1 Samuel

25 Xqʼax ri tiempo, Samuel xkäm. Jontir ri winäq aj Israel xkimöl kiʼ rchë xeʼoqʼ chrij, y xkimuq pa tinamït Ramá, ri akuchï kʼo wä rachoch. Chrij riʼ, David xbʼä pa tzʼiran ilew ri rbʼiniʼan Parán. 2 Ye kʼa pa Maón, kʼo wä jun achï ri kowan rbʼeyomal ri ryaʼon wä rchkop pa Carmelo. Ryä ye 3,000 rkarneʼl y ye 1,000 rkʼsïkʼ. Chkipan ri qʼij riʼ, ryä najin wä nresaj kismal rkarneʼl pa Carmelo. 3 Ri achï riʼ, ri rjatzul qa Caleb, rbʼiniʼan wä Nabal, y rxjayil rbʼiniʼan wä Abigaíl, jun ixöq ri kan nuquʼ na ri yeruʼän chqä kan jaʼäl ntzuʼun, ye kʼa rchjil kan itzel rnaʼoj chqä kan itzel ri yeruʼän. 4 Taq David kʼo wä pa tzʼiran ilew, xnaʼej chë Nabal najin wä nresaj kismal rkarneʼl. 5 Rma riʼ, David xuʼij reʼ chkë 10 achiʼaʼ ri ye kʼo rkʼë: «Kixjoteʼ pa Carmelo, tikanuj Nabal y pa nbʼiʼ rïn tikʼutuj che rä achkë rbʼanon. 6 Tiʼij reʼ che rä: ‹Nyoʼej chë kan kʼïy jnaʼ xkakʼaseʼ, chë ütz xttel apü jontir chawäch rït chqä chkiwäch ri ye kʼo pan awachoch chqä chkiwäch jontir ri ye awchë rït. 7 Xinkʼoxaj chë najin nawesaj kismal akarneʼl. Rma riʼ, nwajoʼ nbʼij äl chawä chë taq ri asamajelaʼ ri yeyuqʼun akarneʼl ye kʼo wä qkʼë, ma xeqanäq ta, y majun ta xleqʼäx chkë chkipan ri qʼij ri xejeʼ Carmelo. 8 Takʼutuj chkë ri asamajelaʼ y ryeʼ xtkitzjoj riʼ chawä. Rma riʼ, tabʼanaʼ utzil, ütz kikʼulik tabʼanaʼ chkë ri achiʼaʼ ri yentaqon äl rïn, rma xqapon chkipan ri qʼij ri kan kiʼ kikʼuʼx jontir. Tabʼanaʼ utzil, tayaʼ chkë ri asamajelaʼ chqä chwä rïn David, ri awalkʼwal, xa bʼa achkë ri nuʼij riʼ awan nayaʼ chqë›». 9 Rma riʼ, ri achiʼaʼ ri ye kʼo rkʼë David xejoteʼ chqä xkiʼij che rä Nabal ri rbʼin wä äl David. Taq xkiʼij yän jontir, 10 Nabal xuʼij reʼ chkë ri rsamajelaʼ David: «¿Y achkë riʼ David? ¿Kan achkë nunaʼ riʼ ri rkʼajol Jesé? Kan ye kʼïy samajelaʼ nkʼoxan rïn chë yeʼanmäj äl chkiwäch kajaw. 11 ¿Achkë ta kʼa rma nyaʼ ri kaxlanwäy chqä ri yaʼ ri wchë rïn, chqä ri tiʼäj ri nbʼanon chkë nsamajelaʼ chkë jojun achiʼaʼ ri majun tamayon ta akuchï keʼel wä pä?». 12 Ri achiʼaʼ xetzolin rkʼë David y xkitzjoj che rä jontir ri xuʼij Nabal chkë. 13 Kan xa xuʼ xkʼoxaj riʼ, David xuʼij chkë ri achiʼaʼ ri ye kʼo rkʼë: «¡Tikʼwaj iwespada!». Rma riʼ jontir xkiyaʼ kespada chuxeʼ kipan, y David chqä xuʼän ya riʼ. Jun ye 400 achiʼaʼ xebʼä äl rkʼë, y jun ye 200 xekanaj qa rchë xkichajij ri achkë kʼo kikʼë. 