Juan

3 Chkikojöl ri fariseos kʼo wä jun achï ri Nicodemo rbʼiʼ, jun qʼatöy tzij pa kiwiʼ ri judíos. 2 Ryä xbʼertzʼetaʼ Jesús chaqʼaʼ y xuʼij reʼ che rä: «Rabí, röj qataman chë rït yït jun maestro ri taqon pä rma Dios, rma majun ta jun winäq nkowin nuʼän ri milagros ri naʼän rït si Dios ma nutoʼ ta pä». 3 Jesús xuʼij: «Chöj nbʼij chawä chë, si jun winäq ma naläx ta chik jmul, ma nkowin ta ntok chpan Rqʼatbʼäl Tzij Dios». 4 Nicodemo xuʼij: «¿Achkë ta rbʼanik naläx jun winäq taq ya riʼj chik? Ma nkowin ta ntok chpan rteʼ y naläx jun rkaʼn mul, ¿tapeʼ?». 5 Jesús xuʼij reʼ che rä: «Chöj nbʼij chawä chë, si jun winäq ma nbʼan ta bautizar pa yaʼ chqä ma nyaʼöx ta pä ri loqʼoläj rchqʼaʼ Dios pa rwiʼ y naläx chik jmul, ma xtkowin ta xttok chpan Rqʼatbʼäl Tzij Dios. 6 Ri yeʼaläx kikʼë winäq yeʼok winäq, ye kʼa ri yechaʼon rma ri loqʼoläj rchqʼaʼ Dios ye rchë chkaj. 7 Ma tsach ta akʼuʼx rma xinbʼij reʼ chawä: ‹Rïx nkʼatzin yixaläx chik jmul›. 8 Ri kaqʼiqʼ nbʼä xa bʼa akuchï wä, y tapeʼ yakowin nakʼoxaj, ma ataman ta akuchï petenäq wä nixta akuchï nbʼä wä. Ke riʼ chqä nbʼanatäj kikʼë ri yechaʼon rkʼë ri loqʼoläj rchqʼaʼ Dios». 9 Rma riʼ, Nicodemo xkʼutuj reʼ che rä: «¿Achkë rbʼanik nbʼanatäj jontir riʼ?». 10 Jesús xuʼij: «¿Rït nakʼüt rpixaʼ Dios pa Israel y ma ataman ta chrij reʼ? 11 Röj nqatzjoj ri qataman chqä nqatzjoj ri qatzʼeton, ye kaʼ rïx ma ninmaj ta ri nqatzjoj röj. 12 Si ma yininmaj ta taq ntzjoj chiwä ri kʼo chwäch le Rwachʼlew, ¿xkininmaj komä si ntzjoj chiwä ri kʼo chkaj? 13 Chqä majun ta jun winäq bʼenäq chkaj, xa xuʼ ri xb’eqä pä chkaj, rïn ri Ralkʼwal Winäq. 14 Y, achiʼel xuʼän Moisés taq xtzeqebʼaʼ ri kumätz chwäch jun cheʼ pa desierto, ke riʼ chqä xkitzeqebʼäx rïn, ri Ralkʼwal Winäq, 15 rchë ke riʼ xa bʼa achkë xtkʼuqbʼan rkʼuʼx chwij xtrïl ri kʼaslemal ri majun bʼëy nkʼis ta. 16 Rma Dios kowan xerajoʼ ri winäq, xiryaʼ rïn, ri Rkʼajol, kimä ryeʼ rchë xa bʼa achkë ri rkʼuqbʼan rkʼuʼx chwij ma nchup ta rwäch, xa kan xtrïl ri kʼaslemal ri majun bʼëy nkʼis ta. 17 Rma Dios ma xirtäq ta pä rïn, ri yïn Rkʼajol, chwäch le Rwachʼlew rchë nqʼät tzij pa kiwiʼ ri winäq, xa kan rchë chë ri winäq nkiköl kiʼ wmä rïn. 18 Ri xtkʼuqbʼaʼ rkʼuʼx chwij rïn ma xtqʼat ta tzij pa rwiʼ. Ri ma rkʼuqbʼan ta rkʼuʼx ya xqʼat yän tzij pa rwiʼ, rma ma rkʼuqbʼan ta rkʼuʼx chrij nbʼiʼ rïn, ri yïn Rkʼajol Dios. 19 Ya reʼ rma xtqʼat tzij pa kiwiʼ ri winäq: rïn, ri saqïl, xipë chwäch le Rwachʼlew, ye kʼa pa rkʼexel nkajoʼ ri saqïl, ri winäq xa yë ri qʼequʼn xkajoʼ, rma xa ryon ma ütz ta yekiʼän. 