Números

6 Jehová xuʼij chik ya reʼ che rä Moisés: 2 «Katzjon kikʼë ri israelitas y taʼij reʼ chkë: ‹We jun achï o jun ixöq nuʼij che rä Jehová chë xttok rnazareo, 3 kʼo chë ma nutäj ta vino nixta nkʼaj chik rwäch yaʼ. Ryä kʼo chë ma nutäj ta vinagre ri bʼanon kikʼë uvas nixta vinagres ri bʼanon kikʼë nkʼaj chik yaʼ. Kʼo chë ma nutäj ta ryiʼal uva nixta nutäj uvas chqä pasas. 4 Chpan jontir ri qʼij ri xttok jun nazareo, ryä kʼo chë ma nutäj ta xa bʼa achkë jun ri nbʼan kikʼë uvas, ni uvas ri kʼa ye räx na nixta rij. 5 Chpan jontir ri qʼij ri xttok jun nazareo, ryä kʼo chë ma nuqpij ta rwiʼ. Kʼo chë ntok loqʼoläj chqä nuyaʼ qʼij rchë nkʼïy rwiʼ kʼa taq xtkʼis ri qʼij ri rjachon riʼ pa rqʼaʼ Jehová. 6 Ryä kʼo chë ma njelun ta rkʼë jun kamnäq taq rjachon riʼ pa rqʼaʼ Jehová. 7 Tapeʼ kan rteʼ, rtataʼ, rnmal, rchaqʼ o ranaʼ xtkäm, ryä kʼo chë ma nutzʼilbʼisaj ta riʼ, rma rwiʼ nkʼutü chë ryä rjachon riʼ pa rqʼaʼ rDios. 8 Ryä kan loqʼoläj chwäch Jehová chpan jontir ri qʼij ri xttok jun nazareo. 24 «Yë ta kʼa Jehová xtyaʼö utzil pan awiʼ chqä xkaturchajij. 25 Kan ta ütz xkaturtzʼët Jehová chqä kiʼ rkʼuʼx nuʼän awkʼë. 26 Kan ta xkaturtzʼët pä Jehová chqä xtyaʼ uxlanen pan awan»›. 27 Y ryeʼ kʼo chë nkiʼän chë ri tinamït Israel nukʼwaj nbʼiʼ rchë xtinyaʼ utzil pa rwiʼ».