Hebreos

11 Ri kʼuqbʼäl kʼuʼx ntel chë tzij ayaʼon chwäch awan chë kan xkebʼanatäj ri ayoʼen apü chqä chë kan kʼo rma nanmaj chë ri ma yeʼatzʼët ta kantzij ye kʼo. 3 Rma ri qakʼuqbʼäl kʼuʼx, kan nqanmaj chë ronojel xeyaʼöx pa kikʼojlibʼäl rma kan yë Dios xbʼin ya riʼ. Rma riʼ ronojel ri yeqatzʼët xejeʼ pä kimä ri ma yeqatzʼët ta. 4 Rma ri rkʼuqbʼäl kʼuʼx, Abel xyaʼ jun spanïk che rä Dios ri kʼo más rqʼij chwäch ri xyaʼ Caín. Rma ri kʼuqbʼäl kʼuʼx riʼ ryä xtamaj chë rkʼwan jun chöj kʼaslemal, rma Dios kan xqä chwäch ri rspanik. Y tapeʼ xkäm, ryä kʼa najin na ntzjon rma ri rkʼuqbʼäl kʼuʼx. 5 Rma rkʼuqbʼäl kʼuʼx, Enoc xkʼwäx äl jkʼan chik rchë ma xrïl ta kamïk, y majun ta jun xkowin xwlö rchë rma Dios xkʼwaj äl jkʼan chik. Y taq jbʼaʼ nrajoʼ rchë nukʼwäx äl, xtamaj chë ütz xtzʼët rma Dios. 6 Chqä Dios ma kiʼ ta rkʼuʼx xtuʼän rkʼë ri winäq ri majun ta rkʼuqbʼäl kʼuʼx, rma ri winäq ri njelun rkʼë Dios kʼo chë nunmaj chë ryä kantzij kʼo chqä chë kan nuyaʼ rajäl rkʼexel chkë ri winäq ri nkitäj kiqʼij chukanuxik. 7 Rma Noé xjeʼ rkʼuqbʼäl kʼuʼx, taq Dios xuʼij che rä chë kʼo xkebʼanatäj ri majun bʼëy bʼanatajnäq ta, ryä xkʼüt chë kan kʼo rqʼij Dios chwäch chqä xuʼän jun arca rchë xerköl ri ye kʼo pa rachoch. Rma ri kʼuqbʼäl kʼuʼx riʼ xqʼalajin chë ri winäq chkipan qa ri qʼij riʼ kan itzel kinaʼoj, chqä xyaʼöx utzil pa rwiʼ rma rkʼuqbʼäl kʼuʼx. 8 Rma ri rkʼuqbʼäl kʼuʼx, Abrahán xnmaj tzij taq xskʼïx rma Dios, y xbʼä kʼa chwäch jun jyuʼ ri xtyaʼöx wä qa che rä. Xel äl pa rtinamit tapeʼ ma rtaman ta wä akuchï nbʼä wä. 9 Rma ri rkʼuqbʼäl kʼuʼx, xjeʼ chwäch ri jyuʼ ri tzjun wä qa che rä, chkikojöl ri ma ye rwinaq ta. Xjeʼ chkipan jay ri ye bʼanon rkʼë tzyäq kikʼë Isaac y Jacob, ri xkikʼül chqä ri tzjun wä qa che rä. 10 Rma ryä xyoʼej ri tinamït ri kan kuw rxeʼel, ri xbʼan chqä xyak rma Dios. 11 Rma rkʼuqbʼäl kʼuʼx, Sara xkowin xjeʼ jun ral, tapeʼ kan kʼïy wä chik rjnaʼ, rma kan xkʼuqbʼaʼ rkʼuʼx chrij ri xtzjü ya riʼ che rä. 12 Rma riʼ, rma jun achï ri achiʼel ta kamnäq wä chik, xeʼaläx ye kʼïy akʼalaʼ, kan kowan ye kʼïy xeʼaläx kan achiʼel ri chʼumilaʼ ri ye