Gálatas

6 Qachʼalal, yajün taq jun winäq ma nunaʼ ta nuʼän jun ri ma ütz ta, rïx, ri ye kʼo naʼoj iwkʼë ri ye kʼo rkʼë Dios, tikanuj rbʼanik rchë nitoʼ ri winäq riʼ chqä kan ütz inaʼoj tibʼanaʼ rkʼë. Ye kʼa chijujnal rïx tichajij chqä iwiʼ rchë ma xtiʼän ta ri ma ütz ta. 2 Chkiwäch ri kʼayewal, ma tiyaʼ ta qa ri toʼïk najin nikʼüt chiwäch, ke riʼ xtismajij ri rpixaʼ ri Cristo. 3 We kʼo jun winäq nunaʼ chë kʼo rqʼij ye kʼa xa ma ke riʼ ta, xa ryonïl najin nuqʼöl qa riʼ. 4 Ye kʼa chijujnal rïx titzʼetaʼ qa ri ibʼanobʼal, ke riʼ kʼo rma kiʼ ikʼuʼx xtiʼän rma ri ibʼanon pä, y ma tijnamaj ta iwiʼ rkʼë jun chik winäq. 5 Tibʼanaʼ riʼ rma chqajujnal röj kʼo chë xtqatöj na ri bʼanobʼäl yeqaʼän. 7 Ma tiqʼöl ta iwiʼ: Dios majun ta jun nkowin nqʼolö rchë. Ri achkë nutïk qa jun winäq kan ya riʼ rwäch xtresaj. 8 Ri winäq ri achiʼel ta xa yë ri ma ütz ta najin nutïk rma xa rraybʼal rchʼakul nuʼän xa kʼayewal xtrïl; ye kʼa ri winäq ri achiʼel ta kan yë ri ütz najin nutïk rma najin nuʼän rraybʼal Dios xtyaʼöx rkʼaslemal ri majun bʼëy xtkʼis ta. 9 Rma riʼ, ma tqayaʼ ta qa rbʼanik ri ütz, rma kan pa rqʼijul xtqakʼül rajäl rkʼexel we ma xtqkos ta. 10 Rma riʼ, loman yaʼon q’ij chqë, ütz qanaʼoj tqabʼanaʼ kikʼë jontir y más kikʼë ri qachʼalal pa congregación.