Apocalipsis

18 Chrij riʼ xintzʼët jun chik ángel ri petenäq chkaj ri kowan uchqʼaʼ kʼo pa rqʼaʼ, y le Rwachʼlew säq xuʼän rma ri ángel riʼ kan kowan saqïl nresaj. 2 Ryä kan rkʼë kuw rchʼaʼäl xuʼij: «¡Xchup rwäch! ¡Babilonia la Grande xchup rwäch! Xok kachoch ri demonios, ri akuchï ye kʼo jontir ri tzʼil taq espíritus chqä jontir ri ajxikʼ taq chköp ri ye tzʼil chqä ri itzel yetzʼet. 3 Rma jontir ri tinamït xeqä pa rqʼaʼ chqä xkiqüm ri vino ri xyaʼ chkë, ntel chë tzij, xkiʼän tzʼil taq bʼanobʼäl rkʼë; jontir ri qʼatöy taq tzij xkiʼän tzʼil taq bʼanobʼäl rkʼë, y ri kʼayinelaʼ xebʼeyomär rma re ixöq reʼ kan nqʼax rwiʼ rbʼeyomal kʼo». 4 Y xinkʼoxaj jun chik chʼaʼäl ri petenäq chkaj ri xuʼij: «Kixel pä chriʼ ntinamit, we ma niwajoʼ ta niyüj iwiʼ rkʼë ri mak najin yeruʼän chqä we ma niwajoʼ ta nijqalej ri kʼayewal xtyaʼöx pa rwiʼ. 5 Rma rmak aponäq kʼa chkaj y Dios xbʼenatäj pä che rä jontir ri itzelal rbʼanon. 6 Kan achiʼel xuʼän ryä kan ke riʼ tibʼanaʼ che rä; kamul ke riʼ tibʼanaʼ che rä. Chpan ri copa ri xyaʼ wä ri vino, tiqʼejaʼ kamul vino y tiyaʼ che rä. 7 Rma xuʼän chë kan kowan rqʼij xyaʼöx chqä kan xqʼax rwiʼ rbʼeyomal xjeʼ, kan ke riʼ rpoqonal chqä bʼis tiyaʼ pa rwiʼ. Rma ryä kan ya reʼ nuʼij pa ran: ‹Yïn achiʼel rxjayil jun qʼatöy tzij; ma yïn malkaʼn ta chqä majun bʼey xkikanaj ta pa bʼis›. 8 Rma riʼ, xa pa jun qʼij xkepë kʼayewal chrij —kamïk, bʼis chqä wayjal— y xtporöx pa qʼaqʼ. Rma Jehová Dios, ri xqʼatö tzij pa rwiʼ, kan kowan rchqʼaʼ. 9 Taq ri qʼatöy taq tzij ri xkiʼän tzʼil taq bʼanobʼäl rkʼë re ixöq reʼ, ri kan nqʼax rwiʼ rbʼeyomal kʼo, xtkitzʼët ri sübʼ rma najin nkʼat, xkeʼoqʼ chqä xtkiküj rwiʼ kan. 10 Ryeʼ kʼa näj xkejeʼ wä apü rma nkixiʼij kiʼ rma rpoqonal najin nuqʼaxaj. Ryeʼ xtkiʼij: ‹¡Jyuʼ awäch! ¡Jyuʼ awäch rït ri mamaʼ tinamït Babilonia, ri kan kowan wä awchqʼaʼ! ¡Xa pa jun hora xchup awäch!›. 11 Chqä ri kʼayinelaʼ xkeʼoqʼ y xkebʼison chrij rma majun ta chik jun ri xtloqʼö jontir kikʼayij: 12 oro, plata, jaʼäl taq abʼäj, perlas, tzyäq lino ri nmaʼq kajäl, tzyäq púrpura kicolor, seda y tzyäq ri qʼäq akëq kicolor; xa bʼa achkë ri bʼanon kikʼë cheʼ ri jaʼäl kixlaʼ y xa bʼa achkë ri bʼanon rkʼë marfil chqä kikʼë jaʼäl taq cheʼ, cobre, hierro o mármol; 13 chqä canela, qʼayis ri kʼo rxlaʼ ri kikʼamon pä pa tinamït India, pon, aceite ri jbʼül rxlaʼ, olíbano, vino, aceite de oliva, harina ri más ütz, trigo, wakx, karneʼl, kej, chʼichʼ, winäq ri ye xmïl pa samaj chqä nkʼaj chik winäq. 