TANAJ 29
¿Akuchi yojbʼe taq yojkäm?
¿La kʼo jun awachʼalal o jun awachibʼil ri xkäm yan? Toq xbʼanatäj riʼ janila wi xqʼaxon awanima, chuqaʼ rikʼin bʼaʼ xakʼutuj qa chawäch «¿Achike nbʼanatäj toq yojkäm? ¿La xkentzʼët jun bʼey chik ri wachʼalal ri xekäm yan?». Chupam re jun tanaj reʼ chuqaʼ re jun chik xtqatzʼët achike rubʼanik nukuqubʼaʼ qakʼuʼx ri nubʼij ri Biblia chi rij reʼ.
1. ¿Achike nbʼanatäj qikʼin toq yojkäm?
Ri Jesús xujunumaj ri kamïk rikʼin jun winäq ri nwär. ¿Achike ruma? Ruma toq jun winäq nwär, majun nunaʼ ta achike nbʼanatäj chunaqaj. Toq jun winäq nkäm, majun chik achike ta nunaʼ nixta ntijon poqön. Ri Biblia nubʼij chi ri «kaminaqiʼ man yechʼobʼon ta chik» (tasikʼij Eclesiastés 9:5).
2. ¿Achike rubʼanik yojrutoʼ ri nqetamaj ri qitzij chi rij ri kamïk?
Kʼïy winaqiʼ nkixibʼij kiʼ chuwäch ri kamïk, chuqaʼ chi kiwäch ri kaminaqiʼ. We rat chuqaʼ ke riʼ nanaʼ, ri nubʼij ri Biblia xtukuqubʼaʼ akʼuʼx. Ri Jesús xubʼij chi ri «qitzij xkixkolon» (Juan 8:32 CR). E kʼo religiones nkikʼüt chi toq jun winäq nkäm kʼa kʼo jun nkʼaseʼ kan chi rij, ja kʼa ri Biblia man ja ta riʼ nukʼüt. Toq jun winäq nkäm man nutïj ta chik poqön. Ruma ri kaminaqiʼ majun achike ta nkinaʼ man yetikïr ta yojkitzelaj. Ruma riʼ man nkʼatzin ta chi nqakʼutuj chi re ri Dios pa kiwiʼ, nixta nqayaʼ kiqʼij o nqabʼän xa bʼa achike chik na jun richin man yojkitzelaj ta.
E kʼo jujun nkibʼij chi yetikïr yetzijon kikʼin ri kaminaqiʼ, ja kʼa reʼ man qitzij ta. Achiʼel xqetamaj, ri kaminaqiʼ majun achike ta chik nkinaʼ. Ruma riʼ ri winaqiʼ ri nkibʼij chi yetzijon kikʼin ri kaminaqiʼ rikʼin bʼaʼ xa yetzijon kikʼin demonios ri nkibʼij chi rijeʼ ri e kaminaqiʼ riʼ. Ruma riʼ ri nqetamaj ri qitzij chi rij ri kamïk yojruköl chi kiwäch ri demonios. Ri Jehová nubʼij chi qe chi man tqakanoj rubʼanik richin yojtzijon kikʼin ri kaminaqiʼ ruma rijaʼ retaman chi xa kikʼin ri demonios yojtzijon wi y rijaʼ nrajoʼ yojruchajij chi kiwäch (tasikʼij Deuteronomio 18:10-12).
TQANIKʼOJ RIJ
Tqetamaj más ri nukʼüt ri Biblia chi rij ri kamïk. Chuqaʼ tqetamaj achike rubʼanik yojtikïr nqakuqubʼaʼ más qakʼuʼx chi rij ri Dios ruma rijaʼ yojrajoʼ chuqaʼ man yeruyaʼ ta pa kʼayewal ri kaminaqiʼ.
3. Ri nbʼanatäj qikʼin toq yojkäm
Chuwäch ronojel Ruwachʼulew ri winaqiʼ kʼïy nkibʼij chi rij ri nbʼanatäj toq jun winäq nkäm. Ja kʼa kʼïy chi ke ri nkibʼij man e qitzij ta.
¿Achike nkinimaj ri winaqiʼ pa atinamit chi kij ri kaminaqiʼ?
Richin nqetamaj ri nukʼüt ri Biblia chi rij reʼ, titzʼetaʼ ri VIDEO.
Tisikʼij Eclesiastés 3:20 chuqaʼ kixchʼon chi rij reʼ:
Achiʼel ri xqasikʼij kan, ¿achike nbʼanatäj toq jun winäq nkäm?
Toq jun winäq nkäm, ¿kʼa kʼo na ri nkʼaseʼ kan chi re?
