Filipenses

4 Rma riʼ, wachʼalal, rïx ri janina yixinwajoʼ chqä ri kan nrayij yixintzʼët, rïx ri yïx ncorona chqä ri yixbʼanö chë kiʼ nkʼuʼx, kuw tipabʼaʼ iwiʼ chpan rchʼaʼäl Dios achiʼel wä nbʼin pä chiwä. 2 Chiwä rïx Evodia chqä Síntique tibʼanaʼ utzil jnan tbʼanaʼ iwäch rchë jnan nuʼän iwäch rkʼë ri Qajaw. 3 Y chawä rït, ri yït jun chkë ri toʼoyon pä wchë, tabʼanaʼ utzil ma tayaʼ ta qa kitoʼik re kaʼiʼ ixoqiʼ reʼ ri kan kitjon pä kiqʼij chutzjoxik ri utziläj taq rtzjol wkʼë rïn chqä rkʼë Clemente y kikʼë ri nkʼaj chik ri yinkitoʼon pä, ri kʼo kibʼiʼ chpan ri wuj rchë kʼaslemal. 4 Ronojel mul tinaʼ kiʼkʼuxlal rma ri Ajaw. Jmul chik nbʼij chiwä: ¡Tinaʼ kiʼkʼuxlal! 5 Jontir tkitamaj chë rïx kan ütz inaʼoj. Ri Ajaw naqäj chik kʼo pä. 6 Ma tchʼpü ta ikʼuʼx rma xa bʼa achkë kʼayewal. Pa rkʼexel riʼ, xa bʼa achkë na najin niqʼaxaj, tikʼutuj che rä Dios ri nkʼatzin chiwä y ma kixtaneʼ ta chukʼutxik riʼ chqä kixtyoxin che rä, 7 y Dios xtuʼän chë xtbʼanatäj iwkʼë rïx ri majun ta jun winäq nqʼax chwäch achkë rbʼanik nbʼanatäj, rma ryä xtuʼän chiwä chë ma xtchʼpü ta chik ikʼuʼx. Ya riʼ xtbʼanö chë, rkʼë rtoʼik Cristo Jesús, kan jaʼäl xtnaʼ iwan chqä ma xkixquʼü ta chik. 8 Pa rkʼisbʼäl, qachʼalal, chaq taqïl kixchʼobʼon chrij jontir ri kan ye tzij, jontir ri kan kʼo kejqalen, jontir ri kan ye chöj chwäch Dios, jontir ri kan chʼajchʼöj, jontir ri nkiʼän chawä chë nanaʼ ajowabʼäl, jontir ri kan ütz yetzʼetetäj kimä ri nkʼaj chik, jontir ri nkiʼän chawä chë ütz anaʼoj naʼän y jontir ri kan taqäl chkij rchë nayaʼ kiqʼij. 9 Tismajij ri naʼoj ri xitamaj chwij rïn chqä ri xinmaj, y tismajij chqä ri naʼoj ri xikʼoxaj chë xintzjoj rïn chqä ri xitzʼët chë yensmajin pä rïn. We xtiʼän riʼ, ri Dios ri ma nqä ta chwäch chʼaʼoj xtjeʼ iwkʼë. 11 Ma najin ta nbʼij reʼ chiwä rma kʼo nkʼatzin chwä, rma rïn ntaman kiʼ nkʼuʼx nbʼän rkʼë xa bʼa achkë nqʼaxaj pa nkʼaslemal. 12 Rïn ntaman achkë riʼ ri kan kʼïy kʼo awkʼë chqä achkë riʼ ri xa jbʼaʼ kʼo awkʼë. Xa bʼa achkë na kʼa nqʼaxaj pa nkʼaslemal, ntaman pä achkë rbʼanik nnaʼ kiʼkʼuxlal tapeʼ nujnäq npan o nqʼaxaj wayjal, tapeʼ kan kʼïy kʼo wkʼë o kan majun kʼo wkʼë. 13 Xa bʼa achkë yikowin nbʼän rma Dios ri nuyaʼ pä wchqʼaʼ. 16 rma, taq xijeʼ Tesalónica, rïx xitäq pä ri xkʼatzin chwä, y ma xuʼ ta jmul xiʼän riʼ, xa kan kaʼiʼ mul. 19 Pa rkʼexel riʼ, ri nDios ri kowan rbʼeyomal, xtksaj Cristo Jesús rchë xtyaʼ jontir ri nkʼatzin chiwä rïx.