Hebreos

10 Rma ri Pixaʼ xa rmujal ri utzil xkeqïl chqawäch apü ye kʼa ma kan ta ya riʼ ri utzil riʼ, majun bʼëy xtkowin ta xtuʼän chë ri winäq ri yejelun rkʼë Dios xttel qa ri mak chkij kikʼë ri sacrificios ri yebʼan ronojel jnaʼ. 2 Xa ta ke riʼ, ma ta nkʼatzin chik yebʼan sacrificios, rma ri yeyaʼö ri sacrificios riʼ —rma ya xechʼajchʼobʼëx— ma xttiʼon ta chik kan rma ri kimak. 3 Ye kʼa ri sacrificios riʼ ronojel jnaʼ nunataj chkë chë xa yemakun, 4 rma kikikʼel ri achij taq wakx chqä ri kʼsïkʼ ma nuchüp ta kimak. 5 Rma riʼ taq ryä xpë chkikojöl ri winäq, xuʼij: «‹Ma xawajoʼ ta sacrificios nixta spanïk, ye kʼa xayaʼ jun nchʼakul. 6 Ma xakʼän ta ri spanïk ri xeporöx chawäch nixta ri spanïk rchë kuyubʼäl mak›. 7 Rma riʼ xinbʼij: ‹Rïn xipë (chpan ri rollo tzʼibʼan chwij rïn) rchë nbʼän ri nawajoʼ rït, ri nDios›». 10 Rma ri nrajoʼ Dios, xqchʼajchʼobʼëx rma rchʼakul Jesucristo, ri xa jmul xtzuj apü chwäch Dios. 12 Ye kʼa Cristo xa jmul xyaʼ rkʼaslemal pa qawiʼ rma qamak chqä xbʼetzʼyeʼ pa rderecha Dios, 19 Rma riʼ qachʼalal, rma rkikʼel Jesús, ya qakʼuqbʼan chik qakʼuʼx rchë nqbʼä chpan ri bʼey ri nqrkʼwaj ri akuchï kan loqʼoläj wä, 20 jun kʼakʼakʼ y kʼaslïk bʼey ri xjäq ryä chqawäch rchë nqqʼax äl chpan ri cortina, ntel chë tzij, ri rchʼakul. 21 Y rma chë ya kʼo chik jun nimaläj qasacerdote ri yaʼon qa ri rachoch Dios pa rqʼaʼ, 22 kan rkʼë chʼajchʼöj qan chqä rkʼë kʼuqbʼäl kʼuʼx qjelun apü, rma chë ri qaconciencia ya xchʼajchʼobʼëx yän, ma nutzʼilbʼisaj ta chik ri qan; chqä ri qachʼakul xchʼaj yän rkʼë chʼajchʼöj yaʼ. 23 Kan tqatjaʼ qaqʼij rchë nqatzjoj ri qayoʼen apü y ma tuʼän ta kaʼiʼ qakʼuʼx, rma ri achkë xtzjü rchë ma ntzʼukü ta tzij. 24 Y qchʼpü (qchʼobʼon) chkij ri nkʼaj chik rchë nqakʼüt ajowabʼäl chqawäch chqä rchë yeqaʼän utziläj taq bʼanobʼäl. 25 Y ma tqayaʼ ta qa ri qamoloj, achiʼel wä nkiʼän jojun, xa tqakʼuqbʼalaʼ qakʼuʼx chqawäch rma ri qʼij xa naqaj chik kʼo pä. 36 Rma rïx nkʼatzin njeʼ kochʼonïk iwkʼë, rchë chë taq ya xiʼän yän ri rraybʼal ri Dios, xtiwïl ronojel ri rutzujun qa Dios. 37 Rma, xa «jbʼaʼ chik apü», «ri petenäq xtbʼeqä, y ma rnaj ta xtpë». 38 «Ye kʼa ri rkʼwan jun jïk kʼaslemal xtkʼaseʼ qa rma ri rkʼuqbʼäl kʼuʼx», y «we xa nkʼis ri rkʼuqbʼäl kʼuʼx, rïn ma kiʼ ta nkʼuʼx xtinbʼän rkʼë». 39 Ye kʼa röj ma yoj ta jun chkë ri xa nkʼis qa ri kikʼuqbʼäl kʼuʼx chqä nchup kiwäch. Xa yoj jun chkë ri winäq ri kʼo kikʼuqbʼäl kʼuʼx chqä ma nesäx ta kikʼaslemal.