Salmos

32 Kan kiʼ rkʼuʼx nuʼän ri winäq ri nkuy chqä nmestäx rmak. 2 Kan kiʼ rkʼuʼx nuʼän ri winäq ri majun ta rmak nutzʼët Jehová, ri winäq ri ma nqä ta chwäch nqʼolon. 3 Taq ma xinbʼij ta nmak, ri nbʼaqil kan achiʼel ta xeqʼïy rma chöj jun qʼij xibʼison. 4 Rma paqʼij chë chaqʼaʼ ma kiʼ ta wä akʼuʼx wkʼë. Kan achiʼel nchaqiʼj qa ri yaʼ taq saqʼij rbʼanon, kan ke riʼ xkʼis qa wchqʼaʼ. 5 Kʼa riʼ xinbʼij nmak chawä y ma xinwewaj ta chawäch. Rïn xinbʼij: «Xtintzjoj jontir nmak che rä Jehová». Y rït kan xaküy nmak. 6 Rma riʼ, ri winäq ri nunmaj atzij xtchʼö qʼanäj awkʼë loman xkatrïl na. Rchë ke riʼ we xtpë jun raqän yaʼ chrij ma xttzʼlaʼ ta. 7 Awkʼë rït ntoʼ wä wiʼ; rït xkinachajij chkiwäch ri kʼayewal. Xtaʼän chë ri winäq ri ye kʼo wkʼë kan kiʼ kikʼuʼx xtkiräq kichiʼ rma xojaköl. 8 «Xtinbʼän chawä chë xtjeʼ anaʼoj y xtinkʼüt chawäch achkë bʼey kʼo chë xtakʼwaj. Kantzij na wä chë xkatintzuʼ rkʼë ri rnaqʼ nwäch rchë xkatinpixabʼaj. 9 Ma tiʼän ta achiʼel nkiʼän ri kej o ri bʼür ri majun ta kinaʼoj. Ri chköp riʼ kʼo chë nqʼat na kichqʼaʼ rkʼë chʼichʼ chqä koloʼ rchë ke riʼ ma yepë ta chawij». 10 Kan kʼïy kʼayewal nuqʼaxaj jun itzel winäq, ye kʼa ri nukʼuqbʼaʼ rkʼuʼx chrij Jehová, ryä xtchajij rkʼë rajowabʼäl ri majun bʼëy nkʼis ta. 11 Tinaʼ kiʼkʼuxlal rma Jehová, chqä kiʼ ikʼuʼx tibʼanaʼ rïx ri jïk ikʼaslemal; kan rkʼë kiʼkʼuxlal tiraqaʼ ichiʼ jontir rïx ri chʼajchʼöj iwan.