Mateo

17 Ri naʼäy qʼij rchë ri Nmaqʼij kichë ri Kaxlanwäy ri Majun ta Chʼäm kikʼë, ri rtzeqelbʼëy Jesús xepë rkʼë y xkikʼutuj reʼ che rä: «¿Akuchï nawajoʼ nqaʼän wä rbʼanik rchë natäj ri Pascua?». 18 Ryä xuʼij chkë: «Jäx pa tinamït, tikanuj Fulano chqä tiʼij che rä: ‹Ri Tijonel nuʼij: «Ya xqajan pä ri qʼij rchë nbʼanatäj jontir. Rïn xtinmaqʼijuj ri Pascua kikʼë ri ntzeqelbʼëy pan awachoch»›». 19 Ri rtzeqelbʼëy Jesús xkiʼän ri xuʼij ryä chkë chqä xkiʼän rbʼanik ronojel rchë ri Pascua. 20 Taq xok qa aqʼaʼ, ryä tzʼyül wä chrij ri mesa kikʼë ri 12 rtzeqelbʼëy. 21 Loman najin yewaʼ, ryä xuʼij reʼ chkë: «Kantzij nbʼij chiwä chë jun chiwä rïx xkirkʼayij pa kiqʼaʼ ri winäq». 22 Taq xkikʼoxaj riʼ, ri rtzeqelbʼëy xbʼison kan, y jontir ri ye kʼo chriʼ xkiʼij reʼ che rä: «Ajaw, ma rïn ta, ¿tapeʼ?». 23 Ryä xuʼij chkë: «Ri nujuʼ rqʼaʼ chpan nlaq ya riʼ xkikʼayin pa kiqʼaʼ ri winäq. 24 Kantzij na wä chë ri Rkʼajol ri Achï xtbʼä äl, achiʼel wä tzʼibʼan qa chrij. Ye kʼa ¡jyuʼ rwäch ri xtkʼayin ri Rkʼajol ri Achï! Más ta ütz ma ta xaläx». 25 Judas, ri jbʼaʼ ma nukʼayij pa kiqʼaʼ ri winäq, xuʼij reʼ che rä: «Ma rïn ta, ¿tapeʼ Rabí?». Jesús xuʼij che rä: «Rït xabʼin rchë». 26 Taq kʼa najin na yewaʼ, Jesús xkʼän apü jun kaxlanwäy y, taq xtyoxij che rä Dios, xwächʼ chqä xyaʼ apü chkë rtzeqelbʼëy, y xuʼij: «Tikʼamaʼ chqä titjaʼ. Reʼ nukʼambʼej tzij ri nchʼakul». 27 Chrij riʼ xkʼän apü jun copa, xtyoxij che rä Dios, xyaʼ apü chkë y xuʼij: «Tiqmuʼ reʼ, jontir rïx, 28 rma ya reʼ nukʼambʼej tzij ri nkikʼel, ‹ri kïkʼ rchë ri jikibʼäl tzij›, ri kʼo chë xtinyaʼ pa kiwiʼ ye kʼïy rchë xtkuy kimak. 29 Ye kʼa nbʼij chiwä chë ma xtinqüm ta chik vino kʼa taq xtapon ri qʼij taq xtinqüm kʼakʼakʼ vino iwkʼë rïx chpan ri Rqʼatbʼäl Tzij Ntataʼ». 30 Chrij riʼ, taq xebʼixan yän che rä Dios, xebʼä äl pa rwiʼ ri jyuʼ Olivos. 31 Ya riʼ taq Jesús xuʼij reʼ chkë: «Re aqʼaʼ reʼ, jontir rïx xkixsach xa wmä rïn, rma tzʼibʼatäl qa reʼ: ‹Xtinsök ri ajyuqʼ y ri rkarneʼl xketalüx äl›. 32 Ye kʼa, taq xkikʼasöx pä chkikojöl ri kamnaqiʼ, xkinabʼiyäj äl chiwäch kʼa Galilea». 33 Rma riʼ, Pedro xuʼij reʼ che rä: «Tapeʼ jontir ryeʼ xkesach xa awmä rït, ¡rïn majun bʼëy xkisach ta!». 34 Jesús xuʼij reʼ che rä: «Kantzij nbʼij chawä chë re aqʼaʼ reʼ, taq majanä tskʼin jun äkʼ, rït oxiʼ mul xtaʼij chë ma ataman ta nwäch». 35 Rma riʼ, Pedro xuʼij reʼ che rä: «Tapeʼ xkikamsäx awkʼë, rïn majun bʼëy xtinbʼij ta chë ma ntaman ta awäch». Y ri nkʼaj chik rtzeqelbʼëy ke riʼ chqä xkiʼij. 36 Chrij riʼ Jesús xbʼä äl kikʼë pa jyuʼ ri rbʼiniʼan Getsemaní chqä xuʼij chkë: «Kixtzʼyeʼ qa aweʼ loman rïn xkibʼä äl ke laʼ rchë yibʼechʼö rkʼë Dios». 37 Ye kʼa xkʼwaj äl Pedro chqä ri kaʼiʼ rkʼajol Zebedeo, y xpë jun mamaʼ bʼis che rä. 38 Ryä xuʼij reʼ chkë: «Kowan yibʼison, kan nnaʼ chë yikäm. Kixkanaj qa aweʼ y ma kixwär ta». 