Tito

1 Rchë Pablo, rsamajel Dios chqä rapóstol Jesucristo rma ri kikʼuqbʼäl kʼuʼx ri yerchaʼon Dios chqä ri tzʼaqät etamabʼäl chrij ri kantzij, ri rkʼwan riʼ rkʼë ryaʼik rqʼij Dios 2 chqä rkʼë ri kʼaslemal ri majun bʼëy xtkʼïs ta, ri kan ojer chik rtzjun qa Dios, ri ma nkowin ta nutzʼük tzij, 5 Xatinyaʼ qa Creta rchë nachojmij jontir ri ma pa rbʼeyal ta najin yebʼan chqä rchë yeʼachaʼ jojun achiʼaʼ pa taq tinamït rchë yeʼok ukʼwäy taq bʼey. Rïn xinbʼij chawä achkë najowatäj chkij: 6 ri ukʼwäy bʼey kʼo chë nuʼän ri ütz pa rkʼaslemal rchë ri nkʼaj chik ma yetzjon ta itzel chrij, kʼo chë xa xuʼ rkʼë jun ixöq kʼlan wä chqä chë ralkʼwal ye cristianos y ma tamatäl ta kiwäch chë kikʼwan jun itzel kʼaslemal o chë ma yenman ta tzij. 7 Rma ri ukʼwäy bʼey kan rsamaj Dios nuʼän, ryä kʼo chë nuʼän ri ütz rchë ri nkʼaj chik ma yetzjon ta itzel chrij, y kʼo chë ma wiʼx ta nixta chanin npë ryowal. Chqä kʼo chë ma nqʼabʼär ta nixta nsokon rkʼë ri yeruʼij chqä ri yeruʼän, chqä kʼo chë ma njakʼäkʼ ta chrij päq o chrij ri nrajoʼ njeʼ rkʼë. 8 Pa rkʼexel riʼ, kʼo chë nqʼalajin chrij chë yerkʼül apü nkʼaj chik chrachoch chqä yertoʼ, nrajoʼ ri ütz, nuquʼ na ri yeruʼän, nuʼän ri ütz pa rkʼaslemal chqä nunmaj rtzij Dios, y rtaman nuqʼät riʼ. 9 Ryä ronojel mul kʼo chë yerksaj ri kantzij taq naʼoj taq nukʼüt rchʼaʼäl Dios, rchë ke riʼ nkowin yertoʼ nkʼaj chik kikʼë ütz taq naʼoj chqä rchë yerqʼïl ri yetzjon itzel chkij ri naʼoj riʼ.