20 Rma ri winäq ri ryon ma ütz ta yeruʼän itzel nutzʼët ri saqïl y ma nukanuj ta, rchë ma nqʼalajin ta jontir ri yeruʼän. 21 Ye kʼa ri winäq ri yë ri ütz nuʼän nukanuj ri saqïl, rchë kan nqʼalajin chë jontir ri yeruʼän rkʼwan riʼ rkʼë ri nrajoʼ Dios». 22 Chrij riʼ, Jesús chqä rtzeqelbʼëy xebʼä pa taq jyuʼ ri ye kʼo Judea, y chriʼ xekanaj wä qa jun tiempo y xeruʼän bautizar ri winäq. 23 Ye kʼa Juan najin chqä yeruʼän bautizar winäq pa Enón, chunaqaj Salim, rma chriʼ kan kʼo kʼïy yaʼ, y ri winäq yeʼapon wä rkʼë rchë yebʼan bautizar; 24 chkipan qa ri qʼij riʼ, Juan majanä wä tyaʼöx pacheʼ. 25 Rma riʼ ri rtzeqelbʼëy Juan xkichäp chʼaʼoj rkʼë jun judío chrij ri achkë nkʼatzin nbʼan rchë chʼajchʼöj yetzʼet rma Dios. 26 Chrij riʼ xebʼä rkʼë Juan y xkiʼij reʼ che rä: «Rabí, ¿nnatäj chawä ri achï ri xatzjoj chkë ri winäq ri kʼo wä awkʼë taq yït kʼo jkʼan chik che rä ri raqän yaʼ Jordán? Najin yeruʼän bautizar ri winäq y jontir najin yebʼä äl rkʼë». 27 Juan xuʼij: «Jun winäq kʼo nkowin nuʼän xa xuʼ si nyaʼöx qʼij che rä rma Dios. 28 Rïx yïx kʼo wä chriʼ taq xinbʼij ‹Rïn ma yïn ta ri Cristo, xa xuʼ xitaq pä naʼäy chwäch ryä›. 29 Chpan jun kʼlanen, ri qʼopoj rchë ri kʼajol ri nkʼleʼ. Ye kʼa ramigo ri kʼajol ri nkʼleʼ, taq npaʼeʼ chuxkïn chqä nukʼoxaj, kan kiʼ rkʼuʼx nuʼän. Rma riʼ, rïn komä kowan kiʼ nkʼuʼx. 30 Ryä xkekʼiyär na rtzeqelbʼëy, ye kʼa rïn xa xkekʼis qa». 31 Ri petenäq chkaj kʼo pa kiwiʼ jontir winäq. Ri rchë le Rwachʼlew ma nkowin ta nutzjoj ri kʼo chkaj rma xa rchë le Rwachʼlew. Ri petenäq chkaj kʼo pa kiwiʼ jontir winäq. 32 Ryä nutzjoj ri rtzʼeton chqä ri rkʼoxan, ye kʼa majun ta jun nnman ri nuʼij. 33 Ye kʼa ri winäq ri rnman ri rbʼin, nunmaj rkʼë ronojel ran chë Dios kantzij ntzjon. 34 Ri taqon pä rma Dios nutzjoj rchʼaʼäl Dios, rma Dios ma nukʼekʼej ta nuyaʼ ri loqʼoläj rchqʼaʼ. 35 Ri Qatataʼ nrajoʼ Rkʼajol y ryaʼon qa jontir pa rqʼaʼ. 36 Ri nukʼuqbʼaʼ rkʼuʼx chrij Rkʼajol Dios xtyaʼöx rkʼaslemal ri majun bʼëy nkʼis ta, ye kʼa ri ma nunmaj ta rtzij Rkʼajol Dios ma xttzʼët ta ri kʼaslemal riʼ, chqä Dios ma xtkʼis ta ryowal che rä.