kʼo chkaj chqä ma yekowin ta yeʼajläx, rma kan ye achiʼel ri snayiʼ ri kʼo chuchiʼ mar. 13 Jontir ryeʼ kan kuw kikʼuqbʼäl kʼuʼx taq xekäm, tapeʼ ma xkikʼül ta ri xtzuj chkë. Ye kʼa, tapeʼ kʼa näj apü, ryeʼ xekowin na xekitzʼët chqä kan kiʼ kikʼuʼx xkiʼän taq xtzuj ya riʼ chkë, y xkiqʼalajsaj chkiwäch jontir chë ryeʼ majun ta jun kitinamit chqä chë xa najin yeqʼaxan äl chwäch le Rwachʼlew. 16 Ye kʼa komä kan nkitäj kiqʼij rchë nkïl jun tinamït ri akuchï más ütz yejeʼ wä, ntel chë tzij, jun tinamït ri rchë ri kaj. Rma riʼ, Dios ma nkʼïx ta kimä ryeʼ o rma nkiʼij kiDios che rä, rma ruchojmin chik jun tinamït rchë nuyaʼ chkë. 17 Rma ri rkʼuqbʼäl kʼuʼx, taq Abrahán xbʼix che rä chë tkamsaj rkʼajol, ryä achiʼel ta kan xyaʼ rkʼajol che rä Dios [...] 24 Rma ri rkʼuqbʼäl kʼuʼx, taq Moisés ya xnmär qʼanäj, ma xrajoʼ ta xbʼix ral ri rmiʼal faraón che rä. 25 Pa rkʼexel riʼ ryä kan xchaʼ xtäj poqän rkʼë rtinamit Dios chwäch ri nunaʼ jbʼaʼ ri kiʼkʼuxlal nuyaʼ ri mak, 26 rma chwäch ryä más wä nüm rqʼij ri xchaʼöx rma Dios, tapeʼ xtäj poqän, ke chwäch ri bʼeyomäl ri kʼo Egipto; rma ryä kan ryaʼon wä ran chrij ri utzil xtrïl apü. 27 Rma ri rkʼuqbʼäl kʼuʼx, xyaʼ qa Egipto y ma xxiʼij ta riʼ chwäch ri qʼatöy tzij tapeʼ xkatäj ryowal chrij. Ryä kan kuw xpaʼeʼ rma kan achiʼel ta xtzʼët Dios, ri ma tzʼetel ta. 31 Rma ri rkʼuqbʼäl kʼuʼx, Rahab —jun ixöq ri rkʼwan jun tzʼil kʼaslemal— ma xkäm ta kikʼë ri winäq ri ma xenman ta tzij, rma kan ütz kikʼulik xuʼän apü chkë ri kaʼiʼ achiʼaʼ ri xebʼenachan qa pa tinamït. 32 ¿Y achkë chik más xtinbʼij chiwä? Rma ma xtqʼiʼ ta ntiempo si xtintzjoj chiwä chrij Gedeón, Barac, Sansón, Jefté chqä David, y chrij Samuel chqä chkij ri nkʼaj chik profetas. 33 Rma ri kikʼuqbʼäl kʼuʼx xechʼakon chkij nmaʼq qʼatöy taq tzij, xkiʼän chë kan pa rbʼeyal nbʼan ronojel, xkïl ri xtzuj chkë, xekowin xkitzʼapij kichiʼ köj, 34 xkiʼän chë ri qʼaqʼ ma xerkʼät ta, xeʼanmäj chwäch rey ri espada, xkïl kichqʼaʼ taq majun ta wä chik kichqʼaʼ, xjeʼ kowan kichqʼaʼ chkipan nmaʼq taq chʼaʼoj chqä xkiʼän chë ri ejércitos ri xeʼok apü chwäch ri kitinamit xeʼanmäj äl.