Génesis

28 Rma riʼ Isaac xskʼij Jacob, xtzjon rkʼë chqä xuʼij che rä: «Ma kakʼleʼ ta kikʼë ri qʼopojiʼ ri ye kʼo Canaán. 2 Jät chlaʼ Padán-Aram, pa rachoch Betuel —ri rtataʼ ateʼ—, y kakʼleʼ rkʼë jun chkë ri rmiʼal Labán, ri rxbʼal ateʼ. 3 Ri Dios ri kʼo ronojel uchqʼaʼ pa rqʼaʼ xtyaʼ utzil pan awiʼ, xtuʼän chë xkejeʼ kʼïy awalkʼwal chqä xtkʼiyär ajatzul. Y kantzij na wä chë rït xkatok jun molaj tinamït. 4 Ryä xtyaʼ rtzil Abrahán pan awiʼ —chawä rït chqä chkë ri ajatzul— rchë xttok awchë ri tinamït ri akuchï yït kʼo wä, ri ryaʼon qa chik che rä Abrahán». 5 Rma riʼ Isaac xuʼij che rä Jacob chë tbʼä äl. Y Jacob xbʼä äl Padán-Aram ri akuchï kʼo wä Labán ri rkʼajol Betuel ri arameo. Labán ya riʼ rxbʼal Rebeca, ri rteʼ Jacob chqä Esaú. 13 [...] «Rïn yïn Jehová, rDios Abrahán —ri atat— chqä rDios Isaac. Ri ilew akuchï yït warnäq wä, xtinyaʼ chawä rït chqä chkë ri ajatzul. 14 Y ri awijatzul kan xkeʼok achiʼel ri poqlaj rchë le Rwachʼlew, y ri awijatzul xkejeʼ kʼa pa oeste chqä kʼa pa este y kʼa pa norte y kʼa pa sur, y awmä rït chqä rma awijatzul jontir ri familias ri ye kʼo chwäch le Rwachʼlew xtinyaʼ utzil pa kiwiʼ. 15 Rïn yïn kʼo awkʼë chqä xkatinchajij xa bʼa akuchï xkabʼä wä, y xkatintoʼ rchë xkatzolin pä chpan re tinamït reʼ. Ma xkatinyaʼ ta qa kʼa taq xtinbʼän jontir ri ntzjun pä chawä».