1 Timoteo

7 Ye kʼa ma tayaʼ ta axkïn chkë ri tzʼukün taq naʼoj ri yetzjöx chqä xa nkiqasaj rqʼij Dios, achiʼel nkitzjoj ri ixoqiʼ ri ya kʼo chik kijnaʼ. Chqä, tatjoj awiʼ rchë nayaʼ rqʼij Dios. 8 Ri naʼän ejercicio kʼo utzil nukʼäm pä pan awiʼ, ye kʼa ri ryaʼik rqʼij Dios kan nukʼäm pä utzil pa rwiʼ ronojel ri naʼän, rma nuʼän chë kan kʼo utzil nawïl chpan akʼaslemal komä y chpan akʼaslemal chqawäch apü. 10 Rma riʼ kan kowan najin nqsamäj chqä najin nqatäj qaqʼij, rma qakʼuqbʼan qakʼuʼx chrij jun kʼaslïk Dios. Ryä kan yerköl jontir kiwäch winäq, y más ri winäq ri nkinmaj rtzij ryä. 12 Majun ta jun tqasan aqʼij xa rma kʼa yït kʼajol na. Xa kan tkitzʼetaʼ qachʼalal chawij chë pa rbʼeyal yatzjon, ütz anaʼoj, yajowan, kʼo akʼuqbʼäl kʼuʼx chqä akʼwan jun chʼajchʼöj kʼaslemal. 13 Loman xkinapon, ma tayaʼ ta qa rskʼixik rwäch wuj chkiwäch ri winäq, keʼapixabʼaj chqä keʼatjoj. 14 Tachajij ri spanïk ri kʼo awkʼë ri xakʼül rma jun profecía bʼin qa taq ri molaj ukʼwäy taq bʼey xkiyaʼ kiqʼaʼ pan awiʼ. 15 Taquʼ rij ronojel reʼ chqä kan tayaʼ awan chrij, ke riʼ jontir xtkitzʼët chë najin nkʼuqeʼ pä akʼuʼx chpan ri rchʼaʼäl Dios. 16 Chaq taqïl tatzʼetaʼ qa awiʼ rït chqä ri achkë yeʼakʼüt. Ronojel mul tabʼanaʼ riʼ, rma we xtaʼän riʼ, xtaköl qa awiʼ rït chqä ri yekʼoxan awchë.