14 Ma xtawïl ta chik jontir ri narayij nixta jontir ri kʼayij ri kowan ye jaʼäl. Majun bʼëy xketzolin pä awkʼë. 15 Ri kʼayinelaʼ ri yekʼayin jontir reʼ, ri xebʼeyomär rma ryä, kʼa näj xkejeʼ wä apü rma nkixiʼij kiʼ rma rpoqonal najin nuqʼaxaj. Ryeʼ xkeʼoqʼ chqä xkebʼison 16 y xtkiʼij reʼ: ‹¡Jyuʼ rwäch! ¡Jyuʼ rwäch ri mamaʼ tinamït ri weqon rkʼë tzyäq lino ri nüm rajäl, ri púrpura chqä qʼäq akëq rcolor, chqä weqon rkʼë oro, jaʼäl taq abʼäj chqä perlas! 17 ¡Xa pa jun hora xchaʼ chiʼ nmaʼq taq bʼeyomäl!›. Y jontir ri yekʼwayon bʼey chkipan ri barcos chqä ri yebʼä chkipan, y jontir ri nkichʼäk kiway pa rwiʼ ri mar kʼa näj xejeʼ wä apü. 18 Y taq xkitzʼët ri sübʼ rma najin nkʼat, kan rkʼë kuw kichʼaʼäl xkiʼij: ‹¡¿Achkë ta chik jun tinamït ri jnan rkʼë ri mamaʼ tinamït?!›. 19 Xkiyaʼ ilew pa kijolon y rkʼë oqʼej chqä bʼis xkiʼij rkʼë kuw kichʼaʼäl: ‹¡Jyuʼ rwäch! ¡Jyuʼ rwäch ri mamaʼ tinamït, ri rma rbʼeyomal xuʼän chë xebʼeyomär jontir ri kʼo wä kibarcos pa rwiʼ mar! ¡Xa pa jun hora xchup ruwäch!›. 20 ¡Rïx ri yïx kʼo chkaj, ttel ikʼuʼx rma ri xbʼanatäj rkʼë! ¡Ttel ikʼuʼx rïx chqä ri yïx loqʼoläj, ri apóstoles chqä ri profetas! Rma Dios xqʼät tzij pa rwiʼ re ixöq reʼ iwmä rïx». 21 Y jun ángel ri kan kʼo rchqʼaʼ xtzeqej jun abʼäj ri achiʼel jun mamaʼ abʼäj ri njokʼon y xkʼäq äl pa mar chqä xuʼij: «Ke reʼ rbʼanik xtkʼaq äl Babilonia ri mamaʼ tinamït, y majun bʼëy xttzʼet ta chik. 22 Majun bʼëy xttzʼetetäj ta chik chpan atinamit winäq ri yeqʼojoman, ri nkiqʼojomaj arpa, flauta o trompeta nixta jun winäq ri nbʼixan. Chqä majun bʼëy xttzʼetetäj ta chik jun ri yeruʼän xa bʼa achkë jun rkʼë rqʼaʼ. Chqä majun bʼëy xtkʼaxatäj ta chik chpan atinamit rchʼaʼäl jun abʼäj ri njokʼon. 23 Majun bʼëy xttzʼetetäj ta chik chpan atinamit rsaqil jun kantil nixta xtkʼaxatäj chik rchʼaʼäl jun kʼajol o jun qʼopoj ri ya nkʼleʼ. Rma ri kʼayinelaʼ ri ye kʼo pan aqʼaʼ ya riʼ wä ri kʼo más kibʼeyomal chwäch le Rwachʼlew chqä rma xeʼaqʼöl jontir ri tinamït kikʼë ri abʼanobʼal ri xa kikʼwan kiʼ kikʼë ri ajqʼijaʼ chqä ri ajbʼanöy itz. 24 Y chpan re tinamït reʼ xilitäj kikikʼel ri profetas, ri ye loqʼoläj chwäch Dios chqä jontir ri yekamsan chwäch le Rwachʼlew».