14 Loman najin nbʼanatäj riʼ, jun chkë ri samajel xbʼä rkʼë Abigaíl, ri rxjayil Nabal, rchë xbʼeruʼij che rä achkë xbʼanatäj. Ri samajel xuʼij reʼ: «David, ri kʼo pa tzʼiran ilew, xertäq pä jojun achiʼaʼ rchë xbʼeryaʼ rtzil rwäch ri qajaw, ye kʼa ryä xa xchapon äl chkë chqä xeryöqʼ äl. 15 Ri achiʼaʼ riʼ kan ütz kinaʼoj xkiʼän qkʼë. Majun bʼëy xojkinäq ta, y majun ta xleqʼäx chqë chkipan ri qʼij taq xqjeʼ kikʼë chkiwäch ri jyuʼ. 16 Ryeʼ paqʼij chë chaqʼaʼ xeʼok achiʼel ta jun tzʼaq chqij röj. Ryeʼ xojkichajij ronojel qʼij ri xqjeʼ kikʼë taq najin wä yeqayuqʼuj ri karneʼl. 17 Komä tatzʼetaʼ jbʼaʼ achkë naʼän, rma xa kʼayewal xtpë chrij qajaw chqä chkij jontir ri ye kʼo pa rachoch. Y rït ataman chë ryä kan itzel rnaʼoj y kan ma ütz ta yatzjon rkʼë». 18 Kan xa xuʼ xkʼoxaj ya riʼ, Abigaíl xbʼerkʼamaʼ pä 200 kaxlanwäy, 2 mamaʼ xar vino, 5 karneʼl ri bʼanon chik rbʼanik, 5 seas trigo ri kʼlin chik, 100 pin taq lej ri bʼanon rkʼë pasas chqä 200 pin taq lej ri bʼanon rkʼë higos, y xyaʼ äl chkij jojun bʼür. 19 Chrij riʼ, xuʼij reʼ chkë rsamajelaʼ: «Jäx apü, y rïn xkibʼä äl chiwij». Ye kʼa majun ta xuʼij qa che rä Nabal, ri rchjil. 20 Loman ryä xlan äl chrij jun bʼür chwäch jun peraj che rä ri jyuʼ, David chqä ri rchiʼil yexlan äl chpan jun bʼey ri nbʼerkʼuluʼ riʼ rkʼë ri bʼey ri rkʼamon pä Abigaíl, rma riʼ xkibʼekʼuluʼ kiʼ. 21 David najin wä nuʼij pä reʼ: «Rïn xinchajij jontir ri rchë re achï reʼ chwäch ri tzʼiran ilew, ye kʼa xa majun xkʼatzin wä xinbʼän riʼ. Majun ta xleqʼäx che rä, tapeʼ ke riʼ, itzel rnaʼoj nuʼän wkʼë tapeʼ rïn ütz nnaʼoj xinbʼän rkʼë. 22 We chwaʼq majanä kenkamsaj jontir ri achiʼaʼ ri ye kʼo pa rachoch, yë ta kʼa Dios tyaʼö kʼayewal pa kiwiʼ ri itzel nkinaʼ chwä». 23 Taq Abigaíl xtzʼët David, kan chanin xqä qa chrij ri bʼür y xxkeʼ qa y xqasaj rjolon kʼa pan ilew chwäch David. 24 Chrij riʼ xkʼäq riʼ chrij raqän y xuʼij: «Wajaw, tayaʼ qa ri mak chwij rïn. Tayaʼ qʼij chwä rchë yitzjon awkʼë. Takʼoxaj ri nwajoʼ nbʼij rïn, ri asamajel, chawä. 