Romanos

2 Jun tzʼetbʼäl, we Abrahán kan jïk rkʼaslemal xtzʼet rma Dios rma ri xeruʼän, ryä kʼo rma xnaʼ ta riʼ, tapeʼ ma chwäch ta Dios. 3 Rma, ¿achkë nuʼij chpan ri Loqʼoläj taq Wuj? «Abrahán xkʼuqbʼaʼ rkʼuʼx chrij Jehová, rma riʼ kan chöj rkʼaslemal xtzʼet rma ryä». 4 Ri päq ri ntoj che rä jun winäq ri nsamäj ma nspäx ta che rä, rma kan ya riʼ ri xchʼäk ryä. 5 Ye kʼa ri winäq ri tapeʼ ma kan ta achkë ri yeruʼän ye kʼa nukʼuqbʼaʼ rkʼuʼx chrij Dios, ri nkowin nuʼij chë ri winäq ri ma nuyaʼ ta rqʼij rkʼwan jun jïk kʼaslemal chwäch, ri winäq riʼ kan jïk rkʼaslemal xttzʼet rma ryä. 6 David chqä xuʼij chë kiʼ rkʼuʼx ri winäq ri ma yë ta ri yeruʼän nbʼanö chë jïk rkʼaslemal xttzʼet rma Dios. Ryä xuʼij: 7 «Kan kiʼ kikʼuʼx ri winäq ri xmestäx yän ri ma ütz ta xekiʼän chqä ri xkuy yän kimak; 8 kan kiʼ rkʼuʼx ri winäq ri xtmestäx rmak rma Jehová». 11 Chqä xbʼix che rä chë ri circuncisión xtkʼüt chë ryä xkʼwaj jun jïk kʼaslemal rma xkʼuqbʼaʼ rkʼuʼx chrij Dios taq ma bʼanon ta wä circuncidar. Ya riʼ xbʼanatäj rchë xok kitataʼ jontir ri kikʼuqbʼan kikʼuʼx chrij Dios tapeʼ ma ye bʼanon ta circuncidar, rchë ke riʼ xtkikʼwaj jun jïk kʼaslemal chwäch Dios. 12 Xbʼanatäj chqä riʼ rchë ryä xok kitataʼ ri yebʼanon circuncidar. Ye kʼa ryä ma xa xuʼ ta xok kitataʼ ri nkiʼij chë nkʼatzin ri circuncisión, xa kan xok chqä kitataʼ ri nkikʼän kinaʼoj chrij ri qatat Abrahán ri xkʼuqbʼaʼ rkʼuʼx chrij Dios taq ma bʼanon ta wä circuncidar. 17 (Achiʼel tzʼibʼatäl qa: «Rïn xtinbʼän chë xkatok kitataʼ ye kʼïy winäq»). Ya reʼ xbʼanatäj chwäch Dios —ri achoq chrij xkʼuqbʼaʼ wä rkʼuʼx Abrahán—, chwäch ri nuyaʼ kikʼaslemal ri kamnaqiʼ y ntzjon chrij ri majanä kebʼanatäj achiʼel ta kan xebʼanatäj yän. 18 Tapeʼ ma rtaman ta wä achkë xtbʼanatäj kikʼë, ryä kan xkʼuqbʼaʼ rkʼuʼx chrij ri ryoʼen apü chqä kan xyaʼ chwäch ran chë xttok kitataʼ ye kʼïy winäq, kan achiʼel wä bʼin qa chrij: «Kan ke riʼ chqä xtbʼerbʼanaʼ ri ajatzul rït». 19 Y tapeʼ ma xkʼis ta rkʼuqbʼäl kʼuʼx, ryä xtzʼët chë rchʼakul achiʼel ta kamnäq wä chik (rma ryä kʼo wä chik jun 100 rjnaʼ) chqä chë Sara ma nkowin ta wä yejeʼ ral. 20 Ye kʼa, rma ri rtzjun qa Dios che rä, ryä ma xuʼän ta kaʼiʼ rkʼuʼx. Pa rkʼexel riʼ, ryä kan xjeʼ rchqʼaʼ rma rkʼuqbʼäl kʼuʼx, rma riʼ kan xyaʼ rqʼij Dios 21 chqä kan xyaʼ chwäch ran chë Dios nkowin nuʼän ri xtzüj che rä. 22 Rma riʼ, «kan jïk rkʼaslemal xtzʼet rma ryä». 23 Ye k’a ri tzij «xtzʼet» ma xa xuʼ ta chrij ryä xbʼix wä, 24 ya riʼ chqä xtbʼix chqij röj taq Dios xttzʼët chë qakʼwan jun jïk kʼaslemal chwäch rma nqanmaj chrij ryä, ri xkʼasoj pä ri Qajaw Jesús chkikojöl ri kamnaqiʼ.