Génesis

6 Ye kʼa taq xekʼiyär ri achiʼaʼ chwäch le Rwachʼlew chqä xejeʼ kimiʼal, 2 ri ralkʼwal ri kʼaslïk Dios xkitzʼët chë ri kimiʼal ri achiʼaʼ kan jaʼäl yetzuʼun. Rma riʼ xekʼleʼ kikʼë xa bʼa jaruʼ xkajoʼ ryeʼ. 3 Y Jehová xuʼij: «Ma ronojel ta mul xtinköchʼ ri nkiʼän ri winäq, rma xa ye poqlaj. Rma riʼ, xa xuʼ chik 120 jnaʼ xkejeʼ». 4 Ri nefilim ye kʼo wä chik chwäch le Rwachʼlew chkipan qa ri qʼij riʼ, y kʼa xejeʼ na chkij ri qʼij riʼ. Chkipan qa ri qʼij riʼ, ri ralkʼwal ri kʼaslïk Dios xejeʼ kikʼë ri kimiʼal ri achiʼaʼ y xejeʼ kalkʼwal kikʼë. Ri winäq riʼ ya riʼ xeʼok ri achiʼaʼ ri kan xtamatäj kiwäch ojer chqä kan kowan wä kichqʼaʼ kʼo. 5 Y Jehová xtzʼët chë ri itzel taq winäq najin wä yekʼiyär chwäch le Rwachʼlew chqä chë ri winäq riʼ xa xuʼ wä itzelal kʼo pa kan. 6 Rma riʼ Jehová kan xbʼison rma xuʼän ri achï chwäch le Rwachʼlew; ryä kan kowan xtiʼon ran. 7 Rma riʼ, Jehová xuʼij: «Xtinchüp kiwäch ri winäq chwäch le Rwachʼlew, xtinchüp kiwäch ryeʼ chqä ri chköp ri ma ye rchë ta kʼechelaj, ri chköp ri xa nkiqererej kiʼ chqä ri yexikʼan, rma kan ntzolij wiʼ xenbʼän». 8 Ye kʼa Noé kan ütz xtzʼet rma Jehová. 9 Ya reʼ xbʼanatäj pa rkʼaslemal Noé. Noé xok jun achï ri xkʼwaj jun jïk kʼaslemal. Chkikojöl ri winäq ri xejeʼ pa rqʼij qa ryä, Noé kan majun mak xelitäj ta chrij. Ryä achiʼel ta kan xbʼiyïn rkʼë ri kʼaslïk Dios. 10 Xqʼax ri tiempo, Noé xejeʼ ye oxiʼ rkʼajol ri xkibʼiniʼaj Sem, Cam chqä Jafet. 11 Ye kʼa ri kʼaslïk Dios xtzʼët chë le Rwachʼlew xchaʼ chiʼ chqä ryon itzelal nbʼan chwäch. 12 Y kan ke riʼ xbʼanatäj, Dios xtzʼët le Rwachʼlew y xtzʼët chë kan xchaʼ chiʼ. Jontir ri winäq chwäch le Rwachʼlew kikʼwan wä jun itzel kʼaslemal. 13 Ya riʼ taq Dios xuʼij che rä Noé: «Xtinchüp rwäch jontir ri kʼo kikʼaslemal, rma kimak ri winäq le Rwachʼlew ryon itzelal nbʼan chwäch. Rma riʼ xtinchüp kiwäch chqä xtinchüp rwäch jontir ri kʼo chwäch le Rwachʼlew. 14 Tabʼanaʼ jun arca rkʼë cheʼ ri kʼo rqʼolil rchë yajeʼ chpan. Tajachaʼ rpan y tayaʼ alquitrán chrij chqä chpan. 15 Ke reʼ tabʼanaʼ che rä: kʼo chë 300 codos nuʼän raqän, 50 codos rwäch chqä 30 codos rjtolen; 16 kʼo chë oxiʼ niveles nuʼän rpan: naʼäy, rkaʼn chqä rox; jun codo ma napon kʼa pa rwiʼ ri arca kʼo chë nayaʼ qa jun ventana rchë ntok apü qʼij, y rchiʼ ri arca kʼo chë nayaʼ xa bʼa akuchï che rä ri peraj ri más nüm rchë ri arca. 17 Rïn xtinbʼän chë xtbʼanatäj jun mamaʼ qʼeqäl jöbʼ ri xtnujsaj le Rwachʼlew chqä xtchüp rwäch xa bʼa achkë ri kʼo chuxeʼ le kaj chqä ri kʼo rkʼaslemal. Jontir ri kʼo chwäch le Rwachʼlew xkekäm. 18 Rïn najin nbʼän jun jikibʼäl tzij awkʼë rït. Rït chqä ri awixjayil, ri oxiʼ akʼajol chqä ri kixjayil kʼo chë yixok chpan ri arca. 19 Chqä kʼo chë yeʼaksaj apü chpan ri arca jun kʼlaj chkë xa bʼa achkë kiwäch chköp —jun achij chqä jun ixöq— rchë ma yekäm ta. 20 Kakaʼ chkë jontir kiwäch chköp ri yexikʼan, kakaʼ chkë jontir kiwäch chköp ri ma ye rchë ta kʼechelaj chqä kakaʼ chkë jontir kiwäch chköp ri nkiqererej kiʼ xkeʼapon akuchï yït kʼo wä rït chqä xkeʼok chpan ri arca rchë ma nkʼis ta kiwäch. 21 Rït chqä kʼo chë namöl jontir kiwäch rkïl wäy chqä nayaʼ äl chpan ri arca rchë ke riʼ kʼo xtatäj rït chqä kʼo xtkitäj ri chköp». 22 Noé kan xuʼän jontir ri xchlaʼej Dios che rä. Kan xuʼän achiʼel xuʼij ryä che rä.