Génesis
39 Ye kʼa José xkʼwäx äl Egipto, y jun egipcio ri rbʼiniʼan Potifar, ri kan kʼo rqʼij pa rqʼatbʼäl tzij Faraón chqä ukʼwayon bʼey chkiwäch ri chajinelaʼ rchë ri tinamït, xloqʼö qa José chkë ri ismaelitas ri xeʼukʼwan äl rchë. 2 Y Jehová kan kʼo wä rkʼë José. Rma riʼ, ronojel kan ütz wä ntel chwäch, chqä ri egipcio, ri rajaw, kan xyaʼ wä ronojel ri rchë ryä pa rqʼaʼ. 3 Y ri rajaw xtzʼët chë Jehová kan kʼo wä rkʼë José chqä chë yë wä Jehová nbʼanö chë ronojel ri nuʼän José kan ütz wä ntel chwäch. 4 Y José kan ütz xtzʼetetäj rma ri rajaw, rma riʼ ryä xuʼän chë yë José nrilin rchë. Chqä Potifar xuʼän ukʼwäy bʼey pa rachoch che rä chqä xyaʼ qa ronojel ri rchë ryä pa rqʼaʼ. 5 Y kan chpan kʼa ri qʼij taq ri egipcio xuʼän ukʼwäy bʼey pa rachoch che rä José chqä xyaʼ qa ronojel ri rchë ryä pa rqʼaʼ, Jehová xyaʼ utzil pa rwiʼ ri egipcio xa rma José, chqä ronojel ri rchë ri egipcio, pa jyuʼ o pa rachoch, Jehová xyaʼ utzil pa rwiʼ. 6 Eqal eqal, Potifar xyaʼ qa ronojel pa rqʼaʼ José, y kan ma nchʼujirsaj ta wä riʼ chrij ri ye kʼo rkʼë, xa xuʼ chrij ri rway. Chqä José kan jaʼäl wä ntzuʼun chqä kan jaʼäl wä rbʼanik. 7 Xqʼax ri tiempo, ri rxjayil ri rajaw kan xrayij apü rwäch José, y rma riʼ xuʼij che rä: «Kawär wkʼë». 8 Ye kʼa ryä ma xrajoʼ ta, y xuʼij che rä ri rxjayil ri rajaw: «Ri wajaw ma rtaman ta achkë qäs kʼo qa pa nqʼaʼ chpan ri rachoch, y jontir ri rchë ryä ryaʼon qa pa nqʼaʼ rïn. 9 Majun ta jun ri yaʼon más uchqʼaʼ pa rqʼaʼ chi nwäch rïn, y jontir ryaʼon qa pa nqʼaʼ, xa xuʼ rït manä, rma rït yït rxjayil. Rma riʼ, ¿achkë ta kʼa rma nbʼän jun mamaʼ itzelal riʼ chqä yimakun chwäch Dios?». 10 Ronojel kʼa qʼij ri ixöq riʼ xtzüj apü riʼ chwäch José, ye kʼa ryä majun bʼëy xrajoʼ ta xwär qa rkʼë o xjeʼ ta qa rkʼë. 11 Ye kʼa jun qʼij, taq ryä xok apü pa jay rchë nuʼän rsamaj, majun ta wä jun chkë ri samajelaʼ ye kʼo chpan ri jay riʼ. 12 Rma riʼ ri ixöq xchäp rtzyaq José chqä xuʼij che rä: «¡Kawär wkʼë!». Ye kʼa José xyaʼ qa rtzyaq pa rqʼaʼ ri ixöq chqä xanmäj äl. 13 Taq ri ixöq xtzʼët chë José xyaʼ qa rtzyaq pa rqʼaʼ chqä xanmäj äl, 14 xräq rchiʼ rchë xerskʼij ri rsamajelaʼ achiʼaʼ chqä xuʼij chkë: «¡Titzuʼ! Ri hebreo, ri xkʼän pä ri wachjil, xrajoʼ xtzäq qakʼïx. Ryä xpë wkʼë rchë xrajoʼ xwär wkʼë, ye kʼa rïn kan rkʼë ronojel wchqʼaʼ xinräq nchiʼ. 15 Y taq xtzʼët chë rïn xinräq nchiʼ, xyaʼ qa rtzyaq chi nxkïn chqä xanmäj äl». 16 Chrij riʼ, ri ixöq xyaʼ qa ri rtzyaq José chuxkïn kʼa taq xapon ri rchjil. 17 Ri ixöq kan ke riʼ chqä xuʼij che rä rchjil, ryä xuʼij: «Ri samajel hebreo, ri xakʼän pä, xpë chwij rchë xrajoʼ xtzäq nkʼïx. 18 Ye kʼa taq rïn xinräq nchiʼ, ryä xyaʼ qa rtzyaq chi nxkïn chqä xanmäj äl». 19 Taq ri rajaw José xkʼoxaj ronojel ri xuʼij ri rxjayil che rä taq xuʼij: «Ya riʼ xuʼän ri asamajel chwä», ri rajaw José janina xkatäj ryowal. 20 Rma riʼ, Potifar xkʼwaj äl José rchë xjuʼ pacheʼ, ri akuchï ye kʼo wä ronojel ri winäq ri yeyaʼon wä pacheʼ rma ri qʼatöy tzij, y José xkanaj qa pacheʼ. 21 Ye kʼa Jehová ma xyaʼ ta qa José chqä ronojel mul xkʼüt jun nimaläj ajowabʼäl chwäch, y xuʼän chë ütz xtzʼetetäj rma ri ukʼwayon bʼey chriʼ pacheʼ. 22 Rma riʼ, ri ukʼwayon bʼey pacheʼ xeryaʼ pa rqʼaʼ José jontir ri winäq ri ye kʼo pacheʼ, y kan yë wä ryä ri ntzʼetö ronojel ri samaj ri yebʼan wä chriʼ. 23 Y ri ukʼwayon bʼey pacheʼ ma nchʼujirsaj ta wä riʼ chrij ronojel ri kʼo wä pa rqʼaʼ José, rma Jehová kʼo wä rkʼë José, y Jehová xuʼän chë ronojel ri nuʼän wä José, ütz wä ntel chwäch.