Génesis

8 Kʼa riʼ Judá xuʼij che rä ri rtataʼ: «Tataqaʼ äl ri akʼajol wkʼë rïn chqä tayaʼ qʼij rchë nqbʼä, rchë chë röj, rït chqä ri qalkʼwal xtqkʼaseʼ, y ma xtqkäm ta. 9 Ri nkʼaslemal rïn xtinyaʼ pa rkʼexel ri rkʼaslemal ryä, chqä rïn xkitojö we kʼo xtbʼanatäj rkʼë. We ma xtinkʼän ta pä chawä rchë natzʼët chik jmul rwäch, rïn xinbʼän kʼa riʼ jun mamaʼ mak chawä rchë ronojel nkʼaslemal. 10 Ye kʼa ma ta xqayaʼ qʼij chë xeqʼax kʼïy qʼij, ya yoj bʼenäq ta chik y yoj petenäq ta chik kaʼiʼ mul». 13 Tikʼwaj äl ri ichaqʼ y jäx kʼa, kixtzolin rkʼë ri achï. 14 Y ri Dios, ri kʼo ronojel uchqʼaʼ pa rqʼaʼ, xtuʼän ta kʼa chë ri achï xtjyowaj iwäch, ke riʼ xtyaʼ pä qʼij chë ntzolin pä ri jun chik iwachʼalal chqä Benjamín. ¡Ye kʼa rïn, we majun chik walkʼwal xkekanaj ta qa, kan ke riʼ kʼa riʼ tubʼanaʼ!». 26 Taq José najin wä ntok pa rachoch, xkiyaʼ ri spanïk che rä chqä xkiqasaj kiʼ kʼa pa ilew chwäch. 27 Chrij riʼ, ryä xkʼutuj chkë we ütz kiwäch chqä xuʼij chkë: «¿Achkë rbʼanon ri itataʼ, ri achï ri kʼo chik rjnaʼ ri itzjon chwä? ¿Kʼa kʼäs na?». 28 Ryeʼ xkiʼij che rä: «Ri asamajel, ri qatataʼ, ütz rwäch. Ryä kʼa kʼäs na». Chrij riʼ xkiqasaj kiʼ kʼa pa ilew. 29 Y taq José xtzʼët Benjamín ri rchaqʼ, ri jnan kiteʼ rkʼë, ryä xuʼij: «¿Ya reʼ ri ichaqʼ, ri más kʼajol chiwäch rïx ri itzjon chwä?». Y xuʼij che rä Benjamín: «Yë ta kʼa Dios ri xtyaʼö utzil pan awiʼ walkʼwal». 30 José kan janina xel rkʼuʼx taq xtzʼët rchaqʼ, y rma riʼ kʼo chë chaninäq xel äl kikʼë rchë xkanuj akuchï xbʼeʼoqʼ wä. Y xok chpan jun jay ri akuchï majun achkë kʼo y kan xchäp oqʼej.