Santiago

2 Qonojel röj kan kʼïy mul nqsach. Ri winäq ri majun bʼëy nsach ta taq ntzjon, ya riʼ jun winäq ri majun mak chrij y xtkowin chqä xtqʼät ronojel ri rchʼakul. 3 Taq yeqayaʼ chʼichʼ pa kichiʼ ri kej rchë nkinmaj qatzij, nqaʼän chqä chë kichʼakul nbʼä akuchï nqajoʼ wä röj. 4 Titzʼetaʼ chqä ri nbʼanatäj kikʼë ri barcos: tapeʼ kan ye nmaʼq y yenim kimä kaqʼiqʼ ri kowan kichqʼaʼ, xa jun koʼöl timón nkʼwan kichë y ri nsmajin ri timón yerkʼwaj akuchï nrajoʼ wä ryä. 5 Ke riʼ chqä nbʼanatäj rkʼë ri qaqʼ: tapeʼ xa jun koʼöl peraj che rä ri qachʼakul, nuʼän chë yeqaʼij tzij ri nkikʼüt chë xa nqanaʼ qiʼ. Y rïx itaman chë xa jun koʼöl qʼaqʼ nkowin nukʼät jun mamaʼ kʼechelaj. 6 Ri qaqʼ kan achiʼel ri qʼaqʼ. Ri qaqʼ ya riʼ jun chkë ri peraj che rä ri qachʼakul ri más nbʼanö itzelal, rma nutzʼilbʼisaj jontir ri qachʼakul y, rma rkʼë ri Gehena ntel wä pä rqʼaqʼ, kan nutzʼlaʼ rkʼaslemal jun winäq kan achiʼel ta nukʼät. 8 Ye kʼa majun ta jun winäq nkowin nutjoj raqʼ. Ri qaqʼ ma nqkowin ta nqaqʼïl y kan nuʼän itzelal; kan achiʼel ta nujnäq rkʼë veneno ri nkamsan. 13 ¿Kʼo jun chiwä rïx ri kan kʼo rnaʼoj chqä kan nqʼax chwäch ri najin nbʼij chiwä? Tkʼutuʼ rkʼë rbʼanobʼal chë ma qʼaqʼ ta rjolon rma kan kʼo rnaʼoj. 14 Ye kʼa, we rïx kan itzel ninaʼ chkë ri nkʼaj chik chqä xa xuʼ chʼaʼoj niwajoʼ, ma tiʼij ta kʼa che kan ütz inaʼoj nixta titzʼük tzij. 15 Re naʼoj reʼ ma chkaj ta petenäq wä, xa kan ya riʼ kinaʼoj ri winäq, ri chköp chqä ri demonios. 17 Ye kʼa ri naʼoj ri petenäq chlaʼ chkaj kan chʼajchʼöj y nuʼän chë ma njeʼ ta chʼaʼoj chkikojöl ri winäq, chë naquʼ kij ri nkʼaj chik, chë yanman tzij, chë najyowaj kiwäch ri winäq chqä chë yeʼaʼän utziläj taq bʼanobʼäl; y ma nuʼän ta chë yeʼachaʼ ri winäq nixta chë xa kaʼiʼ apaläj naʼän. 18 Chqä ri naʼoj ri nwachin rkʼë ri chojmilal ntzʼetetäj taq majun ta chʼaʼoj. Ri yetoʼon rchë nbʼanatäj riʼ, ya riʼ ri winäq ri yetoʼon rchë ma njeʼ ta chʼaʼoj chkikojöl ri nkʼaj chik.