Hebreos

13 Ronojel mul tiwajowalaʼ iwiʼ chiwäch kan achiʼel nkajoʼ kiʼ kaʼiʼ ri kan kichʼalal kiʼ. 2 Ma timestaj ta yeʼikʼül nkʼaj chik chiwachoch chqä yeʼitoʼ, achiʼel xkiʼän jojun winäq ojer. Ryeʼ, tapeʼ ma kitaman ta wä, xekikʼül ángeles chkachoch. 3 Ma keʼimestaj ta ri ye kʼo pacheʼ, tibʼanaʼ chë achiʼel ta rïx chqä yïx kʼo pacheʼ kikʼë ryeʼ. Chqä ma keʼimestaj ta ri najin yetzʼil·öx, rma rïx chqä xa jun chʼakulaj ibʼanon kikʼë ryeʼ. 4 Kan tjeʼ rqʼij ri kʼlanen chiwäch jontir rïx, chqä ma titzʼilbʼisaj ta ri ichʼat ri akuchï yixjeʼ wä rkʼë ri ikʼlaj, rma Dios xtqʼät tzij pa kiwiʼ ri winäq ri yebʼanö tzʼil taq bʼanobʼäl chqä ri nkikanuj rkʼexel ri kikʼlaj. 5 Tikʼutuʼ rkʼë ikʼaslemal chë ma chrij ta ri päq bʼenäq wä iwan, chqä kiʼ ikʼuʼx tibʼanaʼ rkʼë ri kʼo iwkʼë. Rma ryä rbʼin qa: «Majun bʼëy xkatinyaʼ ta qa chqä majun bʼëy xkatinmestaj ta qa». 6 Rma riʼ, ütz nqaʼij reʼ rkʼë ronojel qan: «Jehová ya riʼ ri ntoʼö wchë. Ma xtinxiʼij ta wiʼ. ¿Achkë ta komä nkowin nuʼän jun winäq chwä?». 7 Ma keʼimestaj ta ri yekʼwayon bʼey chiwäch, ri kitzjon pä rchʼaʼäl Dios chiwä, y, taq xtitzʼët ri utzil rkʼamon pä pa kiwiʼ rma ütz kinaʼoj, tibʼanaʼ chë ri ikʼuqbʼäl kʼuʼx rïx nuʼän achiʼel ri kikʼuqbʼäl kʼuʼx ryeʼ. 8 Jesucristo ma rjalon ta rnaʼoj, kan ke riʼ rnaʼoj ojer, komä chqä xa bʼa jaruʼ jnaʼ xkeqʼax. 14 rma aweʼ ma yoj kʼo ta chpan jun tinamït ri kan ronojel mul xtjeʼ, rma röj najin nqatäj qaqʼij rchë nqakanuj ri tinamït ri xtpë. 15 Rma riʼ, pa rbʼiʼ Jesús, ronojel mul tqayaʼ rqʼij Dios rkʼë ri yeqaʼij, ri kan achiʼel ta jun spanïk ri nqaʼän che rä, rchë ke riʼ ri winäq nkitamaj chrij rbʼiʼ. 16 Chqä ma timestaj ta niʼän ri ütz chqä nispaj chkë ri nkʼaj chik ri kʼo iwkʼë, rma ronojel ri bʼanobʼäl riʼ kan yeqä chwäch Dios. 17 Tinmaj kitzij ri yekʼwayon bʼey chiwäch, rma ryeʼ najin yixkichajij rïx chqä xtqʼat tzij pa kiwiʼ rma ri samaj riʼ. Ke riʼ, ryeʼ kan kiʼ kikʼuʼx xtkiʼän kisamaj; rma we xa yebʼison, ya riʼ xa kʼayewal xtkʼän pä pan iwiʼ rïx. 18 [...] rma ma nqajoʼ ta nqatzʼük tzij rkʼë xa bʼa achkë nqaʼän.