Hechos

11 Taq ri winäq xkitzʼët ri xuʼän Pablo, ryeʼ kan kuw xkiʼij reʼ pa kichʼaʼäl ri licaonios: «¡Ri dioses xeʼok winäq chqä xexleʼ pä qkʼë!». 12 Rma riʼ xkiʼij Zeus che rä Bernabé, ye kʼa che rä Pablo xkiʼij Hermes rma yë wä ryä ri kan ronojel bʼaʼ mul ntzjon. 14 Taq xkinaʼej riʼ, ri apóstoles Bernabé chqä Pablo xkirëtz kitzyaq, chanin xeʼok chkikojöl ri winäq y kan kuw xkiʼij reʼ: 15 «¿Achkë rma niʼän reʼ qkʼë? Röj chqä xa yoj winäq, xa jnan qabʼanik iwkʼë. Röj najin nqatzjoj ri ütz taq rtzjol chiwä rchë rïx ma niyaʼ ta chik kiqʼij ri majun yekʼatzin wä, xa kan rchë yë ri kʼaslïk Dios niyaʼ rqʼij, ri xbʼanö ri kaj, le Rwachʼlew, ri mar chqä jontir ri kʼo. 16 Ojer qa, ryä xyaʼ qʼij chkë ri tinamït chë nkiʼän ri nkajoʼ. 17 Y tapeʼ xuʼän riʼ, rkʼë ri ütz ri xuʼän pä pan iwiʼ, xqʼalajin chë kantzij kʼo. Ryä xyaʼ pä jöbʼ pan iwiʼ chqä tkoʼn ri kan yewachin rwäch, chqä xyaʼ pä kʼïy iway y xuʼän chë xinaʼ kiʼkʼuxlal pan iwan». 21 Taq xkitzjoj yän ri utziläj taq rtzjol chpan ri tinamït riʼ chqä xekitoʼ yän ye kʼïy winäq rchë xeʼok rtzeqelbʼëy Jesús, xetzolin Listra, Iconio chqä Antioquía. 22 Taq ye kʼo chik chriʼ, ryeʼ xkikʼuqbʼaʼ kikʼuʼx ri qachʼalal chqä xkiʼij chkë chë ma keʼel ta qa chpan rchʼaʼäl Dios. Ryeʼ chqä xkiʼij chkë: «Kan kʼïy kʼayewal kʼo chë xtqaqʼaxaj rchë xtq·ok chpan Rqʼatbʼäl Tzij Dios».