1 Corintios

16 Ye kʼa we rïn ntzjoj ri ütz taq rtzjol chrij ri Cristo, majun rma nnaʼ wiʼ rma riʼ, rma kan ya riʼ kʼo chë nbʼän. ¡Jyuʼ nwäch we rïn ma xtintzjoj ta ri ütz taq rtzjol riʼ! 17 We rïn kan rkʼë ronojel wan xtinbʼän re samaj reʼ, kʼo utzil xtyaʼöx pa nwiʼ; ye kʼa tapeʼ ma nwajoʼ ta nbʼän, rïn ntaman chë ya riʼ ri samaj ri xyaʼöx qa pa nqʼaʼ. 20 Kikʼë ri judíos xinbʼän chë achiʼel ta yïn judío, rchë yenchʼäk ri judíos. Kikʼë ri ye kʼo chuxeʼ ri pixaʼ xinbʼän achiʼel ta yïn kʼo chuxeʼ ri pixaʼ, rchë yenchʼäk ri ye kʼo chuxeʼ ri pixaʼ, tapeʼ rïn ma yïn kʼo ta chuxeʼ ri pixaʼ. 21 Kikʼë ri ma ye kʼo ta chuxeʼ ri pixaʼ xinbʼän chë achiʼel ta ma yïn kʼo ta chuxeʼ ri pixaʼ, rchë yenchʼäk ri ma ye kʼo ta chuxeʼ ri pixaʼ, tapeʼ rïn yïn kʼo chuxeʼ rpixaʼ Dios rma ri rpixaʼ Cristo. 22 Kikʼë ri ma kʼuqül ta kikʼuʼx xinbʼän achiʼel ta ma kʼuqül ta nkʼuʼx, ke riʼ yenchʼäk ri ma kʼuqül ta kikʼuʼx. Jontir rwäch nbʼanon kimä ri jalajöj kiwäch winäq, ke riʼ xkikowin xkenköl qa jojun. 23 Nbʼän kʼa jontir riʼ rma ri utziläj taq rtzjol, rchë ntzjoj chkë ri nkʼaj chik. 24 ¿Ma itaman ta rïx chë tapeʼ chpan jun atzʼanen rchë kʼaqöj anin jontir yekʼaqö anin, ye kʼa xa xuʼ jun nchʼakon? Rïx chqä titjaʼ iqʼij rchë yixchʼakon. 25 Ye kʼa ri winäq ri yejeʼ chpan jun atzʼanen nkikʼüt chë yekowin nkiqʼät kiʼ chwäch xa bʼa achkë. Ryeʼ nkiʼän riʼ rchë nyaʼöx jun kicorona ri xa nchaʼ chiʼ, ye kʼa röj, nqaʼän riʼ rchë nyaʼöx jun qacorona ri ma nchaʼ ta chiʼ. 26 Rma riʼ, ma nkʼäq ta anin we ma ntaman ta akuchï nwajoʼ yinapon wä, chqä ma yichʼeyon ta achiʼel xa ta najin yenyaʼ qʼaʼ che rä ri kaqʼiqʼ. 27 Pa rkʼexel nbʼän riʼ, rïn xa chaq taqïl nchʼäy ri nchʼakul chqä nchaqtiʼij kan achiʼel nuʼän jun winäq rkʼë rsamajel, rchë ke riʼ, taq xintzjoj yän ri rchʼaʼäl Dios chkë ri nkʼaj chik, rïn ma itzel ta xkitzʼet rma ri Ajaw.