25 Tabʼanaʼ utzil wajaw, ma tanmaj ta ri nuʼij Nabal. Ri achï riʼ kan itzel rnaʼoj kan achiʼel ntel chë tzij ri rbʼiʼ. Ryä Nabal rbʼiʼ y xa majun ta rnaʼoj. Ye kʼa rïn, ri asamajel, ma xintzʼët ta taq xeʼapon ri achiʼaʼ ri xeʼatäq äl rït. 26 Y komä, wajaw, rma Jehová chqä rït kan yïx kʼäs, yë Jehová najin yaqʼatö rchë ma natzolij ta rkʼexel ri xbʼan chawä chqä rchë ma yatok ta ajmak chwäch xa rma xakamsan. Kan xtbʼanatäj ta kʼa kikʼë ri itzel nkinaʼ chawä chqä ri nkajoʼ yatkitzʼlaʼ kan achiʼel xtbʼanatäj rkʼë Nabal. 27 Y komä, wajaw, tayaʼ qʼij chë ri achiʼaʼ ri ye petenäq awkʼë nkikʼän ri spanïk ri nkʼamon pä rïn chawä. 28 Tabʼanaʼ utzil, takyuʼ nmak we rïn, ri asamajel, xinbʼän jun ri xa xatursök. Rïn ntaman chë Jehová xtuʼän chë ri ajatzul ma xtchup ta kiwäch, rma rït yeʼaʼän rchʼaʼoj Jehová y majun ta jun itzelal nilitäj chawij chpan akʼaslemal. 29 Wajaw, taq jun winäq xtbʼä chawij chqä xtrajoʼ xkaturkamsaj, Jehová ri aDios achiʼel ta xtkʼöl akʼaslemal chpan ri yaʼl rchë ri kʼaslemal. Ye kʼa ri kikʼaslemal ri winäq ri itzel nkinaʼ chawä achiʼel ta xkerkʼäq äl kan achiʼel nbʼanatäj taq nkʼaq jun abʼäj rkʼë jun honda. 30 Y taq Jehová xtuʼän jontir ri rtzjun chawä chqä xtuʼän qʼatöy tzij chawä pa rwiʼ Israel, 31 ma xtatzolij ta awiʼ chqä ma xttiʼon ta awan rma xatzolij rkʼexel ri xbʼan chawä y rma xakamsan tapeʼ majun rma xaʼän riʼ. Wajaw, taq Jehová xtyaʼ utzil pan awiʼ, ma kinamestaj ta rïn, ri asamajel». 32 Taq xkʼoxaj jontir riʼ, David xuʼij reʼ che rä Abigaíl: «¡Yë Jehová, ri rDios Israel, tyaʼöx rqʼij, rma xaturtäq pä re qʼij reʼ rchë yinabʼekʼuluʼ! 33 ¡Kan nüm aqʼij rma naquʼ na ri achkë yeʼaʼän! Yë ta kʼa Dios xtyaʼö utzil pan awiʼ rma xaʼän chë ma xintzolij ta rkʼexel ri xbʼan chwä chqä chë ma xinok ta ajmak chwäch Dios xa rma xikamsan. 34 Kantzij nbʼij chawä chë, rma Jehová ri rDios Israel, kan kʼäs —ri xuʼän chë ma xatintzʼlaʼ ta—, xa ta ma chanin xapë rchë yatzjon wkʼë, jontir ta ri achiʼaʼ ri ye kʼo pa rachoch Nabal ye kamnäq ta chik chwaʼq taq xsaqirsan qʼanäj». 35 Chrij riʼ David xkʼän jontir ri rkʼamon pä Abigaíl che rä y xuʼij reʼ che rä: «Katzolin chawachoch y majun taquʼ ta. Xinkʼoxaj jontir ri xaʼij chwä y xtinbʼän ri xakʼutuj chwä».