¿Achike kʼo chi nqabʼän richin chi ri Dios nqa chuwäch ri rubʼanik nqayaʼ ruqʼij?

Achiʼel xqetamaj yan, man konojel ta ri religiones yeqa chuwäch ri Dios. Stapeʼ ke riʼ yojtikïr nqayaʼ ruqʼij richin nqakikotisaj ranima. ¿Achike rubʼanik nqayaʼ ruqʼij rijaʼ? ¿Achike religión ri nqa chuwäch rijaʼ? (Santiago 1:​27). Tqatzʼetaʼ achike nukʼüt ri Biblia.

1. ¿Akuchi nqïl ri rubʼanik nqayaʼ ruqʼij ri Dios?

Ri rubʼanik nqayaʼ ruqʼij ri Dios nqïl chupam ri Biblia. Ri Jesús xubʼij chi re ri Dios: «Ri achʼabʼäl ja riʼ ri qitzij» (Juan 17:​17). E kʼo religiones ri man nkiyaʼ ta rejqalem ri nubʼij ri Ruchʼabʼäl ri Dios, xa nkajoʼ nkibʼän ri kʼutun kan chi kiwäch. Ja kʼa ri Jehová man nqa ta chuwäch toq röj man nqayaʼ ta rejqalem ri nubʼij ri Ruchʼabʼäl (tasikʼij Marcos 7:9). Ja kʼa, röj nqakikotisaj ranima toq nqabʼän ri nubʼij ri Biblia chuqaʼ nqanimaj rutzij.

2. ¿Achike rubʼanik nqayaʼ ruqʼij ri Jehová?

Ruma ri Jehová xojrubʼän, kʼo chi nqayaʼ ruqʼij rukʼojlem (Apocalipsis 4:​11). Reʼ nel chi tzij chi nqajoʼ chuqaʼ nqayaʼ ruqʼij xa xe chi re rijaʼ, man nqakusaj jun työx, jun wachibʼäl o achike chik na jun (tasikʼij Isaías 42:8).

Ri rubʼanik nqayaʼ ruqʼij kʼo chi «loqʼoläj y kan nqa chuwäch ri Dios» (Romanos 12:1). Reʼ nel chi tzij chi kʼo chi nqakʼwaj jun kʼaslem achiʼel nrajoʼ rijaʼ. Jun tzʼetbʼäl: ri nkajoʼ ri Jehová kʼo chi nkinimaj chuqaʼ nkiyaʼ rejqalem ri rupixaʼ chi rij ri kʼulubʼïk. Chuqaʼ man yeqʼabʼär, man yesikʼan chuqaʼ man yekitäj ta drogas.a

3. ¿Achike ruma ütz nqayaʼ ruqʼij ri Jehová kikʼin ri nkinimaj rutzij?

Chupam ri molojriʼïl ri yeqabʼän ronojel semana yojtikïr nqayaʼ ruqʼij «ri Jehová [...] chupam ri molojriʼïl kichin ri choj kikʼaslem» (Salmo 111:​1, 2). Jun rubʼanik nqabʼän ja toq yojbʼixan chi re ri Dios (tasikʼij Salmo 104:​33). Ruma ri Jehová yojrajoʼ nubʼij chi qe chi ütz nqamöl qiʼ ruma retaman chi toq nqamöl qiʼ yojrutoʼ richin yojkikot pa qakʼaslem richin jantapeʼ. Toq nqamöl qiʼ, nqakuqubʼalaʼ qakʼuʼx chi qawäch.

TQANIKʼOJ RIJ

4. Man ütz ta yeqakusaj tyoxiʼ richin nqayaʼ ruqʼij ri Dios

VIDEO: ¿La nrajoʼ ri Dios chi nqakusaj tyoxiʼ richin nqayaʼ ruqʼij? (3:​26)

• ¿Achike xbʼanatäj ojer kan toq jujun israelitas xkikusaj jun työx richin xkiyaʼ ruqʼij ri Jehová?

