Romanos

15 Rma ri rchqʼaʼ Dios ri xyaʼöx pä pan iwiʼ rïx ma yixurxïm ta chqä ma nuʼän ta chë ninaʼ chik jmul xbʼïn·ïl, xa xuʼän chë xixok ralkʼwal Dios. Chqä ri uchqʼaʼ riʼ nbʼanö chqë chë nqaʼij: «¡Abba, Qatataʼ!». 16 Kan yë kʼa ri loqʼoläj rchqʼaʼ Dios nbʼanö chë röj nqanaʼ chë yoj ralkʼwal Dios. 20 Rma ri winäq xyaʼöx jun kikʼaslemal ri xa nchaʼ chiʼ, ma rma ta yë ryeʼ xejowan riʼ, xa kan rma yë Dios xajowan riʼ rchë kʼo ütz nkiyoʼej apü. Ryeʼ ütz nkiyoʼej 21 chë ri winäq xkekolotäj chwäch jun chʼakul ri xa nkäm, y achiʼel ri ralkʼwal Dios, ma xkexmeʼ ta chik pa rqʼaʼ ri mak. 26 Ri loqʼoläj rchqʼaʼ Dios npë chqatoʼik taq röj majun ta chik qachqʼaʼ. Rma kʼo mul, ma qataman ta achkë nkʼatzin nqakʼutuj che rä Dios, ye kʼa ri loqʼoläj rchqʼaʼ nkʼutun pa qawiʼ tapeʼ majun nqkowin ta nqaʼij rma ri bʼis nqanaʼ. 31 Rma riʼ, ¿achkë xtqaʼij chrij reʼ? We Dios kʼo qkʼë röj, ¿achkë ta komä xtkowin chqij? 32 Rma ryä nixta xpoqonaj xyaʼ Rkʼajol pa kamïk qmä röj, ¿ma xtyaʼ ta komä jontir ri rtzjun chqë, yajün Cristo? 35 ¿Achkë komä xtkowin xtqjachö rkʼë ri rajowabʼäl ri Cristo? ¿Xtkowin komä ri kʼayewal yeqaqʼaxaj? ¿Ri kowan nchʼpü qakʼuʼx? ¿Ri kʼayewal yeyaʼöx pa qawiʼ? ¿Ri wayjal? ¿Ri majun ta qatzyaq? ¿Ri nxiʼin rij qakʼaslemal? ¿Ri kamïk? 36 Achiʼël tzʼibʼatäl qa: «Awmä rït ronojel mul najin nqkamsäx, kan achiʼel karneʼl rchë kamïk nqtzʼet». 37 Ye kʼa, röj nqkowin nqqʼax chkiwäch jontir ri kʼayewal riʼ rma Dios, ri xqrajoʼ. 38 Rma kan nyaʼon chwäch wan chë ni ri kamïk, ni ri kʼaslemal, ni ri ángeles, ni ri qʼatbʼäl taq tzij, ni ri ye kʼo komä, ni ri xkejeʼ chqawäch apü, ni jalajöj kiwäch uchqʼaʼ, 39 ni ri ye kʼo chkaj o chuxeʼ Rwachʼlew, ni xa bʼa achkë chik jun ri rbʼanon qa Dios xtkowin xtuʼän chë ryä ma ta xtqrajoʼ chik rma Cristo Jesús ri Qajaw.