Lucas

5 Kʼo jun qʼij, Jesús paʼäl wä chuchiʼ ri choy ri kʼo Genesaret y ri winäq kimolon wä kiʼ chrij rchë nkikʼoxaj rchʼaʼäl Dios. 2 Ryä xtzʼët kaʼiʼ barcos chuchiʼ ri choy. Ri ajchapöy kär ma ye kʼo ta wä chkipan chqä najin wä nkichʼäj kiyaʼl. 3 Ryä xjoteʼ chpan jun chkë ri barcos riʼ y xuʼij che rä Simón, ri rajaw ri barco, chë ttok apü jbʼaʼ chpan ri choy. Ya riʼ taq xtzʼyeʼ qa chpan ri barco y xtzjoj apü rchʼaʼäl Dios chkë ri winäq. 4 Taq xkʼïs rtzij, xuʼij reʼ che rä Simón: «Joʼ akuchï nüm rpan ri yaʼ y chriʼ tiqasaj wä iyaʼl rchë yeʼichäp kär». 5 Ye kʼa Simón xuʼij reʼ che rä: «Maestro, jun aqʼaʼ xeqakanuj kär y majun xqachäp ta; ye kʼa, rma rït yabʼin, xtinqasaj ri yaʼl». 6 Taq xkiqasaj kiyaʼl, kan kʼïy kär xekichäp, rma riʼ kiyaʼl xa najin chik yeretzetäj. 7 Rma riʼ, xkikʼutuj kitoʼik chkë kichiʼil ri ye kʼo chpan ri jun chik barco. Ryeʼ xebʼä apü kikʼë y xkinujsaj ri kaʼiʼ barcos. Rma ri barcos kowan xenuj, eqal wä najin yebʼä äl chuxeʼ yaʼ. 8 Taq xtzʼët riʼ, Simón Pedro xxkeʼ qa chwäch Jesús y xuʼij: «Ma kajelun ta pä wkʼë, Ajaw, rma xa kʼo qa mak chwij». 9 Ryä xuʼij ya riʼ rma ryä chqä ri ye kʼo rkʼë kowan xel kikʼuʼx rma jontir ri kär ri xekichäp, 10 ke riʼ chqä xkinaʼ Santiago y Juan, ri rkʼajol Zebedeo, ri kichiʼil wä kiʼ rkʼë Simón chpan ri kʼayij riʼ. Ye kʼa Jesús xuʼij reʼ che rä Simón: «Ma taxiʼij ta chik awiʼ. Kan chpan re qʼij reʼ xkeʼakanuj winäq achiʼel yeʼakanuj kär». 11 Rma riʼ, taq xekikʼwaj äl ri barcos chuchiʼ yaʼ, xkiyaʼ qa jontir y xeʼok rtzeqelbʼëy. 16 Ye kʼa ryä chaq taqïl wä nbʼä akuchï ma ye jun ta winäq rchë nbʼechʼö rkʼë Dios. 30 [...] «¿Achkë rma yixwaʼ chqä yixkʼuya kikʼë ri yemolö alkawal chqä kikʼë ri ajmakiʼ?». 31 Taq Jesús xkʼoxaj riʼ, xuʼij reʼ chkë: «Ri winäq ri majun ta kiyabʼil ma nkʼatzin ta yebʼä rkʼë doctor, ye kʼa ri yawaʼiʼ nkʼatzin nkiʼän riʼ. 32 Ma yïn petenäq ta rchë yentoʼ ri winäq ri jïk kikʼaslemal, xa kan rchë yentoʼ ri ajmakiʼ rchë nkitzolij kiʼ».