Proverbios

15 Ri ütz rnaʼoj nuʼän taq ntzjon apü nuqasaj ryowal jun winäq, ye kʼa ri poqän taq tzij xa nkitïk ryowal. 3 Jehová kan kʼlan ntzuʼun wä rchë yertzʼët ri itzel taq winäq chqä ri ütz taq winäq. 8 Jehová kan itzel nutzʼët ri spanïk nuʼän jun itzel winäq che rä, ye kʼa ri chʼonïk nkiʼän ri winäq ri jïk kikʼaslemal kan nkiyaʼ kiʼkʼuxlal pa ran. 9 Jehová itzel nutzʼët rbʼey ri itzel winäq, ye kʼa kan nrajoʼ ri winäq ri nutäj rqʼij rchë nukʼwaj jun chöj kʼaslemal. 11 Ri Jül chqä ri akuchï jontir nchup wä rwäch kan pa saqïl kʼo wä chwäch Jehová. ¡Más na chik pa saqïl kʼo wä ri kan ri winäq! 13 Ri winäq ri kiʼ rkʼuʼx, kan tzeʼël ntzuʼun, ye kʼa ri winäq ri xa nbʼison, xa xtkʼis qa rchqʼaʼ. 15 Ri winäq ri xa nbʼison, ronojel qʼij ma ye ütz ta chwäch, ye kʼa ri nunaʼ kiʼkʼuxlal pa ran achiʼel ta ronojel qʼij kʼo nmaqʼij chwäch. 18 Ri winäq ri kowan qʼaqʼ rjolon nutïk chʼaʼoj, ye kʼa ri ma chanin ta nkatäj ryowal nuqasaj rchqʼaʼ kiyowal ri nkʼaj chik. 22 Taq ri winäq ma nkikʼulbʼej ta kiʼ, kan ma ütz ta xttel apü jontir chkiwäch, ye kʼa taq ye kʼo ye kʼïy rchë nkikʼulbʼej kiʼ, kan ütz xttel apü jontir chkiwäch. 23 Jun winäq kan kiʼ rkʼuʼx nuʼän taq kan ütz rbʼanik nuqʼalajsaj ri nkʼutüx che rä, ¡y kan kʼo utzil nukʼäm pä ri tzij taq kan ya riʼ nkʼatzin nkʼaxatäj! 28 Ri winäq ri jïk rkʼaslemal nuquʼ na ri yeruʼij, ye kʼa ri itzel taq winäq xa ryon ma ütz ta yekiʼij. 29 Jehová kan näj kʼo wä che rä ri itzel winäq, ye kʼa kan nukʼoxaj ri jïk rkʼaslemal taq nchʼö rkʼë. 31 Ri winäq ri nunmaj tzij taq nqʼil, kan xtrïl rkʼaslemal chqä xtjeʼ chkikojöl ri kan kʼo kinaʼoj.