Proverbios

9 Ri naʼoj ri kantzij yaturtoʼ xyäk yän rachoch; rbʼanon chik rbʼanik ri 7 columnas ri chapayon rchë. 2 Rbʼanon chik rbʼanik ri tiʼäj, ri vino chqä ryaʼon chik jontir pa rwiʼ ri mesa. 3 Ye rtaqon äl chik raj-ikʼ pa kiwiʼ ri jyuʼ ri ye kʼo chpan ri tinamït rchë kan rkʼë kuw kichʼaʼäl nkiʼij: 4 «¡Jontir ri majun ta na kinaʼoj, kixampä ke reʼ!». Ryä nuʼij reʼ chkë ri majun ta na kinaʼoj: 5 «Kixampä, titjaʼ ri kaxlanwäy nyaʼ rïn chiwä chqä tiqmuʼ ri vino ri nbʼanon chik rbʼanik. 6 Keʼiyaʼ qa ri majun ta na kinaʼoj rchë ke riʼ xkixkʼaseʼ; kixbʼiyïn chpan ri bʼey ri nuʼän chiwä chë nqʼax chiwäch achkë nkʼatzin niʼän». 9 Tayaʼ rnaʼoj jun winäq ajnaʼoj, y xtjeʼ más rnaʼoj. Tatjoj jun winäq ri jïk rkʼaslemal, y xtkʼiyär rtamabʼal. 10 Ri naxiʼij awiʼ chwäch Jehová nuʼän chë njeʼ anaʼoj, y rtamabʼal ri Nimaläj Rqʼij nuʼän chë nqʼax pan ajolon xa bʼa achkë naʼoj. 13 Ri ixöq ri majun ta rnaʼoj kan nqʼax rwiʼ ri yeruʼän. Ryä kan majun ta rnaʼoj rma kan majun ta rtaman. 14 Ryä ntzʼyeʼ chuchiʼ rachoch chqä pa kiwiʼ ri jyuʼ ri ye kʼo chpan ri tinamït, 15 y kan rkʼë kuw rchʼaʼäl yerskʼij ri yeqʼax äl chriʼ, jontir ri kan jïk kibʼey kikʼwan: 16 «¡Jontir ri majun ta na kinaʼoj, kixampä ke reʼ!». Ryä nuʼij reʼ chkë ri majun ta na kinaʼoj: 17 «Kan jaʼäl ntej ri yaʼ ri xa leqʼan y kan jaʼäl ri kaxlanwäy ri xa pan ewäl ntej wä». 18 Ye kʼa ryeʼ ma kitaman ta chë chriʼ ye kʼo wä ri kamnaqiʼ chqä chë ri xeʼok apü rkʼë xa chpan ri Jül ye kʼo wä.