2 Crónicas

34 Josías 8 wä rjnaʼ taq xok qʼatöy tzij, y 31 jnaʼ xqʼät tzij pa rwiʼ Jerusalén. 2 Ryä xuʼän ri nqä chwäch Jehová, achiʼel xuʼän David. Ryä ma xjäl ta rbʼey, ma xbʼä ta ni pa derecha ni pan izquierda. 3 Y taq 8 chik jnaʼ rqʼaton tzij, taq ryä kʼa kʼajol na, xkanuj rDios David; y taq rkʼwan chik 12 jnaʼ chpan rqʼatbʼäl tzij, xerwulaj ri altares ri ye kʼo pa kiwiʼ ri jyuʼ, xerwulaj ri cheʼ ri kibʼanon loqʼoläj chkë chqä jontir ri kityox, yajün ri kibʼanon rkʼë chʼichʼ. 14 Loman najin nkesaj ri päq ri xkʼam pä pa rachoch Jehová, ri sacerdote Hilquías xrïl ri libro ri kʼo Rpixaʼ Jehová chpan ri xtzʼibʼaj qa Moisés. 18 Safán, ri secretario, xuʼij chik ya reʼ che rä ri qʼatöy tzij: «Ri sacerdote Hilquías xyaʼ jun wuj chwä». Y xchäp rskʼixik ri wuj riʼ chwäch ri qʼatöy tzij. 19 Taq ri qʼatöy tzij xkʼoxaj ri nuʼij ri Pixaʼ, xrïchʼ rtzyaq. 20 Chrij riʼ, ri qʼatöy tzij xuʼij reʼ che rä Hilquías, che rä Ahicam, ri rkʼajol Safán, che rä Abdón, ri rkʼajol Miqueas, che rä Safán, ri secretario chqä che rä Asaya, rsamajel ri qʼatöy tzij: 21 «Jäx y tikʼutuj che rä Jehová pa nbʼiʼ rïn chqä pa kibʼiʼ ri kʼa ye kʼo na Israel chqä Judá chrij ri nuʼij ri wuj ri xiwïl, rma Jehová kantzij na wä chë kan xtresaj ryowal chqij, rma ri qatiʼt qamamaʼ ma xkinmaj ta rtzij Jehová. Ryeʼ ma xkiʼän ta jontir ri tzʼibʼatäl qa chpan re wuj reʼ». 23 Ri ixöq riʼ xuʼij kʼa chkë: «Ya reʼ ri nuʼij Jehová, rDios Israel: ‹Tiʼij che rä ri achï ri xixtaqö pä wkʼë: 24 «Ya reʼ ri nuʼij Jehová: ‹Xtinkʼän pä jun nimaläj kʼayewal pa rwiʼ re tinamït reʼ, ronojel ri kʼayewal ri ye tzʼibʼatäl qa chpan ri wuj ri xiskʼij chwäch ri qʼatöy tzij rchë Judá. 25 Rma ryeʼ xinkiyaʼ qa y xa chkë nkʼaj chik dioses xkiʼän wä sacrificios rchë chë nkitïk nyowal rkʼë ronojel ri kibʼanon rkʼë kiqʼaʼ, ri nyowal xtpë chrij re tinamït reʼ, y ma xtkʼis ta›». 26 Ye kʼa che rä ri qʼatöy tzij rchë Judá, ri xtaqö pä iwchë rchë nikʼulbʼej Jehová, ya reʼ kʼo chë niʼij che rä: «Ya reʼ ri nuʼij Jehová, rDios Israel: ‹Rkʼë ri tzij ri xakʼoxaj, 27 rma xtiʼon awan chqä xaqasaj awiʼ chwäch Dios taq xakʼoxaj ri rtzij [...] y xarëtz ri atzyaq chqä xatoqʼ chi nwäch, rïn chqä xatinkʼoxaj, nuʼij Jehová. 28 Rma riʼ [...] rkʼë uxlanen xkakäm wä, chqä ma xtatzʼët ta ronojel ri kʼayewal ri xtinyaʼ pä pa rwiʼ re tinamït reʼ›»›». [...]