Santiago

5 Tikʼoxaj qachʼalal. ¿Ma xerchaʼ ta komä Dios ri winäq ri majun ta kiqʼij chwäch ri nkʼaj chik rchë yebʼeyomär rkʼë kikʼuqbʼäl kʼuʼx chqä xkeʼok chpan Rqʼatbʼäl Tzij ri xtzuj qa chkë ri yejowan rchë? 13 Rma ri winäq ri ma nupoqonaj ta kiwäch ri nkʼaj chik, ryä kan ma xtpoqonäx ta rwäch taq xtqʼat tzij pa rwiʼ. 17 Ke riʼ chqä jun winäq, we ryä rkʼuqbʼan rkʼuʼx chrij Dios, ye kʼa ma nukʼüt ta rkʼë ri yeruʼän, ri rkʼuqbʼäl kʼuʼx achiʼel ta xa kamnäq. 18 Ye k’a kʼo jun xtbʼin: «Rït nakʼuqbʼaʼ akʼuʼx chrij Dios y rïn kʼo samaj nbʼanon. Takʼutuʼ pä chë rït nakʼuqbʼaʼ akʼuʼx chrij Dios tapeʼ majun samaj abʼanon y rïn xtinkʼüt chë nkʼuqbʼaʼ nkʼuʼx chrij Dios rkʼë nsamaj». 21 ¿Ma xbʼix ta kʼa chë Abrahán, ri qatataʼ, kan chöj rkʼaslemal taq xtzüj yän apü Isaac, ri rkʼajol, pa rwiʼ ri altar? 22 Natzʼët kʼa chë ri rkʼuqbʼäl kʼuʼx xqʼalajin rkʼë ri xeruʼän chqä chë kan xtzʼaqät ri rkʼuqbʼäl kʼuʼx rma ri xeruʼän. 23 Ke riʼ rbʼanik xtzʼaqät re peraj reʼ che rä ri Tzʼibʼatäl qa: «Abrahán xkʼuqbʼaʼ rkʼuʼx chrij Jehová, rma riʼ kan chöj rkʼaslemal xtzʼet rma ryä». Y xbʼix rchiʼil Jehová che rä. 24 Rkʼë ya reʼ nitzʼët chë yë ri yeruʼän jun winäq nbʼanö chë jïk rkʼaslemal xttzʼet rma Dios y ma xa xuʼ rma rkʼuqbʼan rkʼuʼx chrij. 25 Ke riʼ chqä xbʼanatäj rkʼë Rahab, ri ixöq ri xkʼwaj jun tzʼil kʼaslemal. ¿Ma xbʼix ta komä chrij ryä chë kan jïk rkʼaslemal xtzʼet rma Dios rma ri xuʼän taq xerkʼül ri kaʼiʼ achiʼaʼ chrachoch chqä xertäq äl jkʼan chik? 26 Rma riʼ, achiʼel qachʼakul xa kamnäq we majun ta rxlaʼ yaʼ chpan, ke riʼ chqä ri qakʼuqbʼäl kʼuʼx we ma nqakʼüt ta rkʼë qabʼanobʼal.