39 Chrij riʼ, xel äl kikʼë, xqasaj riʼ kʼa pan ilew chqä xuʼij reʼ taq xchʼö rkʼë Dios: «Nataʼ, we ütz nuʼän, tabʼanaʼ chë ma nqʼaxaj ta re kʼayewal reʼ. Ye kʼa ma tbʼanatäj ta ri nwajoʼ rïn, xa kan yë ri nawajoʼ rït». 40 Chrij riʼ xtzolin akuchï ye kʼo wä rtzeqelbʼëy, ye kʼa ryeʼ xa ye warnäq. Rma riʼ xkʼutuj che rä Pedro: «¿Ma xixkowin ta xixkʼaseʼ tapeʼ xa jun hora? 41 Ma kixwär ta chqä chaq taqïl kixchʼö rkʼë Dios rchë ma yixqä ta pa mak. Kantzij na wä chë rïx niwajoʼ niʼän ri ütz, ye kʼa ri ichʼakul xa majun rchqʼaʼ ta». 42 Jmul chik, xel äl kikʼë y xuʼij reʼ taq xchʼö chik jmul rkʼë Dios: «Nataʼ, we kan nkʼatzin nqʼaxaj re kʼayewal reʼ, tbʼanatäj kʼa ri nawajoʼ rït». 43 Xtzolin chik jmul kikʼë y ryeʼ xa ye warnäq, rma kan kowan wä kiwaran kʼo. 44 Rma riʼ xeryaʼ qa chik jmul y xchʼö jun rox mul rkʼë Dios. Y xkamluj ri rbʼin wä qa chik. 45 Chrij riʼ, xtzolin akuchï ye kʼo wä rtzeqelbʼëy y xuʼij reʼ chkë: «¡Najin yixwär chqä najin yixuxlan chpan jun hora achiʼel reʼ! ¡Kixkʼastäj! Rma ya xapon ri hora rchë chë ri Rkʼajol ri Achï xtjach pa kiqʼaʼ ri ajmakiʼ. 46 Kixkatäj, joʼ äl. Titzʼetaʼ, ya petenäq chik ri xtkʼayin wchë». 47 Taq Jesús kʼa najin na ntzjon, Judas, jun chkë ri 12, xapon rkʼë jun molaj winäq ri kikʼwan espadas chqä kikʼwan cheʼ pa kiqʼaʼ. Ri molaj winäq riʼ yë ri sacerdotes ri kʼo más kiqʼij chqä ri ukʼwäy taq bʼey ri xetaqö äl kichë. 48 Ri xkʼayin Jesús xyaʼ re retal reʼ chkë ri ye bʼenäq rkʼë: «Ri xtintzʼmaj rchiʼ, ya riʼ ri achï riʼ; tiyutuʼ äl». 49 Rma riʼ, xbʼä kʼa rkʼë Jesús y xuʼij reʼ che rä: «¡Seqär, Rabí!» y xtzʼmaj rchiʼ. 50 Ye kʼa Jesús xuʼij reʼ che rä: «Judas, ¿achkë nakanuj?». Ya riʼ taq xejelun rkʼë Jesús, xkichäp chqä xkiyüt. 51 Chaq kʼateʼ, jun chkë ri kʼo rkʼë Jesús xresaj pä respada, xbʼä chrij rsamajel ri sumo sacerdote chqä xresaj rxkïn. 52 Rma riʼ Jesús xuʼij reʼ che rä: «Takʼoloʼ awespada, rma jontir ri yeksan espada xkekamsäx rkʼë espada. 53 ¿Naʼij rït chë ma yikowin ta nkʼutuj che rä Ntataʼ chë kertaqaʼ pä komä yän riʼ más 12 legiones ángeles? 54 Ye kʼa, we nbʼän ya riʼ, ¿achkë ta rbʼanik nbʼetzʼaqät ri Rchʼaʼäl Dios ri nuʼij chë ke riʼ kʼo chë nbʼanatäj?». 55 Rma riʼ, Jesús xuʼij reʼ chkë ri winäq: «¿Xixpë chwij rkʼë espadas y rkʼë cheʼ achiʼel ta yïn jun aleqʼon? Ronojel qʼij xijeʼ pa templo rchë xinkʼüt Rchʼaʼäl Dios y rïx ma xiniyüt ta äl. 56 Ye kʼa jontir reʼ najin nbʼanatäj rchë nbʼetzʼaqät jontir ri kitzʼibʼan qa ri profetas». Chrij riʼ, jontir rtzeqelbʼëy xeʼanmäj äl. 75 Ya riʼ taq Pedro xnatäj pä che rä ri xuʼij Jesús: «Taq majanä tskʼin jun äkʼ, rït oxiʼ mul xtaʼij che ma ataman ta nwäch». Rma riʼ xel äl chriʼ y kan xkraj oqʼej.