Isaías

2 Pa rkʼisbʼäl taq qʼij, ri jyuʼ ri akuchï kʼo wä rachoch Jehová majun achkë xtkowin xtslon rchë. Ri jyuʼ riʼ xtqʼax chkiwäch ri nkʼaj chik jyuʼ y ya riʼ ri más näj xtjoteʼ wä, y jontir ri tinamït xkejoteʼ pa rwiʼ. 3 Y kʼïy tinamït xkebʼä y xtkiʼij: «Joʼ, qjoteʼ pa rwiʼ rjyuʼ Jehová, pa rachoch ri rDios Jacob. Ryä xtkʼüt rbʼey chqawäch, y röj xtqbʼä chkipan ri bʼey riʼ». Xtbʼanatäj riʼ, rma ri pixaʼ chpan ri tinamït Sion xkeyaʼöx wä, y ri rchʼaʼäl Jehová, pa Jerusalén xttzjöx wä. 4 Ryä xtqʼät tzij pa kiwiʼ jontir winäq chqä xtsöl ri kʼayewal kʼo chkiwäch. Ri kespadas xtkiʼän samajbʼäl che rä rchë nkichʼïk ri ilew, y ri kilanzas xtkiʼän hoces che rä. Ri winäq ma xtkiʼän ta chik chʼaʼoj chkiwäch nixta xtkitamaj chik xtkiʼän chʼaʼoj. 8 Ri kitinamit nujnäq che rä dioses ri majun yekʼatzin wä. Ryeʼ yexkeʼ chwäch ri kibʼanon rkʼë kiqʼaʼ.