Ri Biblia nchʼon chi rij ri rukamik ri Lázaro, jun utziläj rachibʼil ri Jesús. ¿Achike xubʼij ri Jesús chi xbʼanatäj rikʼin ri Lázaro toq xkäm? Tisikʼij Juan 11:11-14 chuqaʼ kixchʼon chi rij reʼ:
¿Achoj rikʼin xujunumaj ri Jesús ri kamïk?
¿Achike nukʼüt chi qawäch chi rij ri kamïk re tzʼetbʼäl reʼ?
¿La ütz nqanimaj ri nubʼij ri Biblia chi rij ri kamïk? ¿Achike nabʼij rat?
4. Ri qitzij chi rij ri kamïk yojruköl
Toq nqetamaj ri qitzij chi rij ri kamïk, man xtqaxibʼij ta chik qiʼ chi kiwäch ri kaminaqiʼ. Tisikʼij Eclesiastés 9:10 chuqaʼ kixchʼon chi rij reʼ:
¿La yetikïr ri kaminaqiʼ yojkitzelaj?
Ri naʼoj ri e kʼo chupam ri Biblia yojrutoʼ richin man nqanimaj ta chi kʼo chi nqayaʼ kiqʼij ri kaminaqiʼ. Tisikʼij Isaías 8:19 chuqaʼ Apocalipsis 4:11, chuqaʼ kixchʼon chi rij reʼ:
¿Achike nunaʼ ri Jehová toq jun winäq nuyaʼ ruqʼij ri kaminaqiʼ o nukanoj rutoʼik kikʼin?
Ri qitzij chi rij ri kamïk yojruköl chi kiwäch ri bʼanobʼäl ri man yeqa ta chuwäch ri Jehová.
5. Ri qitzij chi rij ri kamïk nukuqubʼaʼ qakʼuʼx
Kʼïy winaqiʼ kʼutün kan chi ke chi toq xkekäm xketijon poqön ruma ri man ütz ta xkibʼän pa kikʼaslem. Ja kʼa nukuqubʼaʼ qakʼuʼx ri nqetamaj chi majun achike ta winäq ri xtitijon poqön toq xtkäm, nixta ri xkibʼän itzel taq bʼanobʼäl pa kikʼaslem. Tisikʼij Romanos 6:7 chuqaʼ kixchʼon chi rij reʼ:
Ri Biblia nubʼij chi toq jun winäq nkäm nküy ronojel rumak. Ruma riʼ, ¿la najin nkitïj poqön ri kaminaqiʼ ruma ri kimak xkibʼän ojer kan?
Toq más nqetamaj ruwäch ri Jehová, más nqatzʼët chi rijaʼ man yeruyaʼ ta pa tijoj poqonal ri kaminaqiʼ. Tisikʼij Deuteronomio 32:4 chuqaʼ 1 Juan 4:8, chuqaʼ kixchʼon chi rij reʼ:
Rikʼin ri xqetamaj chi rij ri runaʼoj ri Dios, ¿la xtuyaʼ qʼij rijaʼ chi ri kaminaqiʼ xketijon poqön?
¿Nabʼij rat chi ri nqetamaj ri qitzij chi rij ri kamïk nukuqubʼaʼ qakʼuʼx? ¿Achike ruma?
E KʼO JUJUN NKIBʼIJ REʼ: «Ninxibʼij wiʼ ruma man wetaman ta achike xtbʼanatäj wikʼin toq xkikäm».
¿Achike textos xtakusaj richin xtakuqubʼaʼ rukʼuʼx jun winäq ri xtubʼij reʼ chawe?
TQAKAMULUJ
Toq jun winäq nkäm, chi riʼ nkʼis rukʼaslem. Ri kaminaqiʼ majun yetijon ta poqön chuqaʼ man yekitzelaj ta ri chʼaqa chik.
Ri xawetamaj
¿Achike nbʼanatäj toq yojkäm?
¿Achike ruma yojruköl ri qetaman ri qitzij chi rij ri kamïk?
¿Achike ruma nukuqubʼaʼ qakʼuʼx ri qetaman ri qitzij chi rij ri kamïk?
RICHIN NAWETAMAJ MÁS
Tawetamaj achike qas nel chi tzij ri tzij alma chupam ri Biblia.
Tawetamaj we kan qitzij chi ri Dios yeruyaʼ pa qʼaqʼ ri winaqiʼ richin yetijon poqön.
¿La kʼo chi nqaxibʼij qiʼ chi kiwäch ri kaminaqiʼ?
Ri ki-espíritus ri animaʼiʼ... ¿la yetikïr yojkitoʼ o xa yojkitzelaj? ¿La qitzij e kʼo? (Folleto)
Tawetamaj ruwäch jun achin ri kan xukuqubʼaʼ rukʼuʼx toq xretamaj ri qitzij chi rij ri kamïk.