Salmos

37 Ma tkatäj ta ayowal xa kimä ri itzel taq winäq nixta tarayij ri kʼo kikʼë ri yebʼanö itzelal. 2 Ryeʼ kan chanin xkechaʼ chiʼ achiʼel nbʼanatäj rkʼë ri qʼayis; xkechaʼ chiʼ achiʼel nbʼanatäj rkʼë ri qʼayis ri kʼa riʼ najin nkʼïy qʼanäj. 3 Takʼuqbʼaʼ akʼuʼx chrij Jehová chqä yë ri ütz tabʼanaʼ; kajeʼ chpan ri atinamit chqä kan pa rbʼeyal takʼwaj akʼaslemal. 4 Tabʼanaʼ chë yë Jehová ntok ri nbʼanö chë kiʼ akʼuʼx naʼän, y ryä xtyaʼ chawä ri nurayij awan. 5 Tayaʼ qʼij chë yë Jehová nekʼwan abʼey; takʼuqbʼaʼ akʼuʼx chrij, ke riʼ ryä xkaturtoʼ pä. 6 Ryä xtuʼän chë xttzʼetetäj ri jïk kʼaslemal akʼwan kan achiʼel ri Qʼij taq ntel pä nmaqʼaʼ. Y xtuʼän chë xttzʼetetäj chë kan pa rbʼeyal naʼän che rä jontir kan achiʼel ri Qʼij pa nkʼäj qʼij. 7 Majun taʼij ta chwäch Jehová y kan rkʼë ronojel awan tayoʼej wä. Ma tkatäj ta ayowal xa kimä ri winäq ri ütz ntel chkiwäch ri itzelal kichʼobʼon pä nkiʼän. 8 Tayaʼ qa ri ayowal, taqasaj rqʼaqʼal ajolon; ma tmeqʼeʼ ta awkʼë, ma xa rma riʼ xtaʼän jun itzelal. 9 Rma ri itzel taq winäq xtchup kiwäch, ye kʼa ri xtkikʼuqbʼaʼ kikʼuʼx chrij Jehová xtyaʼöx qa le Rwachʼlew chkë. 10 Xa jbʼaʼ chik apü, ri itzel taq winäq ma xkejeʼ ta chik; xkeʼakanuj akuchï xejeʼ wä, ye kʼa ma xkeʼawïl ta chik chriʼ. 11 Ye kʼa ri ma nkinaʼ ta kiʼ xtyaʼöx qa le Rwachʼlew chkë y kan majun xtbʼanö chkë chë nchʼpü kikʼuʼx. 18 Jehová rtaman achkë najin nkiqʼaxaj ri kikʼwan jun jïk kʼaslemal, y ri spanïk yaʼon chkë majun achkë xtesan chkë. 19 Ma xkekʼixbʼisatäj ta taq kʼo kʼayewal xkepë; taq xtpë wayjal, ryeʼ xtjeʼ kʼïy kiway. 22 Ri nyaʼöx utzil pa kiwiʼ rma Dios xtyaʼöx qa le Rwachʼlew chkë, ye kʼa ri ntaq itzel chkij rma Dios xtchup kiwäch. 23 Taq Jehová kiʼ rkʼuʼx rkʼë rbʼanobʼal jun winäq, kan yë ryä nkʼwan rbʼey. 24 Tapeʼ xttzaq, ma xtroqeʼ ta qa, rma Jehová rchapon chqʼaʼ. 25 Taq kʼa yïn kʼajol na kʼa komä, ri ya xirjïx, majun bʼëy ntzʼeton ta jun winäq ri jïk rkʼaslemal mestan qa o chë ralkʼwal ma ta jun kiway. 28 Rma Jehová kan nqä chwäch chë pa rbʼeyal nbʼan che rä jontir chqä majun bʼëy xkeryaʼ ta qa ri yenman rtzij. Ryeʼ ronojel mul xkechajïx, ye kʼa ri kijatzul ri itzel taq winäq kan xtchup kiwäch. 29 Ri chöj kikʼaslemal xtyaʼöx qa le Rwachʼlew chkë chqä majun bʼëy xkesäx ta äl chwäch. 34 Takʼuqbʼaʼ akʼuʼx chrij Jehová chqä tasmajij ri rpixaʼ, y ryä xtunimirsaj aqʼij chqä xtspaj ri Rwachʼlew chawä rchë xkakʼojeʼ chwäch. Y taq xtchup kiwäch ri itzel taq winäq, rït xtatzʼët.