Proverbios

2 Walkʼwal, we rït nanmaj ntzij chqä naloqʼoqʼej ri npixaʼ 4 we ma nayaʼ ta qa rkanuxik reʼ achiʼel ta plata chqä ronojel mul yabʼä chukanuxik achiʼel ta bʼeyomäl ri ye ewatäl, 5 xtatamaj achkë rbʼanik ma xtaqasaj ta rqʼij Jehová chqä xtawïl ri rtamabʼal Dios. 6 Rma yë Jehová nbʼanö chë njeʼ anaʼoj; ryä nbʼanö chë njeʼ atamabʼal chqä rchë nqʼax jontir chawäch. 7 Ryä nuyaʼ kinaʼoj ri winäq ri jïk kikʼaslemal y ntok jun escudo chkiwäch ri kikʼwan jun chöj kʼaslemal. 8 Ryä nutzʼët achkë bʼey kikʼwan ri jïk kikʼaslemal y kan xkerchajij ri ma nkiyaʼ ta qa ryä. 9 Ke riʼ rït xtqʼax chawäch achkë riʼ ri ütz, ri chöj chqä ri kan pa rbʼeyal nbʼan; xtqʼax chawäch achkë bʼey ütz nakʼwaj. 10 Taq ri naʼoj napon pan awan y ri etamabʼäl kan jaʼäl xtatzʼët, 11 ri achʼobʼonik xkaturchajij, ri xtatzʼët achkë ri ütz chqä ri ma ütz ta xkaturköl, 12 y ma xkabʼä ta chpan ri itzel bʼey, xkaturköl chwäch ri achï ri yeruʼij itzel taq tzij, 13 chkiwäch ri yeʼel qa chpan ri ütz bʼey rchë yebʼä chpan ri bʼey ri xa pa qʼequʼn bʼenäq wä, 14 chkiwäch ri nqä chkiwäch nkiʼän ri ma ütz ta —ri kan kiʼ kikʼuʼx nkiʼän ri itzelal chqä ri ma pa rbʼeyal ta yebʼan—, 15 chkiwäch ri ma ütz ta bʼey kikʼwan chqä ye bʼenäq pa jun bʼey ri xa jkʼan chik nbʼä wä. 16 Ri kʼo anaʼoj xkaturköl chwäch ri ixöq ri ma ütz ta rbʼey rkʼwan chqä chwäch ri jaʼäl taq tzij yeruʼij ri ixöq ri rkʼwan jun tzʼil kʼaslemal, 18 Rma ri yeʼok apü pa rachoch xa pa kamïk xkebʼä wä chqä ri rbʼey xa kikʼë ri kamnaqiʼ napon wä. 22 Ye kʼa ri itzel taq winäq kan xtchup kiwäch y ri yeqʼolon kan xkekʼuq äl chwäch le Rwachʼlew.