Efesios

5 Rma riʼ, tikʼamaʼ inaʼoj chrij Dios rma kan yïx ralkʼwal ri janina yixrajoʼ 2 y ronojel mul tikʼutuʼ ajowabʼäl, kan achiʼel xuʼän ri Cristo ri xqrajoʼ röj chqä xyaʼ rkʼaslemal pa kamïk pa qawiʼ röj. Ri xuʼän xok jun sacrificio chqä jun spanïk, ri kan jubʼül rxlaʼ chwäch Dios. 3 Rma kan yïx loqʼoläj chwäch Dios, kan ma titzjoj ta kij ri tzʼil taq bʼanobʼäl o xa bʼa achkë jun ri xa yixurtzʼilbʼisaj nixta ri nbʼanö chiwä chë yixjakʼäkʼ. 4 Chqä ma tiʼän ta jun ri xa kʼixbʼäl y ma tiksaj ta tzij ri xa nukʼüt chë majun ta inaʼoj nixta keʼiksaj tzʼil taq tzij xa xuʼ rchë ri nkʼaj chik yetzeʼen, rma ya riʼ kan ma pa rbʼeyal ta. Pa rkʼexel riʼ, xa kixtyoxin. 5 Rma rïx itaman chqä qʼaxnäq chiwäch chë ri yebʼanö tzʼil taq bʼanobʼäl, ri ma ye chʼajchʼöj ta chqä ri yejakʼäkʼ —ri xa jnan rkʼë nayaʼ kiqʼij tyox— ma xkejeʼ ta chpan Rqʼatbʼäl Tzij ri Cristo chqä Dios. 6 Ma tiyaʼ ta qʼij chë yixqʼol kikʼë tzij ri majun ta kiqʼij, rma xa rma ya riʼ Dios npë ryowal chkë ri ma yenman ta tzij. 7 Rma riʼ ma tiʼän ta ri nkiʼän ri winäq riʼ; 8 rma rbʼanon qa, rïx achiʼel ta xixjeʼ pa qʼequʼn, ye kʼa komä yïx kʼo chik pa saqïl rkʼë ri Qajaw. Ronojel mul kixjeʼ pa saqïl, 9 rma ri saqïl nuʼän chiwä chë ütz inaʼoj niʼän, kan pa rbʼeyal niʼän che rä jontir chqä kantzij yixtzjon. 10 Ronojel mul titzʼetaʼ achkë nqä chwäch ri Qajaw 11 y ma tiʼän ta chik ri bʼanobʼäl ri yekiʼän ri winäq ri achiʼel ta ye kʼo pa qʼequʼn, rma majun ta ütz nukʼäm pä pan iwiʼ. Pa rkʼexel riʼ, tikʼutuʼ chë ri bʼanobʼäl riʼ ma ye ütz ta. 15 Rma riʼ kan tichajij iwiʼ rchë ma niʼän ta achiʼel nkiʼän ri winäq ri majun ta kinaʼoj, rïx tibʼanaʼ achiʼel nkiʼän ri ajnaʼoj taq winäq 16 y kan ütz rksaxik itiempo tibʼanaʼ, rma ri qʼij yoj kʼo komä kan kʼayewal kikʼwaxik. 17 Rma riʼ ma tiʼän ta chik achiʼel nkiʼän ri winäq ri majun ta kinaʼoj chqä tqʼax chiwäch achkë nrajoʼ Jehová chë niʼän. 18 Chqä, ma kixqʼabʼär ta rkʼë vino, rma xa nuʼän chë ma xtinaʼ ta chik achkë xtiʼän; pa rkʼexel riʼ, tikʼutuj che rä Dios chë tyaʼ pä más ri loqʼoläj rchqʼaʼ pan iwiʼ. 19 Keʼiksaj ri salmos chqä ri bʼix ri nkiyaʼ rqʼij Dios taq yixtzjon chiwäch, y kan pan iwan kixbʼixan che rä Jehová. 20 Taq niʼän riʼ, pa rbʼiʼ ri Qajaw Jesucristo ronojel mul kixtyoxin che rä qaDios chqä Qatat rma jontir ri rbʼanon pa qawiʼ. 22 Rïx ixoqiʼ, tinmaj kitzij ri iwachjil achiʼel ninmaj rtzij ri Ajaw, 23 rma ri achï ya riʼ ri jolomäj pa rwiʼ ri rxjayil, achiʼel wä ri Cristo ya riʼ ri jolomäj pa rwiʼ ri congregación, ri xkolö rchë re chʼakulaj reʼ. 25 Rïx achiʼaʼ, ronojel mul keʼiwajoʼ iwixjilal, achiʼel xuʼän Cristo ri xrajoʼ ri congregación chqä xyaʼ riʼ pa kamïk rma ri congregación 26 rchë xuʼän loqʼoläj che rä taq xchʼajchʼobʼej rkʼë yaʼ, ntel chë tzij, rkʼë rchʼaʼäl Dios, 28 Ke riʼ chqä tibʼanaʼ rïx achiʼaʼ, tiwajoʼ ri iwixjayil achiʼel niwajoʼ ri ichʼakul. Ri achï ri nrajoʼ ri rxjayil nukʼüt chë kan nrajoʼ qa riʼ ryä, 29 rma majun ta jun winäq ri kan itzel nunaʼ che rä ri rchʼakul; pa rkʼexel riʼ, xa nutzüq chqä nuchajij, achiʼel wä nuʼän ri Cristo rkʼë ri congregación, 31 «Rma riʼ, ri achï xtyaʼ qa rteʼ chqä rtataʼ, y kʼo che rkʼë rxjayil njeʼ wä, y chë kaʼiʼ xkeʼok xa jun chʼakulaj». 33 Rma riʼ, rïx achiʼaʼ tiwajoʼ iwixjayil achiʼel niwajoʼ qa iwiʼ rïx; chqä ri ixöq rkʼë ronojel ran tyaʼ rqʼij rchjil.