Mateo

3 «Kiʼ kikʼuʼx ri winäq ri nkinaʼ chë nkʼatzin Dios pa kikʼaslemal, rma ri Qʼatbʼäl Tzij ri kʼo chkaj chkë ryeʼ xtyaʼöx wä. 4 Kiʼ kikʼuʼx ri yebʼison, rma ryeʼ xtkʼuqbʼäx kikʼuʼx. 5 Kiʼ kikʼuʼx ri winäq ri ma qʼaqʼ ta kijolon, rma chkë ryeʼ xtyaʼöx wä qa le Rwachʼlew. 6 Kiʼ kikʼuʼx ri nkirayij chë pa rbʼeyal nbʼan che rä jontir, rma kan xtbʼan ri nkajoʼ ryeʼ. 7 Kiʼ kikʼuʼx ri winäq ri nkipoqonaj kiwäch ri nkʼaj chik, rma ryeʼ xtpoqonäx kiwäch. 8 Kiʼ kikʼuʼx ri chʼajchʼöj kan, rma ryeʼ kan xtkitzʼët Dios. 9 Kiʼ kikʼuʼx ri yetoʼon rchë ma njeʼ ta chʼaʼoj chkikojöl ri winäq, rma xtbʼix ralkʼwal Dios chkë. 10 Kiʼ kikʼuʼx ri yaʼon kʼayewal pa kiwiʼ xa rma nkiʼän ri ütz, rma ri Qʼatbʼäl Tzij ri kʼo chkaj chkë ryeʼ xtyaʼöx wä. 11 Kiʼ ikʼuʼx rïx, ri xa wmä rïn xkixyoqʼ, xtyaʼöx kʼayewal pan iwiʼ, xttzʼuk tzij chiwij y xtbʼix xa bʼa achkë itzel taq tzij chiwij. 12 Kiʼ ikʼuʼx tibʼanaʼ rma kan nüm ri spanïk xtyaʼöx chiwä chlaʼ chkaj, rma ri profetas ri xejeʼ ojer kan ke riʼ chqä ri kʼayewal xyaʼöx pa kiwiʼ. 16 Ke riʼ chqä rïx, tibʼanaʼ chë ri inaʼoj tbʼanaʼ achiʼel jun saqïl chkiwäch ri winäq. Kan tkitzʼetaʼ ri utziläj taq ibʼanobʼal, rchë ke riʼ xtkiyaʼ rqʼij ri Itataʼ ri kʼo chlaʼ chkaj. 23 Rma riʼ, we akʼwan jun spanïk rchë nayaʼ che rä Dios y kʼa riʼ nnatäj chawä chë awachʼalal ma kan ta kiʼ rkʼuʼx rbʼanon awkʼë, 24 tayaʼ qa aspanik chriʼ chwäch ri altar, y kabʼiyïn äl. Naʼäy tabʼesoloʼ ri kʼayewal rkʼë awachʼalal, chrij riʼ kʼa riʼ katzolin rchë nabʼeyaʼ ri aspanik. 25 We kʼo jun akʼulel yaturkʼwaj äl rchë nqʼat tzij pan awiʼ, kan tatjaʼ aqʼij rchë nasöl yän ri akʼayewal taq kʼa riʼ yïx bʼenäq äl pa bʼey, we ma xtaʼän ta riʼ ri akʼulel xkaturyaʼ qa pa rqʼaʼ ri qʼatöy tzij y ri qʼatöy tzij xkaturjäch äl pa rqʼaʼ ri chajinel rchë ri qʼatbʼäl tzij y ryä xkaturyaʼ qa pacheʼ. 26 Kan chöj nbʼij chawä chë kan ma xkatel ta pä chriʼ kʼa xtatöj na jontir ri akʼas. 27 Rïx ikʼoxan chë xbʼix: ‹Ma takanuj ta rkʼexel ri akʼlaj›. 28 Ye kʼa rïn nbʼij chiwä chë xa bʼa achkë achï ri nbʼä rwäch chrij jun ixöq y nurayij apü rwäch, ya xmakun yän rkʼë ri ixöq riʼ pa ran. 29 Rma riʼ, we ri rnaqʼ awäch derecha najin nuʼän chë yamakun, tawesaj äl chqä takʼaqaʼ äl näj. Más ütz nsach jun peraj rchë achʼakul ke chwäch jontir achʼakul nkʼaq pa Gehena. 30 Ke riʼ chqä tabʼanaʼ we ri aqʼaʼ derecha najin nuʼän chë yamakun, tawesaj äl chqä takʼaqaʼ äl näj. Más ütz nsach jun peraj rchë achʼakul ke chwäch jontir achʼakul nkʼaq pa Gehena. 37 Rma riʼ, taq niʼij ‹jaʼ›, kan tibʼanaʼ ri niʼij; ye kʼa taq niʼij ‹manä›, kan ya riʼ chqä tibʼanaʼ; rma ri ma naʼän ta ri naʼij xa rnaʼoj ri Itzel Winäq. 43 Rïx ikʼoxan chë xbʼix: ‹Keʼawajoʼ ri awinaq y keʼatzelaj ri akʼulel›. 44 Ye kʼa rïn nbʼij chiwä chë keʼiwajoʼ ri ikʼulel y kixchʼö rkʼë Dios pa kiwiʼ ri nkiyaʼ kʼayewal pan iwiʼ. 45 Rchë ke riʼ xtikʼüt chë rïx yïx ralkʼwal ri Qatataʼ ri kʼo chkaj, rma ryä nuʼän chë ri qʼij ntel pä pa kiwiʼ ri itzel chqä ri ütz kinaʼoj; y nuʼän chë ri jöbʼ nqä pä pa kiwiʼ ri jïk chqä ri ma jïk ta kikʼaslemal. 46 Rma, we yeʼiwajoʼ ri yixkajoʼ rïx, ¿achkë taqäl chiwij nyaʼöx chiwä? ¿Ma ke riʼ ta chqä nkiʼän ri yemolö impuestos? 47 Y, we rïx xuʼ yeʼichʼaʼej iwinaq, ¿najin komä niʼän jun ri ma nkiʼän ta nkʼaj chik? ¿Ma ke riʼ ta chqä nkiʼän ri ma iwinaq ta? 48 Rma riʼ, kixjowan achiʼel najowan ri Itat kʼo chkaj, rma ryä kan jontir yerajoʼ.