Salmos

139 NDios Jehová, rït atzʼeton achkë qäs kʼo pa wan y ataman nwäch. 2 Rït ataman ajän taq yitzʼuyeʼ chqä taq yikatäj äl. Kan kʼa näj yakowin natzʼët pä achkë ri nchʼöbʼ. 3 Yinatzʼët taq yibʼiyaj y taq yipneʼ; ataman jontir ri yenbʼän. 4 Kan kʼa majanä tinbʼij jun tzij, ye kʼa rït Jehová ya ataman chik jontir. 5 Rït yït kʼo wkʼë rchë yinachajij, y nayaʼ aqʼaʼ pa nwiʼ. 6 Rïn ma nqʼax ta chi nwäch jontir ri ataman rït. Kan kowan kʼïy ataman, y rïn ma nqʼax ta jontir riʼ chi nwäch. 8 Xa ta rïn xkibʼä chkaj, chriʼ xkajeʼ wä rït, y, xa ta xkibʼä chpan ri Jül, kan chriʼ chqä xkajeʼ wä. 14 Nyaʼ aqʼij rma kan jaʼäl rbʼanik abʼanon qa chwä. Kan jaʼäl abʼanon qa che rä jontir; y ya riʼ kan ntaman rïn. 16 Ri rnaqʼ awäch xinkitzʼët taq majanä wä kinaläx; jontir ri peraj rchë nchʼakul kan ye tzʼibʼatäl wä chik chpan awuj —yajün ri qʼij taq xtkitün kiʼ— tapeʼ majanä wä kejeʼ. 23 Nimaläj nDios, tanukʼuj jontir ri yenbʼän y tatzʼetaʼ achkë qäs kʼo pa wan. Tanukʼuj jontir ri yenchʼöbʼ y tatzʼetaʼ achkë nbʼanö chwä chë nchʼpü nkʼuʼx. 24 Tatzʼetaʼ we kʼo jun ma ütz ta nwajoʼ nbʼän, y kinakʼwaj chpan ri bʼey ri xkirkʼwaj chpan ri kʼaslemal ri majun bʼëy xtkʼis ta.