Romanos

9 Rma, si rkʼë achiʼ naʼij chkiwäch ri winäq chë Jesús ya riʼ ri Ajaw y rkʼë ronojel awan nakʼuqbʼaʼ akʼuʼx chë Dios xkʼasoj pä chkikojöl ri kamnaqiʼ, xkakolotäj. 10 Rma rkʼë qan nqakʼüt ri qakʼuqbʼäl kʼuʼx ri nqekʼwan pa jun chöj kʼaslemal, ye kʼa rkʼë ri qachiʼ nqatzjoj ri utziläj taq rtzjol ri nyaʼö kolotajïk. 11 Rma ri Tzʼibʼatäl qa nuʼij: «Majun ta jun ri nukʼuqbʼaʼ rkʼuʼx chrij ryä xtyaʼöx qa pa bʼis». 12 Rma jun judío y jun griego xa jnan kibʼanik. Jontir xa jun Kajaw, ri janina nspan kikʼë jontir ri nkiskʼij rbʼiʼ. 13 Rma «xa bʼa achkë ri xtskʼin rbʼiʼ Jehová xtkolotäj». 14 Ye kʼa, ¿achkë komä rbʼanik xtkiskʼij rbʼiʼ we ma kikʼuqbʼan ta kikʼuʼx chrij? ¿Y achkë komä rbʼanik xtkikʼuqbʼaʼ kikʼuʼx chrij we majun kikʼoxan ta chrij? ¿Y achkë komä rbʼanik xtkikʼoxaj chrij we majun ta jun nyaʼö rtzjol chkë? 15 ¿Y achkë komä rbʼanik xtkiyaʼ rtzjol we majun ta jun taqayon kichë? Achiʼel wä tzʼibʼatäl qa: «¡Kan jaʼäl kaqän ri nkitzjoj ri utziläj taq rtzjol!». 16 Ye kʼa, ma jontir ta xkinmaj ri utziläj taq rtzjol, rma riʼ Isaías xuʼij: «Jehová, ¿achkë komä rkʼuqbʼan rkʼuʼx chrij ri nqatzjoj?». 17 Reʼ nukʼüt chë jun winäq njeʼ rkʼuqbʼäl kʼuʼx rma ri naʼoj yerkʼoxaj, y ri naʼoj riʼ ye petenäq rkʼë ri nbʼix chrij ri Cristo.