E kʼo winaqiʼ nkinaʼ chi naqaj e kʼo rikʼin ri Dios toq nkikusaj tyoxiʼ. Ja kʼa ¿la man nkiqasaj ta ruqʼij toq nkibʼän ke riʼ? Tisikʼij Éxodo 20:​4-6 chuqaʼ Salmo 106:​35, 36, chuqaʼ kixchʼon chi rij reʼ:

• ¿Achike chi wachibʼäl nkikusaj ri winaqiʼ atzʼeton rat?

• ¿Achike nuchʼöbʼ ri Jehová chi rij ri rukusaxik wachibʼäl o tyoxiʼ?

• ¿Achike nachʼöbʼ rat chi rij ri rukusaxik wachibʼäl o tyoxiʼ?

5. We xa xe ri Jehová nqayaʼ ruqʼij, man xkeʼok ta pa qanima ri nimanïk ri man e qitzij ta

VIDEO: Ri qitzij chi rij ri Dios xiruköl (5:​16)

Tisikʼij Salmo 91:​14 chuqaʼ kixchʼon chi rij reʼ:

• We nqakʼüt chi re ri Jehová chi nqajoʼ chuqaʼ xa xe rijaʼ nqayaʼ ruqʼij, ¿achike xtubʼän rijaʼ pa qawiʼ?

6. Nqayaʼ ruqʼij ri Dios toq nqamöl qiʼ pa congregación

Toq yojbʼixan chuqaʼ nqayaʼ qa-comentarios pa qamoloj, nqayaʼ ruqʼij ri Jehová chuqaʼ nqakuqubʼalaʼ qakʼuʼx chi qawäch. Tisikʼij Salmo 22:​22 chuqaʼ kixchʼon chi rij reʼ:

• ¿La yeqa chawäch toq yebʼan comentarios chupam ri qamoloj?

• ¿La narayij nayaʼ jun a-comentario pa qamoloj?

7. Ri Jehová nqa chuwäch toq nqatzijoj ri najin nqetamaj

Kʼïy rubʼanik ri yojtikïr nqatzijoj chi ke ri chʼaqa chik ri nukʼüt ri Biblia. Tisikʼij Salmo 9:1 y 34:1, chuqaʼ kixchʼon chi rij reʼ:

• Rikʼin ri awetaman yan chi rij ri Biblia, ¿achike nawajoʼ natzijoj chi ke ri chʼaqa chik?

TQAKAMULUJ

Nqakikotisaj ranima ri Dios toq xa xe rijaʼ nqayaʼ ruqʼij, toq nqayaʼ ruqʼij pa qamoloj chuqaʼ toq nqatzijoj chi ke ri chʼaqa chik ri achike qetaman yan.

Ri xawetamaj

• ¿Akuchi nqʼalajrisäx ri rubʼanik nrajoʼ ri Dios chi nyaʼöx ruqʼij?

• ¿Achike ruma xa xe ri Jehová kʼo chi nqayaʼ ruqʼij?

• ¿Achike ruma kʼo chi nqayaʼ ruqʼij ri Dios kikʼin ri nkajoʼ nkinimaj rutzij?

RICHIN NAWETAMAJ MÁS

Tawetamaj achike ruma jun ixöq nubʼij chi xkolotäj chi kiwäch ri tyoxiʼ.

«Ri Biblia xujäl kikʼaslem» (La Atalaya, 1 de julio de 2011)

Tawetamaj kayoxiʼ rubʼanik richin nayaʼ a-comentarios pa qamolojriʼïl.

«Tqayaʼ ruqʼij ri Jehová pa congregación» (La Atalaya, enero de 2019)

Tawetamaj achike rubʼanik ri molojriʼïl xutoʼ jun alaʼ stapeʼ kʼayew xubʼän chuwäch ri napon pa moloj.

Ri Jehová janila yirajoʼ (3:​07)

Kʼïy winaqiʼ nkibʼij chi ri cruz nukʼüt chi jun winäq nutzeqelibʼej ri Cristo, ja kʼa, ¿la ütz nqakusaj ri cruz toq nqayaʼ ruqʼij ri Dios?

«¿Achike ruma ri testigos de Jehová man nkikusaj ta ri cruz?» (Reʼ xtawïl pa jw.org)