1 Corintios

3 Rma jun chkë ri naʼäy ri xintzjoj chiwä ya riʼ ri xtzjöx chwä rïn chqä: chë Cristo xkäm rchë xtöj qamak, achiʼel nuʼij ri Rchʼaʼäl Dios; 4 chë xmuq chqä chë xkʼasöx pä chkikojöl ri kamnaqiʼ pa rox qʼij, achiʼel nuʼij ri Rchʼaʼäl Dios, 5 y chë xkʼüt riʼ chwäch Cefas y chrij riʼ chkiwäch ri 12. 6 Chrij riʼ, xkʼüt riʼ chkiwäch más ye 500 qachʼalal, [...] 7 Chqä xkʼüt riʼ chwäch Santiago; chrij riʼ chkiwäch jontir ri apóstoles. 8 Pa rkʼisbʼäl xkʼüt riʼ chi nwäch rïn, ye kʼa xbʼanatäj riʼ kan achiʼel nbʼanatäj rkʼë jun neʼy ri ma ntzʼaqät ta ri qʼij naläx. 9 Rma rïn riʼ ri ma kan ta kʼo nqʼij chkikojöl ri apóstoles, y ma taqäl ta chwij nbʼix apóstol chwä, rma xa xenyaʼ kʼayewal pa kiwiʼ ri rsamajelaʼ Dios. 10 Ye kʼa rma ri rtzil Dios ri ma taqäl ta chwij nkʼül, yikowin nbʼän ri najin nbʼän. [...] 12 Ye kʼa, we najin ntzjöx chë Cristo xkʼasöx pä chkikojöl ri kamnaqiʼ, ¿achkë rma jojun chiwä rïx niʼij chë ma xkekʼasöx ta ri kamnaqiʼ? 18 We ke riʼ, ri ye kamnäq chik chqä jnan xuʼän kiwäch rkʼë Cristo ma xkekʼastäj ta pä chik. 20 Ye kʼa Cristo xkʼasöx pä chkikojöl ri kamnaqiʼ; yë ryä ri naʼäy ri xkʼasöx pä chkë ri ye kamnäq äl. 21 Rma ri kamïk xpë xa rma jun achï, ri xkekʼasöx ri kamnaqiʼ xtbʼanatäj chqä xa rma jun achï. 22 Y achiʼel nbʼanatäj kikʼë jontir ri xa rma Adán yekäm, ke riʼ chqä rma ri Cristo, jontir xtkïl kʼaslemal. 23 Y ke reʼ rbʼanik xtbʼanatäj: Naʼäy Cristo, y chrij riʼ ri ye rchë chik Cristo [...] 24 Y pa rkʼisbʼäl, ryä xtjäch ri Qʼatbʼäl Tzij che rä rDios chqä Rtataʼ taq xchüp yän kiwäch jontir ri qʼatbʼäl taq tzij chqä jontir ri kʼo uchqʼaʼ pa kiqʼaʼ. 25 Rma ryä kʼo chë xtqʼät tzij kʼa taq Dios xtyaʼ jontir rkʼulel chuxeʼ raqän. 26 Y ri kamïk, ri rkʼisbʼäl rkʼulel, kan xtchup rwäch. 27 Rma Dios «xyaʼ qa jontir pa rqʼaʼ». Ye kʼa, taq ryä nuʼij chë xyaʼ qa jontir pa rqʼaʼ, kan nqʼalajin chë ri winäq ri xyaʼö qa ya riʼ pa rqʼaʼ ma ntok ta chpan jontir riʼ. 28 Ye kʼa taq xtyaʼöx chik jontir pa rqʼaʼ ryä, ya riʼ taq ri Rkʼajol xtjeʼ pa rqʼaʼ ri xyaʼö qa jontir pa rqʼaʼ, rchë ke riʼ Dios xtjeʼ pa rwiʼ ronojel. 