Proverbios

3 Walkʼwal, ma keʼamestaj ta ri naʼoj ri xinkʼüt chawäch, chqä tabʼanaʼ chë ri awan nunmaj ri npixaʼ, 3 Ronojel mul takʼutuʼ ri ajowabʼäl ri majun bʼëy nkʼis ta y jïk tabʼanaʼ che rä ri akʼaslemal. Tabʼanaʼ chkë chë achiʼel ta yeʼaxïm chë aqül chqä chë achiʼel ta yeʼatzʼibʼaj chwäch awan; 4 ke riʼ, kan ütz xkatzʼet rma Dios chqä kimä ri winäq, y xttamatäj awäch chë kan kʼo anaʼoj. 5 Takʼuqbʼaʼ akʼuʼx chrij Jehová rkʼë ronojel awan, y ma takʼuqbʼaʼ ta akʼuʼx chrij ri atamabʼal rït. 6 Jontir ri xtawajoʼ xtaʼän, takʼutuj atoʼik che rä Jehová. Y ryä xtkʼüt chawäch achkë bʼey xtakʼwaj. 9 Kan tayaʼ rqʼij Jehová rkʼë abʼeyomal chqä rkʼë ri naʼäy taq rwäch atikoʼn; 11 Walkʼwal, ma itzel ta tanaʼ taq Jehová yaturpixabʼaj nixta itzel tnaʼ awan taq ryä yaturqʼïl, 12 rma Jehová yerqʼïl ri yerajoʼ, kan achiʼel nuʼän jun tataʼaj rkʼë jun rkʼajol ri kowan nrajoʼ. 13 Kiʼ rkʼuʼx ri winäq ri nrïl rnaʼoj chqä ri winäq ri nqʼax chwäch xa bʼa achkë nbʼanatäj; 14 ri njeʼ anaʼoj más ütz chwäch nawïl plata chqä ri utzil nuyaʼ qa más ütz chwäch ri nyaʼöx oro chawä. 15 Kʼo más rqʼij chkiwäch ri corales; ma njunmatäj ta rkʼë xa bʼa achkë jun ri narayij. 16 Pa rqʼaʼ derecha kʼo kʼaslemal; y pa rqʼaʼ izquierda, kʼo bʼeyomäl chqä nuʼän chë nyaʼöx aqʼij. 17 Kan jaʼäl nanaʼ chqä kan ma nchʼpü ta akʼuʼx taq yabʼä chpan rbʼey. 18 Chkë ri kan kuw nkichäp kiʼ che rä, riʼ nbʼeʼok kan achiʼel jun cheʼ ri nuyaʼ kʼaslemal, y ri ma nkisqʼopij ta qa xtbʼix chë kan kiʼ kikʼuʼx. 21 Walkʼwal, ma keʼamestaj ta ronojel reʼ. Tachajij ri ütz taq naʼoj ye kʼo awkʼë chqä ri achʼobʼonik: 23 Ke riʼ, ma xtaxiʼij ta awiʼ xkabʼä pa abʼey chqä majun achoq rkʼë xtachaqʼij wä awaqän. 25 Ma xtaxiʼij ta awiʼ chë kʼo jun itzelal xtbʼanatäj awkʼë nixta chwäch ri kʼayewal xtpë chkij ri itzel taq winäq. 27 Ma taqʼät ta awiʼ rchë naʼän utzil chkë ri nkʼatzin kitoʼik taq kʼo pan aqʼaʼ rchë yeʼatoʼ. 32 rma Jehová kan itzel yertzʼët ri itzel taq winäq, ye kʼa kan jnan nuʼän rwäch kikʼë ri nkikʼwaj jun jïk kʼaslemal.