri Jesús jun espíritu ri kʼo ruchuqʼaʼ, ri Rukʼajol ri Dios chuqaʼ ri Mesías.
Ri xawetamaj
¿Achike ruma nbʼïx chi re ri Jesús chi rijaʼ «ri nabʼey chuwäch ronojel ri xetzʼukutäj»?
¿Achike wi nubʼän ri Jesús toq majani tpe chuwäch ri Ruwachʼulew?
¿Achike ruma qetaman chi ri Jesús ja riʼ ri Mesías?
RICHIN NAWETAMAJ MÁS
Tawetamaj más naʼoj ri nkikʼüt chi qe chi ri Jesús ja riʼ ri Mesías.
«¿La nkikʼüt ri profecías chi ri Jesús ja riʼ ri Mesías?» (Reʼ xtawïl pa jw.org)
Tatzʼetaʼ ri nubʼij ri Biblia chi rij ri rubʼanik ri Dios xbʼeʼok rutataʼ ri Jesús.
«¿Achike ruma ri Jesús nbʼïx Rukʼajol ri Dios chi re?» (Reʼ xtawïl pa jw.org)
Tawetamaj achike ruma ri trinidad man chupam ta ri Biblia elesan pe.
«Ri Jesús: ¿ja riʼ ri Dios?» (La Atalaya, 1 de abril de 2009)
Tatzʼetaʼ achike rubʼanik xjalatäj rukʼaslem jun ixöq toq xretamaj achike nubʼij ri Biblia chi rij ri Jesús.
«Jun judía nuqʼalajrisaj achike ruma xujäl ri runimanïk» (¡Despertad!, mayo de 2013)