Isaías

13 Rma kʼa riʼ, ya reʼ ri nuʼij Jehová, ri Nimaläj Qʼatöy Tzij: «¡Titzʼetaʼ! Ri nsamajelaʼ xkewaʼ, ye kʼa rïx xtitäj nmïk. ¡Titzʼetaʼ! Ri nsamajelaʼ xtkiqüm kiyaʼ, ye kʼa rïx xtinaʼ chaqiʼj chiʼ. ¡Titzʼetaʼ! Ri nsamajelaʼ xtkinaʼ kiʼkʼuxlal, ye kʼa rïx xttzaq ikʼïx. 14 ¡Titzʼetaʼ! Ri nsamajelaʼ rkʼë kiʼkʼuxlal xtkiräq kichiʼ rma majun ta tiʼowen pa kan, ye kʼa rïx xtiräq ichiʼ rma ntiʼon iwan chqä xtiräq ichiʼ rma sokotajnäq iwan. 16 ya riʼ xtuʼän chë xa bʼa achkë winäq ri nrajoʼ nyaʼöx utzil pa rwiʼ chwäch le Rwachʼlew, xtyaʼöx utzil pa rwiʼ rma ri Dios ri ma ntzʼukü ta tzij; y xa bʼa achkë winäq ri xtjikbʼaʼ rtzij chwäch le Rwachʼlew, xtjikbʼaʼ rtzij pa rbʼiʼ ri Dios ri ma ntzʼukü ta tzij. Rma ri kʼayewal ri xebʼanatäj ojer kan xkemestäx; rïn kan ma xkentzʼët ta chik. 17 Rma rïn xtinbʼän jun kʼakʼakʼ kaj chqä jun kʼakʼakʼ Rwachʼlew; y ri xebʼanatäj ojer ma xkenatäx ta chik nixta xkeʼapon pan iwan. 18 Rma riʼ, kiʼ ikʼuʼx tibʼanaʼ chqä ronojel mul kiʼ ikʼuʼx kixjeʼ rma ri xkenbʼän. Rma rïn xtinbʼän chë Jerusalén chqä rwinaq xtkiʼän chwä chë kan kiʼ nkʼuʼx xtinbʼän. 19 Y kan kiʼ nkʼuʼx xtinbʼän rma Jerusalén, kan kiʼ nkʼuʼx xtinbʼän rma ntinamit; majun bʼëy chik xtkʼaxatäj ta oqʼej chpan o winäq ri nkiräq kichiʼ rma kowan yebʼison». 20 «Chriʼ ma xkejeʼ ta chik taq neʼy ri xa xuʼ jun kayoxiʼ qʼij xkekʼaseʼ nixta rij taq winäq ri ma ta xtkikʼïs ri jnaʼ rchë kirijxik. Rma ri winäq ri xtkäm, tapeʼ kʼo chik 100 rjnaʼ, ryä xa achiʼel ta jun ti akʼal xttzʼetetäj kimä ri nkʼaj chik, y ri winäq ri xtmakun, xttaq itzel chrij tapeʼ kʼo chik 100 rjnaʼ. 21 Ryeʼ xkekiyäk jay chqä xkejeʼ chpan; xkekitïk uva y xtkitäj rwäch. 22 Ma xkekiyäk ta jay rchë chë nkʼaj chik yejeʼ chkipan; ma xketkonäj ta rchë chë nkʼaj chik yetjö rwäch. Rma ri qʼij ri xkekʼaseʼ ri winäq ri ye kʼo chpan ntinamit, xtuʼän achiʼel ri qʼij ri nkʼaseʼ jun cheʼ; y ri yenchaʼon, kan xtkinaʼ kiʼkʼuxlal rma ri samaj xtkiʼän. 23 Ma chaq tzij ta xtkitäj kiqʼij pa samaj chqä ma xkejeʼ ta kalkʼwal rchë nkibʼetjaʼ poqän, rma ryeʼ chqä ri kalkʼwal ya riʼ ri molaj winäq ri yaʼon utzil pa kiwiʼ rma Jehová. 24 Rïn kan xtinyaʼ ri nkʼatzin chkë tapeʼ majanä tkikʼutuj kitoʼik chwä; kan xkentoʼ tapeʼ kʼa najin na yetzjon. 25 Ri lobo chqä ri aläj karneʼl kan jnan xkewaʼ, ri köj xttäj qʼayis kan achiʼel nuʼän jun achij wakx, y ri kumätz xa poqlaj xttok rway. Ryeʼ majun xtkitzʼlaʼ ta chwäch ri loqʼoläj njyuʼ», ke riʼ nuʼij Jehová.