Juan

2 Oxiʼ qʼij chrij riʼ, xbʼan jun kʼlanen pa tinamït Caná ri kʼo Galilea, y rteʼ Jesús kʼo wä chpan ri nmaqʼij riʼ. 2 Jesús chqä rtzeqelbʼëy xeskʼïx chqä chpan ri kʼlanen riʼ. 3 Taq najin wä nkʼis ri vino, ri rteʼ Jesús xuʼij reʼ che rä: «Majun ta chik vino». 4 Ye kʼa Jesús xuʼij reʼ che rä: «¿Y achkë qamak röj chë ya riʼ? Majanä tbʼeqä ri qʼij rchë ntamatäj nwäch». 5 Ri rteʼ xuʼij chkë ri najin wä yepajö vino: «Tibʼanaʼ jontir ri xtuʼij ryä chiwä». 6 Chriʼ kʼo wä seis rkʼojlibʼäl yaʼ ri bʼanon rkʼë abʼäj rchë ri winäq yekowin nkichʼäj kiqʼaʼ taq majanä kewaʼ. Kan achiʼel bʼin chkë ri judíos chë nkʼatzin nkiʼän. Chpan jojun chkë ri kʼojlibʼäl riʼ nqʼiʼ jun 44 o 66 litros. 7 Jesús xuʼij reʼ chkë: «Keʼinujsaj re kʼojlibʼäl reʼ rkʼë yaʼ». Y xekinujsaj kʼa taq xplin. 8 Chrij riʼ xuʼij reʼ chkë: «Komä tiwesaj äl jbʼaʼ, y tikʼwaj äl che rä ri paʼäl pa rwiʼ re kʼlanen reʼ». Ryeʼ xkiʼän ri xbʼix chkë. 9 Ri paʼäl pa rwiʼ ri kʼlanen xnaʼ ri vino ri xbʼan rkʼë yaʼ, ye kʼa ma rtaman ta wä akuchï xekikʼamaʼ wä (tapeʼ ke riʼ, ri xepajö ri yaʼ kitaman riʼ), rma riʼ xskʼij ri kʼajol ri xkʼleʼ 10 y xuʼij reʼ che rä: «Jontir winäq nkiyaʼ naʼäy ri vino ri más ütz y taq ri winäq ya xeqʼabʼär, kʼa riʼ nkiyaʼ ri ma kan ta más ütz. Ye kʼa rït kʼa komä najin nayaʼ ri vino ri más ütz». 11 Ri xuʼän Jesús pa Caná ri kʼo Galilea, ya riʼ ri naʼäy chkë ri milagros ri xeruʼän. Ke riʼ rbʼanik xkʼüt rchqʼaʼ y ri rtzeqelbʼëy xkinmaj chrij ryä. 12 Chrij riʼ xxleʼ Capernaúm rkʼë rteʼ, kikʼë rchaqʼ chqä kikʼë rtzeqelbʼëy, ye kʼa ma kan ta kʼïy qʼij xekanaj chriʼ. 13 Taq xa jbʼaʼ wä chik nrajoʼ rchë nbʼeqä ri Pascua ri nkiʼän ri judíos, Jesús xjoteʼ Jerusalén. 14 Taq xok pa templo, xtzʼët chë ri winäq najin wä yekikʼayij wakx, karneʼl chqä palomas, chqä chë ri nkikʼäx päq ye kʼo wä pa kitzʼibʼäl. 15 Rma riʼ, Jesús xbʼerkʼamaʼ pä jun koloʼ, xuʼän kaʼiʼ oxiʼ rwäch che rä y xeresaj äl jontir ri winäq riʼ pa templo, chqä kikarneʼl y kiwakx. Y xkraj äl kirajil ri yekʼexö päq chqä xpiskolij kimesas. 16 Y chkë ri yekʼayin palomas xuʼij: «¡Tiwesaj äl jontir reʼ aweʼ! ¡Ri rachoch Ntataʼ ma kʼaybʼäl ta rchë niʼän kʼayij chpan!». 17 Ri rtzeqelbʼëy xnatäj chkë chë chkipan ri loqʼoläj taq wuj tzʼibʼatäl qa reʼ: «Ri nnaʼ chrij awachoch kan achiʼel jun qʼaqʼ ri nbʼrö pa wan». 18 Taq xkitzʼët reʼ, ri judíos xkiʼij reʼ che rä: «¿Achkë milagro nakʼüt chqawäch ri nukʼüt chë yë Dios xyaʼö uchqʼaʼ pan aqʼaʼ rchë naʼän reʼ?». 19 Jesús xuʼij reʼ chkë: «Tiwulaj re templo reʼ, y rïn xtinyäk pan oxiʼ qʼij». 20 Rma riʼ ri judíos xkiʼij reʼ: «Re templo reʼ xkʼwaj 46 jnaʼ rchë xyak, ¿y rït naʼij chë xa pan oxiʼ qʼij xtayäk?». 21 Ye kʼa ri templo ri najin wä nuʼij ryä ya riʼ rchʼakul. 22 Taq xkʼasöx pä chkikojöl ri kamnaqiʼ, ri rtzeqelbʼëy xnatäj chkë chë ryä chaq taqïl wä nuʼij riʼ, y xkinmaj ri nkiʼij ri Loqʼoläj taq Wuj chqä ri rbʼin wä Jesús chkë. 23 Taq xjeʼ Jerusalén, kan kʼïy milagros xeruʼän chpan ri nmaqʼij rchë ri Pascua. Taq ri winäq xkitzʼët riʼ, kan ye kʼïy xkinmaj chrij ryä. 24 Ye kʼa Jesús ma kan ta xkʼuqbʼaʼ rkʼuʼx chkij, rma rtaman wä ri nkiʼän ri winäq. 25 Y ma xkʼatzin ta chë kʼo jun nbʼin che rä achkë kʼo pa kan ri winäq, rma ryä kan rtaman wä achkë kʼo pa kan.