1 Samuel

2 Rma riʼ Saúl xerkʼwaj äl ye 3,000 chkë ri soldados ri más yekowin yechʼeyon ri ye kʼo Israel y xbʼä pa tzʼiran ilew ri rbʼiniʼan Zif rchë xbʼerkanuj David. 3 Ri aqʼaʼ riʼ, Saúl xkanaj qa chuxkïn ri bʼey, pa rwiʼ ri jyuʼ rbʼiniʼan Hakilá, ri kʼo chwäch ri ilew rbʼiniʼan Jesimón. Y David, ri kʼo wä pa tzʼiran ilew, xkʼoxaj chë Saúl kʼo wä naqaj che rä ri akuchï kʼo wä ryä rma najin wä nukanuj. 4 Rma riʼ, David xertäq äl jojun achiʼaʼ rchë nkibʼetzʼetaʼ we Saúl kantzij kʼo chriʼ. 5 Chrij riʼ, David xbʼä kʼa akuchï kʼo wä Saúl y xtzʼët akuchï najin yewär wä Saúl chqä Abner, ri rkʼajol Ner, ri ukʼwayon bʼey chkiwäch ri soldados. Saúl warnäq wä pa kinikʼajal jontir; rsoldados kibʼanon wä kachoch chrij rachoch ryä. 6 Rma riʼ, David xkʼutuj reʼ che rä Ahimélec, ri hitita, y che rä Abisái, ri rkʼajol Zeruyá chqä rchʼalal Joab: «¿Achkë nbʼä wkʼë akuchï kʼo wä Saúl?». Abisái xuʼij: «Rïn xkibʼä awkʼë». 7 Taq qʼequʼn rbʼanon ronojel, David y Abisái xekowin xeʼok apü kʼa akuchï warnäq wä Saúl. Ryä kʼo wä rlanza chʼkïl qa pan ilew chuxkïn rjolon. Abner chqä ri soldados ye warnäq wä chuxkïn. 8 Abisái xuʼij reʼ che rä David: «Komä Dios najin nuyaʼ akʼulel pan aqʼaʼ. Tabʼanaʼ utzil, tayaʼ qʼij chwä rchë nkamsaj rkʼë ri lanza. Xa jmul xtkʼatzin xtinksaj ri lanza rkʼë, ma xtkʼatzin ta chik xtinksaj jmul». 9 Ye kʼa David xuʼij reʼ che rä Abisái: «Majun taʼän ta che rä. Majun ta jun ri nutzʼlaʼ ri achï ri chaʼon rma Jehová ri ma ta xttok ajmak chwäch Dios». 10 David chqä xuʼij: «Rma Jehová kan kʼäs, kan yë Jehová xtkamsan rchë o xtkäm achiʼel nkäm xa bʼa achkë winäq o xtbʼä pa chʼaʼoj y chriʼ xtkamsäx wä. 11 Rma ntaman achkë rbʼanik nchʼobʼon Jehová, ¡majun bʼëy xtqʼax ta pa njolon ntzʼlaʼ ri achï ri chaʼon rma Jehová! Rma riʼ, takʼwaj äl ri lanza ri kʼo chuxkïn rjolon chqä ri xar yaʼ, y joʼ äl». 12 Chrij riʼ, David xkʼwaj äl ri lanza chqä ri xar yaʼ ri kʼo wä chuxkïn rjolon Saúl, y xeʼel äl chriʼ. Majun xtzʼetö nixta xnaʼen kichë. Jontir ye warnäq wä. Ma xnaʼ ta riʼ kiwäch rma Jehová xuʼän chë xeqä chë waran.