2 Crónicas

2 Asá xuʼän ri ütz chwäch Jehová ri rDios. 3 Xeresaj äl ri altares ri yebʼanon rchë nyaʼöx kiqʼij ri kidioses nkʼaj chik tinamït chwäch chqä ri ye kʼo pa kiwiʼ jyuʼ, xerwulaj ri tzʼaq yepabʼan rchë nyaʼöx kiqʼij dioses chwäch chqä ri cheʼ ri yebʼanon loqʼoläj chkë. 6 Y rma majun ta wä chʼaʼoj chpan rtinamit, ryä xeryäk tinamït chwäch Judá ri kan kʼo tzʼaq chkij. Majun achkë xbʼanö chʼaʼoj rkʼë chkipan ri jnaʼ riʼ rma kan yë Jehová xbʼanö chë xuxlan. 7 Asá xuʼij reʼ chkë ri winäq aj Judá: «Xkeqayäk tinamït y xkeqapabʼaʼ tzʼaq chqä kowiläj taq jay chkij, y xtqayaʼ kipuertas chqä trancas chkij ri puertas. Ri tinamït kʼa pa qaqʼaʼ na röj kʼo wä, rma qakanun Jehová ri qaDios. Röj qakanun, y ryä rbʼanon chë xa bʼa akuchï yoj kʼo wä majun achkë bʼanayon chʼaʼoj qkʼë». Y jontir ri xyäk qʼanäj kan ütz xel chwäch. 11 Kʼa riʼ Asá kan xchʼö qʼanäj rkʼë Jehová ri rDios chqä xuʼij reʼ che rä: «Nimaläj Jehová, rït kan ma kʼayewal ta nuʼän chawäch yeʼatoʼ ri kʼo kichqʼaʼ chqä ri majun ta kichqʼaʼ. Kojatoʼ pä Jehová ri qaDios, rma qakʼuqbʼan qakʼuʼx chawij, y pan abʼiʼ rït yoj petenäq wä rchë nqabʼebʼanaʼ chʼaʼoj kikʼë re winäq reʼ, ri kowan ye kʼïy. Jehová, yït rït ri qaDios. Ma tayaʼ ta qʼij chë winäq ri xa yekäm yechʼakon chawij».