Mateo

6 Ma tiʼän ta ri ütz chkiwäch ri nkʼaj chik xa xuʼ rchë ryeʼ yixkitzʼët. Rma, we rïx xtiʼän riʼ, ri Qatataʼ kʼo chkaj ma xtyaʼ ta utzil pan iwiʼ. 2 Taq nayaʼ rtoʼik jun winäq ri nkʼatzin che rä, ma takraj ta rtzjol achiʼel nkiʼän ri winäq ri xa kaʼiʼ kipaläj ri ye kʼo pa sinagogas chqä pa taq bʼey, rchë ri nkʼaj chik nkiyaʼ kiqʼij. Kan chöj nbʼij chiwä che ryeʼ xkikʼül yän rkʼexel jontir ri xkiyaʼ. 6 Ye k’a rït, taq xkachʼö rkʼë Dios, katok pan awachoch y, taq atzʼapin chik rchiʼ awachoch, kachʼö rkʼë Qatataʼ ri kʼo chkaj. Ke riʼ, ri Qatataʼ ri yaturtzʼët pä chlaʼ chkaj, xtyaʼ rajäl rkʼexel chawä. 7 Taq xkachʼö rkʼë Dios, ma chaq xuʼ ta takamluj ri xaʼij yän che rä, achiʼel nkiʼän ri ma ye judíos ta ri nkiquʼ chë Dios xkerkʼoxaj taq nkikamluj ri nkiʼij che rä. 8 Ma tiʼän ta achiʼel nkiʼän ryeʼ. Ri Itataʼ kʼo chkaj ya rtaman chik achkë nkʼatzin chiwä, yajün taq majanä tikʼutuj che rä. 9 Rïx ke reʼ rbʼanik kʼo chë yixchʼö rkʼë Dios: «Qatat ri yït kʼo chlaʼ chkaj, nqarayij chë tbʼan loqʼoläj che rä abʼiʼ. 10 Nqajoʼ chë tpë Aqʼatbʼäl Tzij chqä chë tbʼan ri nawajoʼ rït, achiʼel chlaʼ chkaj, ke riʼ chqä chwäch le Rwachʼlew. 11 Tayaʼ qaway rchë re qʼij reʼ; 12 takyuʼ qamak, achiʼel yeqakyun röj ri winäq ri kʼo ma ütz ta kibʼanon chqë. 13 Y ma tayaʼ ta q’ij chë nqqä pa jun mak, xa kan kojatoʼ chwäch ri Itzel Winäq. 14 We rïx yeʼiküy ri nkʼaj chik taq kʼo ma ütz ta nkiʼän chiwä, ri Itataʼ kʼo chkaj xkixurküy rïx chqä. 15 Ye kʼa we ma yeʼiküy ta ri nkʼaj chik taq kʼo ma ütz ta nkiʼän chiwä, ri Itataʼ kʼo chkaj ma xtküy ta imak rïx chqä. 19 Ma timöl ta chik ibʼeyomal chwäch le Rwachʼlew, rma xa yechkopïr y xa yepusïr, chqä xa yeʼeleqʼäx kimä alqʼomaʼ. 20 Pa rkʼexel riʼ, xa kan timoloʼ ibʼeyomal chlaʼ chkaj, ri akuchï ma yechkopïr ta chqä ma yepusïr ta, y ma yeʼeleqʼäx ta kimä alqʼomaʼ. 21 Rma akuchï xtjeʼ wä ri abʼeyomal, kan chriʼ xtjeʼ wä ri awan. 22 Ri rnaqʼ awäch ya riʼ ri rsaqil ri achʼakul. Rma riʼ, we ri rnaqʼ awäch chöj ntzuʼun, jontir ri achʼakul xtjeʼ pa saqïl. 24 Majun ta jun winäq nkowin ntok rsamajel ye kaʼiʼ ajaw; rma xa xttzelaj jun ye kʼa xtrajoʼ ri jun chik, o xtnmaj rtzij jun ye kʼa itzel xtnaʼ che rä ri jun chik. Ke riʼ chqä rïx, ma ütz ta yixok rsamajelaʼ Dios ye kʼa yixok chqä rsamajelaʼ ri Bʼeyomäl. 25 Rma riʼ nbʼij reʼ chiwä: ma tchʼpü ta chik ikʼuʼx (ma timayaʼ ta) chrij ri ikʼaslemal, achiʼel chrij ri achkë xtitäj o xtiqüm; o chrij ri ichʼakul, achiʼel ri achkë xtiksaj. Rma, ¿ma más ta komä rqʼij ri ikʼaslemal chwäch ri iway chqä ri ichʼakul chwäch ri itzyaq? 26 Keʼitzʼetaʼ ri ajxikʼ taq chköp. Ryeʼ ma yetkonäj ta, ma nkesaj ta rwäch tkoʼn nixta nkikʼöl rwäch tkoʼn, ye kʼa ri Qatataʼ kʼo chkaj kan yertzüq. ¿Ma más ta komä iqʼij rïx chkiwäch ryeʼ? 27 ¿Kʼo komä jun chiwä rïx ri nkowin nkʼaseʼ jbʼaʼ chik xa rma nchʼpü rkʼuʼx? 28 Chqä, ¿achkë rma nchʼpü ikʼuʼx chrij ri itzyaq? Tikʼamaʼ inaʼoj chrij ri rbʼanik yekʼïy pä ri kotzʼiʼj pa jyuʼ. Ryeʼ ma yesamäj ta chqä ma yebʼatzʼin ta. 29 Ye kʼa, kantzij nbʼij chiwä chë nixta Salomón, ri janina wä rbʼeyomal, ma xkowin ta xwäq riʼ achiʼel jun chkë re kotzʼiʼj reʼ. 30 Rma riʼ, we Dios ke riʼ rbʼanik yerwäq ri kotzʼiʼj ri ye kʼo pa jyuʼ, ri komä ye kʼo y chwaʼq xa yeporöx, ¿ma más ta komä xtyaʼ itzyaq rïx, winäq ri nkʼatzin nikʼuqbʼaʼ más ikʼuʼx chrij Dios? 31 Rma riʼ, majun bʼëy tchʼpü ta ikʼuʼx (ma timayaʼ ta) chqä ma tiʼij ta: ‹¿achkë xtqatäj?›, o ‹¿achkë xtqaqüm?›, o ‹¿achkë xtqaksaj?›. 32 Rma ri winäq ri ma nkiyaʼ ta rqʼij Dios ya riʼ nkitäj kiqʼij chkanuxik. Ri Itataʼ ri kʼo chlaʼ chkaj rtaman chë rïx nkʼatzin jontir riʼ chiwä. 33 Rma riʼ, titjaʼ kʼa iqʼij rchë nikanuj naʼäy ri Rqʼatbʼäl Tzij Dios chqä ri rchojmilal; ke riʼ xtyaʼöx pä ronojel riʼ chiwä. 34 Rma riʼ, majun bʼey tchʼpü ta ikʼuʼx rma ri xtbʼanatäj chwaʼq kabʼij, rma ri chwaʼq kabʼij kʼo chqä kʼayewal xkejeʼ. Chqä ronojel qʼij kan kʼo kʼayewal yeʼiqʼaxaj.