Ezequiel

2 «Rït ri rkʼajol ri achï, katzuʼun apü rkʼë Gog rchë ri tinamït Magog, ri ukʼwayon bʼey chwäch Mesec y Tubal, chqä taʼij ri xtbʼanatäj rkʼë. 4 Rïn xkatintzolij pä, xtinyaʼ kʼïy chʼichʼ pan achiʼ y xkantinkʼäm pä kikʼë jontir ri asoldados, [...] 8 Taq xkeqʼax kʼïy qʼij, xkatzʼet apü. Pa rkʼisbʼäl taq jnaʼ, rït xkatok apü chwäch ri ilew kichë ri winäq ri xeʼukʼwäx äl jkʼan chik tinamït rma ri chʼaʼoj, ye kʼa xetzolin pä pa kitinamit. Ri winäq riʼ xemol pä chkipan ye kʼïy tinamït chqä xeʼukʼwäx pa jyuʼ rchë Israel, ri kan pa jnaʼ rlon pä kʼayewal. Ri winäq rchë ri tinamït riʼ xeʼelesäx pä chkipan jalajöj taq tinamït y xetzolin pä, y jontir ryeʼ nkinaʼ uxlanen. 9 Y rït xkapë chkij achiʼel ta jun qʼeqäl jöbʼ; rït, ronojel ri asoldados chqä ronojel ri tinamït ri ye petenäq awkʼë, xtiküch ri ilew achiʼel ta jun qʼäq sutzʼ»›. 10 Ya reʼ nuʼij Jehová, ri Nimaläj Qʼatöy Tzij: ‹Chpan ri qʼij riʼ kʼo jun xtaläx pan awan y kʼo jun xtaquʼ xtaʼän ri kan itzel. 11 Xtaʼij: «Xkinok apü chwäch ri tinamït ri majun achkë ntoʼö rchë. Xkipë chkij ri majun achkë nbʼanö chʼaʼoj kikʼë, y ri majun achkë nnaqö kichë; jontir ryeʼ majun achkë nchajin kichë, majun tzʼaq chrij ri kitinamit, nixta puertas, nixta ri cheʼ ri yeqʼeʼeʼ chkij ri puertas». 12 Riʼ xtaʼän rchë namäj qa kʼïy bʼeyomäl rchë xttok awchë, [...] 16 Rït xkapë chrij ntinamit Israel, kan achiʼel nuʼän ri sutzʼ taq nuküch ri tinamït. Chpan ri rkʼisbʼäl taq qʼij, rïn xkatinkʼäm pä chrij ri ntinamit rchë chë ri winäq xtkitamaj nwäch, taq awmä rït Gog, rïn xtinchʼajchʼobʼej nbʼiʼ chkiwäch ryeʼ»›. 22 Ya reʼ ri kʼayewal xtinyaʼ pä pa rwiʼ: yabʼil chqä kamïk. Xtinbʼän chë xtpë jun qʼeqäl jöbʼ, saqbʼöch , qʼaqʼ chqä azufre. Jontir reʼ xtqä pä pa rwiʼ ryä, pa kiwiʼ ri rsoldados chqä pa kiwiʼ jontir ri tinamït ri ye kʼo rkʼë. 23 Rïn kan xtinnmirsaj nqʼij, xtinchʼajchʼobʼej nbʼiʼ y xtinkʼüt chkiwäch ye kʼïy tinamït achkë riʼ rïn; y kʼo chë xtkitamaj che rïn yïn Jehová›.