Apocalipsis

12 Y ya riʼ taq kʼo jun xtzʼetetäj chlaʼ chkaj: jun ixöq ri rkuchun riʼ rkʼë ri Qʼij; ri Ikʼ chuxeʼ raqän kʼo wä y pa rjolon ye kʼo 12 chʼumilaʼ ri kan achiʼel jun corona kibʼanon. 2 Ryä kʼo wä chik pa yabʼil, y kan nuräq wä rchiʼ rma kan kowan wä najin nutäj poqän rma ya naläx ri ti ral. 5 Ri ixöq xaläx jun ti ral kʼajol, ri xtkʼwaj bʼey chkiwäch jontir tinamït rkʼë jun chʼameʼy ri bʼanon rkʼë hierro. Y ri ti kʼajol xkʼwäx äl chwäch Dios chqä pa rutzʼibʼal. 7 Y xbʼanatäj jun chʼaʼoj chlaʼ chkaj. Miguel chqä ri r·ángeles xkiʼän chʼaʼoj rkʼë ri dragón. Y ri dragón chqä ri r·ángeles xkiʼän chʼaʼoj chqä, 8 ye kʼa ryeʼ ma xechʼakon ta chqä ma xyaʼöx ta chik qʼij chkë rchë xejeʼ qa chlaʼ chkaj. 9 Rma riʼ xkʼaq pä ri mamaʼ dragón, ri kumätz ri xjeʼ pa naʼäy, ri nbʼix Diablo chqä Satanás che rä, ri najin yerqʼöl jontir winäq. Ryä xkʼaq pä chwäch le Rwachʼlew, y ri r·ángeles chqä xekʼaq pä rkʼë ryä. 10 Y xinkʼoxaj jun chʼaʼäl chlaʼ chkaj ri kan rkʼë rchqʼaʼ nuʼij: «¡Komä xbʼeqä ri qakolotajik, xtzʼetetäj rchqʼaʼ ri qaDios chqä xchapatäj ri Rqʼatbʼäl Tzij, y kan xtzʼetetäj ri uchqʼaʼ xyaʼöx pa rqʼaʼ rCristo! Rma xkʼaq äl ri ntzjun wä kibʼiʼ ri qachʼalal, ri kan paqʼij chë chqʼaʼ nutzjuj wä kibʼiʼ chwäch ri qaDios. 12 Rma riʼ, ¡kan kiʼ ikʼuʼx tibʼanaʼ jontir rïx, ri yïx kʼo chkaj! Ye kʼa, ¡jyuʼ kiwäch ri ye kʼo chwäch le Rwachʼlew chqä chpan ri mar! Rma ri Diablo xbʼä akuchï yïx kʼo wä rïx y kan kowan katajnäq ryowal, rma rtaman chë xa jbʼaʼ chik tiempo kʼo chwäch». 16 Ye kʼa ri ilew xpë chutoʼik ri ixöq. Ri ilew xjäq rchiʼ chqä xbʼïqʼ äl ri raqän yaʼ ri xel pä pa rchiʼ ri dragón. 17 Rma riʼ ri dragón xkatäj ryowal chrij ri ixöq chqä xbʼä rchë xbʼerbʼanaʼ chʼaʼoj kikʼë rjatzul ri ixöq ri kʼa ye kʼo na qa. Konojel ryeʼ, ya riʼ ri nkinmaj ri rpixaʼ Dios chqä chlaʼen qa chkë rchë nkitzjoj chrij Jesús.