Salmos

72 Nimaläj Dios, taʼij che rä ri qʼatöy tzij achkë achʼobʼon naʼän, tatoʼ ri rkʼajol ri qʼatöy tzij rchë nuʼän ri ütz. 2 Kan pa rbʼeyal tqʼataʼ tzij pa rwiʼ atinamit chqä pa kiwiʼ ri asamajelaʼ ri ma kan ta chkë kʼo kikʼë. 3 Ye ta kʼa ri jyuʼ yebʼanö chkë ri winäq rchë kan jaʼäl nunaʼ kan chqä rchë nkiʼän ri ütz. 4 Kan kertoʼ ri winäq ri ma kan ta achkë kʼo kikʼë; kerkoloʼ ri ralkʼwal ri winäq ri ma kan ta achkë kʼo rkʼë; ttzolij rkʼexel che rä ri winäq ri nwaʼ chkij ri nkʼaj chik. 5 Ryeʼ xtkiyaʼ aqʼij loman kʼa kʼo na ri Qʼij chqä ri Ikʼ, tapeʼ xkeqʼax jaruʼ na chë sol winäq. 6 Ryä xttok achiʼel ri jöbʼ ri nqä pa rwiʼ ri qʼayis ri xqpïx, achiʼel ri mamaʼ taq jöbʼ ri nkixqʼebʼaʼ le Rwachʼlew. 7 Pa rqʼij ryä ri jïk kikʼaslemal kan xkekʼiyär, y ma xtjeʼ ta chik chʼaʼoj kʼa taq ri Ikʼ ma xtjeʼ ta chik. 8 Ri rqʼatbʼäl tzij xtapon kʼa jkʼan chik che rä ri mar; xtchapatäj rkʼë ri raqän yaʼ Éufrates y xtapon kʼa akuchï nbʼekʼis wä rchiʼ le Rwachʼlew. 11 Jontir ri qʼatöy taq tzij xkexkeʼ chwäch chqä jontir ri winäq kan xtkinmaj rtzij. 12 Rma ryä xtköl ri winäq ri kan rkʼë oqʼej nukʼutuj rtoʼik rma kʼo pa mebʼaʼïl, xtköl ri ma kan ta achkë kʼo rkʼë chqä xa bʼa achkë winäq ri majun ta jun nyaʼö rtoʼik. 13 Ryä xtjyowaj rwäch ri nuqasaj riʼ chqä ri kʼo pa mebʼaʼïl, y xkerköl ri mebʼaʼiʼ. 14 Xkerköl chwäch ri kʼayewal yaʼon pa kiwiʼ chqä chwäch ri itzelal. Y ryä kan xtloqʼoqʼej ri kikʼaslemal ryeʼ. 16 Chwäch le Rwachʼlew kan pa rkʼiyal rwäch tkoʼn xtjeʼ, y kan xtqʼax rwiʼ ri rwäch tkoʼn xtjeʼ pa kiwiʼ ri jyuʼ. Ri rtkoʼn ri qʼatöy tzij xtwachin kan achiʼel nwachin pa Líbano, y ri winäq kan xkekʼiyär chkipan ri tinamït kan achiʼel nbʼanatäj kikʼë ri kotzʼiʼj chqä ri qʼayis ri ye kʼo chwäch le Rwachʼlew. 18 Tyaʼöx rqʼij Jehová Dios, ri rDios Israel; xa xuʼ ryä ri nbʼanö nmaʼq taq bʼanobʼäl. 19 Ronojel ta kʼa mul tyaʼöx rqʼij ri nimaläj rbʼiʼ chqä chë ri rqʼij xtnujsaj ta jontir le Rwachʼlew. Amén y Amén.