Apocalipsis

4 Y xinkʼoxaj jaruʼ xyaʼöx ketal: 144,000 winäq ri ye alenäq pä chkipan ri kijatzul ri ye ralkʼwal Israel. 9 Chrij riʼ, rïn xintzʼët jun molaj winäq ri majun ta jun achï nkowin nejlan kichë. Ri winäq riʼ ye alenäq wä pä chkipan jalajöj taq tinamït, ijatzul chqä jalajöj chʼaʼäl yetzjon. Ryeʼ yepaʼäl wä chwäch ri trono chqä chwäch ri Aläj Karneʼl, y kiksan wä säq taq tzyäq ri nmaʼq kaqän chqä kikʼwan wä rxaq palmeras pa kiqʼaʼ. 10 Y kan rkʼë kuw kichʼaʼäl najin wä nkiʼij: «¡Ri qakolotajik nqatyoxij che rä ri qaDios, ri tzʼyül chpan ri trono, chqä che rä ri Aläj Karneʼl!». 13 Ya riʼ taq jun chkë ri ukʼwäy taq bʼey xkʼutuj chwä: «¿Achkë kʼa laʼ ri molaj winäq ri kiksan säq taq tzyäq ri nmaʼq kaqän? ¿Y akuchï xeʼel wä pä?». 14 Rma riʼ, rïn kan chanin xinbʼij apü che rä: «Wajaw, yït rït ri yït tamayon riʼ». Ya riʼ taq ryä xuʼij chwä: «Le winäq laʼ ya laʼ ri yekolotäj qa chpan ri nimaläj tijöj poqonal; ryeʼ kan kichʼajon chqä kisaqirsan chik kitzyaq ri nmaʼq kaqän chpan ri rkikʼel ri Aläj Karneʼl. 15 Rma riʼ ye kʼo chwäch rtrono Dios chqä nkiyaʼ rqʼij paqʼij chë chaqʼaʼ pa rtemplo. Y ri tzʼyül chpan ri trono kan xkerchajij. 16 Ma xtkiqʼaxaj ta chik wayjal chqä chaqïj chiʼ; chqä ma xketzʼil·öx ta chik rma ri qʼij nixta rma jun qʼaqʼ ri janina rchqʼaʼ. 17 Rma ri Aläj Karneʼl, ri kʼo pa rnikʼajal ri trono, xtyuqʼun kichë chqä xkerkʼwaj äl kʼa akuchï ye kʼo wä ri yaʼ ri yeyaʼö kʼaslemal. Y Dios xtsuʼ ryiʼal ri rnaqʼ kiwäch».