Génesis

36 Rma riʼ Jacob xpë ryowal che rä Labán chqä xuʼij che rä: «¿Achkë itzelal xinbʼän chawä? ¿Achkë mak nbʼanon chawäch rma riʼ kan ma yakos ta chi nkanuxik? 37 Rma komä ya xanukʼuj yän jontir ri kʼo wkʼë, ¿kʼo komä jun xawïl ri awchë rït? Takʼutuʼ chkiwäch ri awachʼalal chqä chkiwäch ri wachʼalal rïn, rchë ke riʼ yë ryeʼ kebʼin achkë chqë röj kantzij ntzjon. 38 Chkipan ri 20 jnaʼ ri yïn kʼo awkʼë, majun ta jun chkë ri kal ri akarneʼl o ri akʼsikʼ xekäm ta taq majanä keʼaläx chqä majun bʼëy xintäj ta jun chkë ri akarneʼl chqä ri akʼsikʼ. 39 Majun bʼëy xinbʼekʼutuʼ ta chawäch jun chkë ri achkop ri xxil rma jun itzel chköp. Rïn xitzʼetö achkë rbʼanik xintzolij rkʼexel ri chköp riʼ. Y, taq nkileqʼaj wä jun chkë ri achkop —paqʼij o chaqʼaʼ—, rït kan nakʼutuj wä kikʼexel chwä. 40 Paqʼij xisamäj chwäch Qʼij y chaqʼaʼ xinköchʼ ri tiw. Y kʼo mul kan ma xok ta waran rma riʼ. 41 20 jnaʼ yïn samajnäq pä awkʼë chawachoch: 14 jnaʼ xisamäj kimä ri kaʼiʼ amiʼal y 6 jnaʼ chkitzʼetik akarneʼl, y jun 10 mul xajäl rajäl nqʼij. 42 Xa ta ri rDios ri ntataʼ ma ta kʼo wkʼë —ri rDios Abrahán chqä ri Dios ri nyaʼöx rqʼij rma Isaac—, komä chöj nqʼeten ta nqʼaʼ yinatäq äl chwachoch. Ye kʼa Dios xtzʼët ri tijöj poqonal xinqʼaxaj chqä chë kan xintäj nqʼij pa samaj. Rma riʼ xaturqʼïl iwir chaqʼaʼ». 43 Rma riʼ Labán xuʼij che rä Jacob: «Re ixoqiʼ reʼ ye nmiʼal rïn, re akʼalaʼ reʼ ye walkʼwal rïn y ye wchë rïn re chköp reʼ. Jontir ri najin natzʼët wchë rïn chqä kichë nmiʼal. ¿Achkë kʼa rma xtinbʼän jun itzelal chkë ri nmiʼal chqä ri kal? 44 Tqabʼanaʼ jun jikibʼäl tzij, y ya riʼ ta kʼa xtnatan chqë ri qatzij xqayaʼ chqawäch». 45 Rma riʼ Jacob xkʼän jun abʼäj y xpabʼaʼ pan ilew. 46 Chrij riʼ xuʼij chkë ri rchʼalal: «Tikʼamaʼ pä jojun abʼäj». Y ryeʼ xekikʼäm pä jojun abʼäj chqä xekimulbʼaʼ. Chrij riʼ xewaʼ pa kiwiʼ ri abʼäj riʼ. 47 Labán, Jegar-Sahadutá rbʼiʼ xyaʼ ri molaj abʼäj riʼ, ye kʼa Jacob Galeed rbʼiʼ xyaʼ. 48 Y Labán xuʼij: «Re molaj abʼäj reʼ xtnataj chqë ri jikibʼäl tzij ri xqaʼän chqawäch». Rma riʼ ri rbʼiʼ xyaʼöx qa ya riʼ Galeed 49 chqä Chajinel, rma Labán xuʼij: «Kan Jehová ttzʼetö pä qchë taq ma jnan ta xtqjeʼ. 50 We rït xkeʼatzʼlaʼ nmiʼal o xkakʼleʼ kikʼë nkʼaj chik ixoqiʼ, tapeʼ majun ta jun chkë ri ye kʼo aweʼ xttzʼetö riʼ, tnatäj chawä chë Dios xttzʼetö pä qchë». 51 Labán xuʼij chik che rä Jacob: «Re molaj abʼäj reʼ chqä ri abʼäj ri xinpabʼaʼ pan ilew xtkʼutü ri jikibʼäl tzij ri xqaʼän chqawäch. 52 Re molaj abʼäj reʼ chqä ri abʼäj ri xinpabʼaʼ pan ilew ya riʼ xtkʼutü chë rïn ma xkiqʼax ta äl aweʼ rchë xtinbʼebʼanaʼ jun itzelal chawä chqä chë rït ma xkaqʼax ta pä ke reʼ rchë xtabʼanaʼ jun itzelal chwä. 53 Ye ta kʼa ri rDios Abrahán chqä ri rDios Nacor, ntel chë tzij, ri rDios ri kitataʼ ryeʼ, xtqʼatö ta tzij pa qawiʼ». Y Jacob xjkibʼaʼ rtzij chwäch Labán pa rbʼiʼ ri Dios ri nyaʼöx wä rqʼij rma Isaac, ri rtataʼ. 54 Chrij riʼ, Jacob xuʼän jun sacrificio pa rwiʼ ri jyuʼ riʼ chqä xerskʼij ri rchʼalal rchë xewaʼ rkʼë. Ryeʼ xewaʼ chqä xekanaj qa jun aqʼaʼ pa rwiʼ ri jyuʼ riʼ. 55 Y Labán kan nmaqʼaʼ yän xkatäj, xtzʼmaj kichiʼ rmam chqä rmiʼal, xerchʼaʼej qa y xtzolin äl chrachoch.