29 Xa ta ma ke riʼ, ¿achkë xtkikʼül ri winäq ri yeqasäx pa yaʼ we xa xuʼ rchë yebʼekäm? We ri kamnaqiʼ ma xkekʼasöx ta pä, ¿achkë rma ryeʼ yeqasäx pa yaʼ xa xuʼ rchë nkibʼekʼluʼ riʼ? 31 Ronojel q’ij nxiʼin rij ri nkʼaslemal. [...] 32 We rïn kan yïn chʼayonäq kikʼë itzel taq chköp pa Éfeso kan achiʼel nkiʼän nkʼaj chik achiʼaʼ, ¿achkë xkʼatzin wä xinbʼän riʼ? We ri kamnaqiʼ ma xkekʼasöx ta pä, «qwaʼ chqä qkʼyaʼ, rma chwaʼq xa xtqkäm». 33 Ma tiqʼöl iwiʼ. Ri itzel taq achbʼilanïk xa nkiʼän chiwä chë niyaʼ qa kibʼanik ri utziläj taq naʼoj kʼo iwkʼë. 34 Tibʼanaʼ ri ütz rchë nikʼüt chë kʼo inaʼoj chqä ma kixmakun ta, rma ye kʼo jojun ri ma kitaman ta chrij Dios. Nbʼij reʼ chiwä rma nwajoʼ chë yixkʼïx. 35 Ye kʼa, rkʼë jbʼaʼ kʼo jun xtuʼij: «¿Achkë rbʼanik xkekʼasöx pä ri kamnaqiʼ? ¿Achkë kichʼakul xtyaʼöx?». 42 Ke riʼ chqä nbʼanatäj taq yekʼasöx pä ri kamnaqiʼ. Ri rchʼakul jun winäq xa nqʼäy taq nkäm, ye kʼa taq nkʼasöx pä, ri rchʼakul majun bʼëy chik xtchaʼ ta chiʼ. 45 Kan ke riʼ tzʼibʼatäl qa: «Adán, ri naʼäy achï, xjeʼ rkʼaslemal». Ri rkʼisbʼäl Adán xok jun espíritu ri nuyaʼ kʼaslemal. 49 Y rma ri qabʼanik kan achiʼel ri rbʼanik ri rkʼë poqlaj xbʼan wä, chqawäch apü, ri qabʼanik xtuʼän kan achiʼel ri rbʼanik ri kʼo chkaj. 50 Ye kʼa, qachʼalal, nbʼij reʼ chiwä: ri chʼakulaj chqä ri kïkʼ ma ütz ta ntok chpan Rqʼatbʼäl Tzij Dios, rma jun chʼakulaj ri xa nchaʼ chiʼ ma ütz ta ntok akuchï majun ta achkë nchaʼ chiʼ. 51 Nbʼij jun naʼoj chiwä ri kan loqʼoläj chqä kan ewatäl: ma jontir ta xtquxlan pa kamïk, ye kʼa jontir kan xtjalatäj qachʼakul 52 taq xtqʼajan ri rkʼisbʼäl trompeta. Y kan chaq bʼaʼ xtbʼanatäj riʼ, kan achiʼel taq nqayüp rnaqʼ qawäch. Rma taq ri trompeta xtqʼajan, ri kamnaqiʼ xkekʼasöx pä rkʼë jun chʼakulaj ri ma nchaʼ ta chik chiʼ, y röj xtjalatäj qachʼakul. 55 «Kamïk, ¡ma xkachʼakon ta chik chqij! Kamïk, ¡ma xtayaʼ ta chik kʼayewal pa qawiʼ!». 57 ¡Ye k’a nqatyoxij che rä Dios rma ryä nuʼän chë nqchʼakon rma Jesucristo ri Qajaw! 58 Rma riʼ qachʼalal, kuw kixpaʼeʼ, majun tslon iwchë chqä ronojel mul tiyaʼ iwan chrij ri samaj ryaʼon qa ri Qajaw pan iqʼaʼ, rma itaman chë kan kʼo xtkʼatzin wä ri samaj xtiʼän rma ri Qajaw.